APOOCADIISI 22 - Wanaadi A'deddu

¹ Yaawä ñäädä amoode öwwä cöneenejoi weichojo tunai’chädö, Wanaadi mudei dö’tonnoto weja’cadö, Oweeja nnedö’cä mudei dö’tonnoto mmaja. Yää tuna cönä’jaacä acuuwena; ta’dawaane cönääneaacä, widiiqui töweiye naichö wa’cä.

² Jata antaiño ääma tai cöntaacä yää tuna. Tuna jawä cönä’jaacä dee natö’taajä, weichojo dee, ääje’tacamjo. Nuunä waadäi cöneejössetaacä, amoojadooto de’wä aacäde, wedu waadäi. Dhadö cönä’jaacä sotoocomo ejiichöcoomoje.

³ A’que na’de cone’da täcammaamö. Yäätä na’de Wanaadi mudei, Oweeja nnedö’cä mudei mmaja; shootoi niya’deme’caato’de.

⁴ Tönwanno Wanaadi jedö neneeaato’de. Chäätö imennaajä na’de ijaawäiñe.

⁵ Coijaicho ’je’da na’de yaawä. Adhaawa tujunne’da na’de chäwwäiñe, shii tujunne’da mmaja, Cajiichaana Wanaadi niyeijodö nataawä yeijäcäiñe. Tönwanno cajiichaanaje naato’de yeichöödäje.

Jesuuquidiito we’tojo amoinche’da yeichö

⁶ Yaawä ñäädä amoode cönä’döaacä öwwä: —Chäänöngato a’deu mädä, täcaanö’emje mmaja. Cajiichaana Wanaadi, ñäädä ta’deddu ecammannamo tö’tajäätödö edhaajä, tamoodedö cönaanontäi tanoonö wwäiñe eneejo yää eduuwa mma töweeja’dä’emö; quee cönä’döaacä.

⁷ —Eduuwa mma wöta adöiña. Ta’cwaiñe eijai ña ñäädä edä a’deu jajeeda jäcä imennaajä naadö chäänönge tödöönei.

⁸ Öwö ñäädä Juan, edä etaanei’jödö, eneenei’jödö mmaja. Eta’jäcä öwwä, eneea’jäcä mmaja, tä’mudhe wä’döne yaawä ñäädä amoode öwwä edä eneejonei’jödö o’wawä, ya’demeecödööje.

⁹ Yaawä töwö cönä’döaacä öwwä: —Ng’jn; mädääje’daane. Wanaadi anoonö öwö dea, anöngato mmaja, ajimmotoncomo nönga’como mmaja, ñanno Wanaadi wa’deuwödö ecammannamo, edä jajeedä jäcä naadö tödönnamo. Wanaadiiñe ya’deme’cä; quee cönä’döaacä ñäädä amoode öwwä.

¹⁰ Edääje mmaja cönä’döa’dea öwwä: —Mädä Wanaadi a’deddu imennaajä, jajeeda jäcä naadö, mana’dui’che yeeja’do’tojo cu’nädö amoinche’da yeijäcä.

¹¹ Ñäädä conemjönö tödöönei, conemjönö tödöödöje dea nei’ñojo’de. Ñäädä nossajaato tö’tajäätödö, nossaje dea nichö’tajäätö’ñojo’dede. Ñäädä chäänöngato, chäänöngeedä nei’ñojo’de. Ñäädä aashichaato, aashichaadä nei’ñojo’dede; quee cönä’döaacä ñäädä amoode.

¹² —Eduuwa mma wöta adöiña, neejemaatojo dha’me, soto ejeemadööcomo wetä chääwaadäiñe, iiñö’jocoomo nönge.

¹³ Öwö ñäädä awa’deeto, yaatameedö mmaja, ñäädä yaajäntä’jödö, yä’cadö mmaja.

¹⁴ Ta’cwaiñe eijai ñaato ñanno töwoomöcoomo choccannamo’jödö, weichojo ejeedödö ameedö wetä töwwäiñe, jata nata’tadö ai töwoomomöödöcoomo wetä mmaja.

¹⁵ Aneecanö’jöncomo mmaane jödo’na naato’de, jöwaiñamo mmaja, masuuduija’como mmaja, soto emannamo mmaja, chu’taajä ya’deme’nnamo mmaja, tameedä äncu’tännamo mmaja.

¹⁶ —Öwö Jesuuquidiito yaamodeedö wanontäne edä jäcä ecammajä’e quedeiyentecoomo wwäiñe. Öwö ñäädä cajiichaana Dawí adaichö, Dawí atöödö mmaja. Öwö ñäädä shidiichä tawaanato, yaawaanadaawoto.

¹⁷ Epíiditu Santo mmaja, Oweeja nnedö’ca jiñamo mmaja edääje nä’döaato: —Ä’cäde; quee. Ñäädä etaanei mmaja mädääje ä’döjai ña dea: —Ä’cäde; quee. Ñäädä emjätö’sato neejö’ñojo; ñäädä enö’sato weichojo tunai’chädö nenö’ñojo, täje’da.

¹⁸ Öwö edääje wä’döa tameedä edä Wanaadi a’deddu imennaajä naadö etannamo wwäiñe: Ñäädä edä a’deu imennaajä ejannä’nei’jödö nätä’maminchaja’de Wanaadi wwä edä jajeedä jäcoono wäntunaanö’nä ñeecammadö que.

¹⁹ Ñäädä ’quene edä a’deu imennaajä naadö dhantai antaiñuncanei’jödö Wanaadi niiñaca’de jata aashichaato aca yeichojoojato’jödö, yää edä jajeedä jäcä imennaajä naadö. Töwö Wanaadi ñäädä eetö najuuda’de weichojo jajeedai’chädö jäconno.

²⁰ Ñäädä edä jäcä ecammajä’nei edääje nä’döa: —Ee, eduuwa mma wöta adöiña; quee nä’döa. Amén. Ä’cäde’de jaiñoone Cajiichaana Jesuuquidiito.

²¹ Cädhaajotoncomo Jesuuquidiito aashichaato nutuudu äwwäiñe yei’she wa. Amén.