APOOCADIISI 20 - Wanaadi A'deddu

1,000 wedu weichojo

¹ Yääje mma yaawä weneeaqueene amoode wä’tädö caju ñanno, yaawi dha’me, yää ya’tadö inwadö ’jemjönö a’ducaatojo, cadheena adai’joto chänwawä.

² Ñäädä amoode caimaana cönaajäi, ñäädä äcääyu, jenaadä cönä’ja’dö, odö’sha täätö, Caajuushawa täätö mmaja. Cöni’wadö’täi yaawä 1,000 weduuto ’cäwa’cä.

³ Cöneemai yaawä ya’tadö inwadö ’jemjönö aca. Cöna’dui yaawä; cönaajoijoi chea, sotoocomo anencu’tä’daiñe yeichö wetä 1,000 wedu yeichö wadaadä. Yää ’jeje tö’wadööca yeichojo na, a’dhe mma.

⁴ Yaawä weneeaqueene wanna mude, ye’woncomo wataajimaadö mmaja. Chäwwäiñe u’ajä cönä’jaacä soto emmencato’como. Weneeaquento dea ñanno Jesuuquidiito a’deddu ecammajäätödö jo’tädööja’como ijöncä’jä’a’como’jödö ecaatocoomo, ñanno Wanaadi a’deddu jo’tädööja’como wä’jajo’jocoomo, ñanno odoocojaato änwa’deme’jöncomo’jödö, chu’taajä mmaja. Ñanno dea cönä’ja’to odoocojaato wwä töjaawäiñe ä’madaaca’ñäjoojöncomo’jödö, tamäädöcoomo jäcä mmaja. Ñanno waadoncadööcomo weneeaqueene. Cajiichaanaje naato’de 1,000 wedu Quidiito jadä.

⁵ Tameedä anejjacoomo yä’jajo’jocoomo aadonca’da cöneiya’to 1,000 weduuto wadaadä. Yää yää awa’deenato waadoncatoojo.

⁶ Ta’cwaiñe eijai ña ñäädä awa’deenato waadoncatoojo awoono weja’cadö; aashichaato ñäädä. Ñanno yääja’como yää ’jejaato wäämatoojo awä ääma’da naato’de. Wanaadi wwä töwa’deuwaamoje naato’de, Quidiito wwä töwa’deuwaamoje mmaja. Quidiito jadä cajiichaanaje naato’de 1,000 wedu.

⁷ Yaawä 1,000 wedu yä’döa’jäcä Caajuushawa nätu’caja’de jedeesoje yeichö jonno.

⁸ Töwö neja’ca’de yaawä sotoocomo encu’täiñe, tameedä nono de’woncomo weichö wa’cä, ñanno Cocca ñancomo, Maacocca ñancomo mmaja. Töwö Caajuushawa ni’jummaato’de yaawä töweewänä’taamoje. Cashiishi wa’cä naato’de, ime’cu’tädö e’jodhe.

⁹ Cönaato’ta’to yaawä nono wadaadäädä. Wanaadi sotoi weicho’como cönaawodhentoicho, jata imjummadö mmaja. Yaawä caju ñanno Wanaadi wa’to cönenno’jai, töja’to’comooje.

¹⁰ Yaawä ñäädä odo’sha, ñanno encu’täneichomo’jödö cönäätämaajoi jiyooto comootödö ña, odoocojaato naadö döiña, ecammajä’nei chäänöngemjönö naadö döiña mmaja. Iiña nätä’maminchajaato’de ano, coijai’jödöödä, yeichöödäje. Iiña wedeinchä nengaato’de, acuudajaada dhatu’jödö jodö joqque.

Mude adai’joto je’taca wätämmencatoojo

¹¹ Yaawä weneeaqueene mude adai’joto, tajääde’dato. Ñäädä ye’wä shuucu cönä’ja’dö jonno cönännamjöi nono, caju mmaja; nono weichojo ’je’da cönä’jaacä yaawä, caju weichojo ’je’da mmaja.

¹² Weneeaquento yaawä tameedä yä’ja’a’como, ñanno täneejuca’como’jödö, soto mmädä mmaja; jiidi cönä’ja’to Wanaadi mudei je’taca. Jajeeda cönaata’ducaajätöi yaawä. Anejja jajeeda mmaja cönaata’ducai chea, yää weichojo jajeedai’chädö. Yä’ja’a’como cönä’mencajoicho yaawä, jajeedä jäcä iiñö’jocoomo imennaajä woije.

¹³ Ñanno yä’ja’a’como cöneeja’caicho yaawä dama ’cwawonno, yä’ja’a’como weicho’como awonno mmaja. Tameedä cönä’mencajoicho yaawä töwaadäiñe tönnö’jocoomo woije.

¹⁴ Yaawä wäämanä mmaja, yä’ja’a’como weicho’como mmaja, cönäätämaajoi jiyooto comootödö ña. Yää jiyooto comootödö ña wötäänä yää, yää ’jejaato wäämatoojo.

¹⁵ Tameedä ñanno weichojo jajeedai’chädö jäcä chäätö imennaajä ’jemjöncomo cönäätämaajoicho jiyooto comootödö ña.