APOOCADIISI 21 - Wanaadi A'deddu

Caju eduuwaato weichojo, nono eduuwaato weichojo mmaja

¹ Yääje mma yaawä weneeaqueene anejja caju, eduuwaato tödööajä daja, nono eduuwaato mmaja; yää awa’deeto’jä caju a’que cönä’jaacä yaawä, nono awa’deeto’jä mmaja. Dama ’je’da cönä’jaacä yaawä.

² Öwö, Juan, weneeaqueene yää jata aashichaato wä’tädö caju ñanno, Wanaadi döiñanno, yää Jeduusadén ñano eduuwaato. Töweesomaajä’e cönä’jaacä, töiño eneeje wodi töwäätöiñonoomö töweesoma töweiye naichöje.

³ Caju ña a’deu wetaaquene yaawä. Jooje cönäätaacä; cönä’döaacä: —Eneecä’ma, soto jadäiñe Wanaadi weichojo na eduuwa. Töwö nejaata’ta’de chääjadäiñe; tönwanno naato’de shootoije. Töwö dea na’de chääjadäiñe, Yaanadiiyöcoomoje.

⁴ Töwö Wanaadi nichocca’de tameedä chäänacuuducoomo. Wäämanä ’je’da na’de yaawä, wentumje weiñä ’je’da mmaja; waamonä ’je’da na’dede, se’neiñe weiñä ’je’da mmaja, awa’deenato weiñä wataame’jödö weijäcä; quee cönäätaacä a’deu.

⁵ Yaawä ñäädä mude de’wä shuucu cönä’ja’dö cönä’döaacä: —Eneecä’ma, eduuwaatoje wödööa tameedäädä; quee cönä’döaacä. Edääje mmaja cönä’döa’dea: —Imennäcä, chäänöngeene mädä a’deu yeiyajä, täcaanö’emje mmaja; quee cönä’döaacä.

⁶ Yaawä töwö cönä’döaacä öwwä: —Tödööe na. Öwö ñäädä awa’deeto, yaatameedö mmaja. Ñäädä emjätö’sato wwä täje’da wänu’a’de weichojo tunai’chädö, yää acuuwena weja’cadö.

⁷ Ñäädä e’jodheinchanei’jödö wwä nä’tua’de tameedä mädä aashichaato. Öwö wa’de Yaanadiiyöje; töwö na’de önnedööje.

⁸ Ñanno tösaada’como mmaane, aneecanö’jöncomo mmaja, conemjöncomo mmaja, soto emannamo mmaja, masuuduija’como mmaja, jöwaiñamo mmaja, chu’taajä ya’deme’nnamo mmaja, tameedä töwä’duna’como mmaja, jiyooto comootödö ña yeicho’como na’de. Iiña wedeinchä jodö nengaato’de, acuudajaada dhatu’jödö jodö joqque. Yää jiyooto comootödö ña wötäänä yää, yää ’jejaato wäämatoojo; quee cönä’döaacä öwwä.

Jeduusadén ñano eduuwaato weichojo

⁹ Yaawä öwwadäädä amoode cöneejä, ñanno aacä amoojato’como amoode jimmä, ñanno aacä amoojato cancudu dha’me cönä’ja’todö, yää wätä’maminchanä yaatameetojo cu’tädö. Ñäädä amoode cönä’döaacä öwwä: —Ä’cäde sadä, yäätöiñonooajä weneejoiye äwwä, ñäädä Oweeja nnedö’cä jiñamo; quee cönä’döaacä.

¹⁰ Yaawä Epíiditu Santo wwä yää eneejodaawä öwwä, ñäädä amoode yaadäne yaawä jöö adai’joto, cawooto de’cäi. Öwwä cöneenejoi yaawä yää jata aashichaato wä’tädö caju ñanno, Wanaadi döiñanno, yää Jeduusadén ñano.

¹¹ Wanaadi nnataadö chääjäcä cönä’jaacä. Ta’dawaane cönääneaacä yää jata, yaamante täjeeto wa’cä. Jáasepe nönge cönä’ja’dea, widiiqui wa’cä mmaja ta’dawaane yeichö.

¹² Yää jata awoodhecääcä chuudadai’chä’jödö cönääneaacä cawä, amoojadooto de’wä aacä iiñata’tadö, chääwaadäiñe Iisadaaeeda nnacoomo eetöcoomo imennaajä chääjäcä. Iiñata’tajo cönä’ja’to amoojadooto de’wä aacä amoode, mönaatata waadäi.

¹³ Shii weja’catoojo dö’se aaduwaawä iiñata’tadö cönä’jaacä, shii womontojo suda’wawä aaduwaawä mmaja, ije’taca aaduwaawä mmaja; shii womontojo dö’se aaduwaawä mmaja cönä’ja’dea iiñata’tadö.

