APOOCADIISI 2 - Wanaadi A'deddu

Wä’wätuujanä imennaajä adoojo’jödö Eujeeso nancomo wwadäädä

¹ Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Eujeeso ñancomo quedeiyente edai’chäneichomo wwadäädä: “Edääje nä’döa ñäädä aacä amoojato’como shidiichä ämu’demjönö dhamäädö jäcoono, ñäädä aacä amoojato adhaawa a’täi yeichö antaiño wäämannäjöödö, yää oodo döaajä:

² Yoowanääcä na tameedä ännödö, jooje ataadawaajui weichö mmaja, aashicha tönshinchä aweichö mmaja, conemjöncomo etaajai’cha aweichö mmaja. Amäädä mene’ju’neto ñanno anontaajäja’como wätä’tädö, ñannojöönö töweichaameiñe. Töwä’duna’comooje yeichöcoomo medantäneeto.

³ Amäädä töwäntunaanö’e määnene; aashicha tönshinchä määnene dea. Jooje na junnei aweetadaawa’cajo’jödö, aweejäduuqueancädä’da.

⁴ Yääje yeichaame cone’daiche wa äjääcä. Amäädä cujumma eduuwa awa’deene jumma’jödö nönge’da.

⁵ Yääje yeijäcä ätö’tacä awa’deene awei’jödö jäcä, yää choojonno töwe’ducca maadö. Ätö’tajäätödö sha’duminchacä; tönnöe mä’jaaquennö mmaja tödööcäde. Ecooneca’da aweiya’jäcä öwö adöiña wöta’de; adhaawa äwwä naadö que manenwajiiña’de, ätö’tajäätödö änsa’dumincha’da aweiya’jäcä.

⁶ Töweiye mmaja na dea aashicha aweichö, yää niicodaaiita nödöödöcoomo awaacö’je’da aweichö; öwö mmaja waacö’je’da na iiñödööcomo.

⁷ Eta’sato neta’ñojo Epíiditu Santo wa’deuwödö quedeiyentecoomo wwä: Ñäädä e’jodheinchanei’jödö nameedöje wänu’a’de weichojo ejeedödö, yää Wanaadi jataawä Aashichaato ña naadö;” quee cönä’döaacä öwwä ñäädä soto nnedö nöngato.

Eesimiidana ñancomo wätuuja’jocoomo

⁸ Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Eesimiidana ñancomo quedeiyente edai’chäneichomo wwadäädä: “Edääje nä’döa ñäädä awa’deeto, yaatameedö mmaja, ñäädä cönäämaichö, töwäämaajo jonno cönaadoncaichö:

⁹ Yoowanääcä na tameedä ännödö, yeetunu eneedö äwwä, tönsomaaque’da aweichö mmaja, Wanaadi nödöödö jäcä tönsomaaque aweichaame jooje. Yoowanääcä na adheementädö ñanno judhíoja’como wätä’tädö wwäiñe, judhíoje’da töweichaameiñe, Caajuushawa sotoiñe.

¹⁰ Määcatoncai äwäntunaanö’tojo jäcä. Dhantai odo’sha adheewaacajaato’de jedeeso ewöötö taca, odhoonejaadöcoomo wetä; amoojadä anooto yeetunu meneea’de. Chäänönge eichä’de äwäämadö jonaane; yaawä äwwä wu’a’de weichojo canaanadi.

¹¹ Eta’sato neta’ñojo Epíiditu Santo wa’deuwödö quedeiyentecoomo wwä: Ñäädä e’jodheinchanei’jödö onooneja’da na’de yää ’jejaato wäämanä;” quee cönä’döaacä öwwä ñäädä soto nnedö nöngato.

Peecamo ñancomo wätuuja’jocoomo

¹² Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Peecamo ñancomo quedeiyente edai’chäneichomo wwadäädä: “Edääje nä’döa ñäädä sauda seqqueeto ääjatoncädooto yeedö dha’me naadö:

¹³ Yoowanääcä na tameedä ännödö; ajaatadö mmaja yoowanääcä na dea, Caajuushawa waanontotoojo dö’tä yeichö. Yääje yeichaame ye’nomja’da ma amäädä. Ñanno soto Caajuushawa weichojo dö’tä Antipa cöneemaicho, ñäädä ya’deddu ecammajä’nei, yaanonö chäänöngato mmaja. Ñäädä emaadawä chäwwäiñe yeecamjödö omjome’dä’da meiyaqueene.

