APOOCADIISI 3 - Wanaadi A'deddu

Saadisi ñancomo wätuuja’jocoomo

¹ Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Saadisi ñancomo quedeiyente edai’chäneichomo wwadäädä: “Edääje nä’döa ñäädä aacä amoojato’como Epíiditu edhaajä, aacä amoojato’como shidiichä edhaajä mmaja: Yoowanääcä na tameedä ännödö. Töwääma dajaane ma, nudä adheecadö weichaame.

² Äädai’chäcä. Chäänönge ajäichä yää äwwä naadö, yää mmaja manencwanno’jo’node. Chäänönge ataadawaajui aneedantä’da weiya Waanadiiyö owaadäädä.

³ Yääje yeijäcä ätö’tacä owoowanooma’jödö jäcä; yää tödööcä eduuwa; ätö’tajäätödö sha’duminchacä. Äädai’chä’da aweiya’jäcä adöiña wöta’de tämeenato wötäädö töweiye naichöje, ätö’tajäätödö ’nawä.

⁴ Yääje yeichaame iiña Saadisi ña töweiye naato adhantawäiñe anejjacoomo töwoomöcoomo oncodoimajöncomo; ñanno näämannä’aato’de jaadä tajääde’dato yoomöcoomoje, aashicha’comooje yeichomjäcä.

⁵ Ñäädä e’jodheinchanei’jödö tajääde’dato yoomöje na’de; chäätö anaajuudä’da wa’de weichojo jajeedai’chädö jäconno. Öwö wecamma’de sootoije yeichö Jaaja wwä, Jaaja amoodedö netaadöcoomoje mmaja.

⁶ Eta’sato neta’ñojo Epíiditu Santo wa’deuwödö quedeiyentecoomo wwä;” quee cönä’döaacä öwwä ñäädä soto nnedö nöngato.

Jiidadeujiya ñancomo wätuuja’jocoomo

⁷ Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Jiidadeujiya ñancomo quedeiyente edai’chäneichomo wwadäädä: “Edääje nä’döa ñäädä aashichaato, chäänöngato, Dawí jataadö yaawi’chädö edhaajä. Töwö ñaaducaadö anejja a’dujai’cha na; töwö ña’dudu anejja a’ducaajai’cha mmaja.

⁸ Yoowanääcä na tameedä ännödö. Odhoowajo mönaatata wata’ducaajä wödööa; anejja a’dujai’cha na äwwä. Jäduuje’daiche aweichaame ya’deddu ane’nomja’da meiyaqueene; joome’dä’da meiyaquennea.

⁹ Öwö wene’jaato’de ñanno Caajuushawa sotoi, judhíoja’como wätä’tädö, ñannoje’da töweichaameiñe, äncu’tännamoojeene. Ñanno wene’jaato’de äwwadäädä; tä’mudhe wödööjaato’de aje’taca, dhowaanäcäiñe yeichö wetä öwwä ajummadö.

¹⁰ Ya’deddu woije aashicha tönshinchä awei’jödö weijäcä, öwö adhentunaanö’jo’da wa’de yeetunu eneedö cu’nädaawä, yää yeetunu tameedä nono de’woncomo neneeaato’dedö.

¹¹ Eduuwa mma wöta adöiña. Täijeene ajäichä yää äwwä naadö, adheeje’jödö que mma mätänwajiiñajo’no.

¹² Ñäädä e’jodheinchanei’jödö yeichöje wijaata’täja’de Waanadiiyö jadä, Wanaadi weichojo mu’dudui ääseca’da töweiye naichöje. Waanadiiyö eetö wimenna’de chääjäcä, Waanadiiyö jataadö eetö mmaja, yää Jeduusadén ñano eduuwaato, Waanadiiyö jonnoto caju ñanno töwä’täämö. Öwö yeetö eduuwaato mmaja chääjäcä wimenna’dede.

¹³ Eta’sato neta’ñojo Epíiditu Santo wa’deuwödö quedeiyentecoomo wwä;” quee cönä’döaacä öwwä ñäädä soto nnedö nöngato.

Daodiseea ñancomo wätuuja’jocoomo

¹⁴ Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Daodiseea ñancomo quedeiyente edai’chäneichomo wwadäädä: “Edääje nä’döa ñäädä Chäänöngato, ecammajä’nei aashichaato, chäänöngato mmaja, tameedä Wanaadi nödöödö amoode’nänei’jödö:

¹⁵ Yoowanääcä na tameedä ännödö. Tucuuna’semjönö amäädä, ta’ne’da mmaja. Tucuuna’seene awei’she wa, ta’ne jeiñe mma.

¹⁶ Yääje’daane ma, tucuuna’se’da, ta’ne’da mmaja. Yääje yeijäcä, tijiichuune aweijäcä, mänwenaucwa’de öntacanno.

¹⁷ Edääje äwä’dödö amäädä: “Tönsomaaque wa öwö; jooje öncana’cadö na. Tujummaamö ’je’da na eduuwa öwwä;” quee äwä’dödö. Yaawääne’ äntö’tammecö’da ma wentumje aweichö, ema’jödööje aweichö mmaja, tönsomaaque’da aweichö mmaja, tänuuque’da aweichö mmaja, töwonque’da aweichö mmaja.

¹⁸ Yääje yeijäcä edääje mänwätuuja: Öwwä ane’ca’cä oodo, wa’to que choonecaajä, äwwä töweiye yeichö wetä. Owoomö tajääde’dato mmaja ane’ca’cäde, aweewontotoojo, töwonque’da aweichö mma täne ei’ño, töjöiye mma mei’ño yaawä. Adheejichö mmaja ane’ca’cäde öwwä, adheenudu ejiichö’totoojo, töneene mä’döiye.

¹⁹ Tameedä umjummadö wiyäätuujaato; wichuuseijaato dea. Yääje yeijäcä ta’neene eichä; ätö’tajäätödö sha’duminchacä.

²⁰ Eneecä’ma, eetä wa öwö mönaatajo, adha’dejjadööje. Ya’deddu eta’jäcä anejja wwä, öwwä a’duca’jäcä, yoomonga’de; chääjadä wääwashincha’de; töwö mmaja jaadä nääwashincha’dede.

²¹ Ñäädä e’jodheinchanei’jödö öwö jaadä wödööa’de cajiichaanaje. Yääje mmaja we’jodheinchane öwö; cajiichaanaje wä’döne dea yaawä Jaaja jadä.

²² Eta’sato neta’ñojo Epíiditu Santo wa’deuwödö quedeiyentecoomo wwä;” quee cönä’döaacä öwwä ñäädä soto nnedö nöngato.