¹⁴ Amoojadooto de’wä aacä cönä’jaacä chuudadai’chä’jödö o’wadö. Chääjäcä imennaajä cönä’jaacä, ñanno amoojadooto de’wä aaco’como Oweeja nnedö’cä nanontädö eetöcoomo, ñanno anonta’como’jödö.

¹⁵ Ñäädä amoode öwwä cöna’deuwa’dö wwä cönä’jaacä shimaada nöngato, oodo döaajä, jata oneejatoojo, iiñata’tadö oneejatoojo mmaja, chuudadai’chä’jödö oneejatoojo mmaja.

¹⁶ Yää jata cönä’jaacä tujuntaicheiñe; nuwe yeichö cönä’jaacä dhajuujiñö ’cäwa’cä mmaja. Yaawä ñäädä amoode oneejatoojo que jata cönoonejai, adai’jä yeichö. Nuwe cönä’jaacä jooje, aaduwaawä nuunä wötäänä ’cäwa’cä; dhajuujiñö chä’cäwa’cä mmaja, cawä yeichö chä’cäwa’cä mmaja.

¹⁷ Chuudadai’chä’jödö daja cönoonejai chea yaawä; aaduwaawä soto meetudu cönä’jaacä cawä yeichö, soto noneejatoojo que oneejaajä, yää amoode enwawä cönä’ja’dö.

¹⁸ Chuudadai’chä’jödö cönä’jaacä widiiqui nöngato döaajä, sheene. Jata mmaane cönä’jaacä oodo töjääcäjeene, iiñataaje, ta’dawaane, jeteiya töweiye naichö wa’cä.

¹⁹ Jata cudaadai’chä’jödö o’wadö cönä’jaacä tameedä widiiqui nönga’como, chääwaadäiñe. Awa’deenato jäcä cönä’jaacä jáasepe, sheenato. Yää ’jejaato cönä’jaacä sajiido, jä’nä ’moi nönge sheene yeichö. Aaduwaawoto cönä’jaacä áacata, sheenato mmaja. Aacäicheeato cönä’jaacä medaada, chuuta töwääne naichöje sheene.

²⁰ Ijaatoodeaato cönä’jaacä óonise, tajääde’dato, juduumato dhantawä. Tooni amoojatooto cönä’jaacä coonadiina, seweichato. Aacä amoojatooto cönä’jaacä quidiisóodito, cönooto a’cödööjato. Aaduwaawä amoojatooto cönä’jaacä wediido, sheenato, tajääde’deichato dhantawä. Aacäicheeato amoojatooto cönä’jaacä topáasiyo, chuuta nönge sheene yeichö. Amoojadooto cönä’jaacä quidiisopadaasa, cönooto a’cödööjato. Amoojadooto de’wä toonicho cönä’jaacä jasinto, sheenato, ta’dawaanato. Amoojadooto de’wä aacoto cönä’jaacä aamatiita, jiyeichä eccuduujato.

²¹ Iiñata’tadö cönä’jaacä amoojadooto de’wä aacä, mayuudu tajääde’dato nöngato döaajä. Ääma cönä’jaacä oodo iiñataajato döaajä, ta’dawaane, jeteiye töweiye naichö wa’cä.

²² Wanaadi weichojo amääajä ’je’da weneeaqueene yää jata, ñäädä Cajiichaana Wanaadi jäduujato maaje yeijäcä, Oweeja nnedö’cä mmaja.

²³ Yää jataawä shii niyeijodö tujunne’da na’de, nuunä niyeijodö tujunne’da mmaja, Wanaadi nnataadö yeijoneije yeijäcä. Oweeja nnedö’cä dhawaadöje na’de.

²⁴ Ñanno sotoocomo, yääwanaaca’jocoomo, naato’de jata niyeijodö nataawä. Nono de’woncomo cajiichaanacoomo nomongaato’de yää jataaca, tönnödööcomo täjeeto dha’me. O’jodhaatoje yää jata ne’taato’de.

²⁵ Iiñata’tadö ta’duque’da na’de ano yeichöje. Yäätä coijaicho ’je’da na’de.

²⁶ Tameedä sotoocomo tönnödööcomo täjeeto nene’aato’de yää jataaca; o’jodhaatoje ne’taato’de.

²⁷ Conemjönö ataamonno’jo’da na’de yää jataaca yeichöje. Omoomö’da naato’de nossaja’como tö’tajäätödö, äncu’tännamo mmaja. Ñanno mmaane nomongaato’de, chäätöcoomo töweiya’como Oweeja nnedö’cä jajeedai jäcä, yää weichojo jajeedai’chädö jäcä.