¹⁴ Yääje yeichaame cone’daiche wa äjääcä. Iiña Peecamo ña töweiye na adhantawäiñe Wadan nowaanoma’jödö ecaanö’nnamo. Töwö Wadan Wadaaca tönoowanooma cönä’jaacä iisadaaediitacoomo shaadijannä’cadööcomo jäcä, chu’taajä wwä saaquidiijiisiyooje u’ajä tänäädö wetä yaawä chäwwäiñe, masuuduije yeichöcoomo wetä mmaja.

¹⁵ Töweiye mmaja naato dea adhantawäiñe niicodaaiitacoomo nowaanomaadö enaanö’nnamo mmaja, yää waacö’jönö.

¹⁶ Yääje yeijäcä ätö’tajäätödö sha’duminchacä. Ecooneca’da aweiya’jäcä jadheedä wöta’de adöiña; yaawä yeewänä’ta’de chääjadäiñe, sauda öntaiño weja’cadö que.

¹⁷ Eta’sato neta’ñojo Epíiditu Santo wa’deuwödö quedeiyentecoomo wwä: Ñäädä e’jodheinchanei’jödö wwä wänu’a’de ädeeja owaanojöönö. Chäwwä wu’a’dede täju’cä tajääde’dato, äätö eduuwaato imennaajä chääjäcä. Anejja dhowaanäcä’da na yää äätö, tääquemö mmaane dhowaanäcä;” quee cönä’döaacä öwwä ñäädä soto nnedö nöngato.

Tiiyatiida ñancomo wätuuja’jocoomo

¹⁸ Edääje mmaja ñäädä soto nnedö nöngato cönä’döa’dea öwwä: —Edääje imennäcä’de amoode wwadäädä, ñäädä Tiiyatiida ñancomo quedeiyente edai’chäneichomo wwadäädä: “Edääje nä’döa Wanaadi nnedö, ñäädä wa’to nöngato chäänudu, oodo encaimaajä nöngato i’judu:

¹⁹ Yoowanääcä na tameedä ännödö, äwwä jummadö mmaja, aneecamjödö mmaja, ataadawaajui mmaja, aashicha tönshinchä aweichö mmaja. Yoowanääcä na öwwonooje jooje töweetadaawa’cajo aweichö eduuwa, awa’de awei’jödö e’jodhe’cä.

²⁰ Yääje yeichaame cone’daiche wa äjääcä. Amäädä ajaadä yeichö jonno anu’ca’da dea ma ñäädä wodi, Jeesaweeda, Wanaadi wa’deuwödö ecammajä’neijato wätä’tädö. Töwö Jeesaweeda öwö sootoi nencu’taato. Töwö nowaanomaato masuuduichanä jäcä, chu’taajä wwä saaquidiijiisiyooje u’ajä tänäädö jäcä mmaja.

²¹ Öwö a’que wiyoomo’ne tötö’tajäätödö sha’duminchadö chäwwä; töweesa’dumincha’se’daane töwö, tömaasuduichadö e’nomja’se’da mmaja.

²² Eduuwa ñäädä Jeesaweeda wichäädäi’ña’de; chääjadoncomo masuuduichadö mmaja wimaaminchaato’dede, iiñödö nönge tödöödö ane’nomja’da yeiya’comjäcä.

²³ Iiñacoomo mmaja wöja’aato’de. Tameedä quedeiyentecoomo dhowaanäcäiñe na’de yaawä soto tö’tajäätödö jadä’jödöödä tönemmenca weichö, chääwanööcomo mmaja. Awaadäiñe maneejemaato’de ännödööcomo woije.

²⁴ Änwanno dhantai Tiiyatiida ñancomo, yää wätunnä aneecanö’jöncomo, Caajuushawa nowaanomaadö sö’jato täcammaamö jäcä oowanoomajöncomo’jödö, edääje daja wä’döa äwwäiñe: Öwö adhaanontätäiñe’da wa anejja tödöödö jäcä.

²⁵ Yää äwwäiñe naadö mmaane täijeene ajäichäcä, adöiña öötädö wa’cä.

²⁶ Ñäädä e’jodheinchanei’jödö, yaatameedö jonaane ya’deddu tödöönei’jödö, wödööa’de sotoocomo cajiichaanaichomooje,

²⁷ Jaaja cajiichaanaje yöödöneedöje mmaja. Ñäädä e’jodheinchanei’jödö soto nanontaato’de sejaadadi döaajä yaichadö tönaanontä töweiye naichöje; ädiiñä wesaucwaajä nönge ñanno soto nä’döjaato’de chäwwä.

²⁸ Chäwwä wu’a’de shidiichä yaawaanadaawoto.

²⁹ Eta’sato neta’ñojo Epíiditu Santo wa’deuwödö quedeiyentecoomo wwä;” quee cönä’döaacä öwwä ñäädä soto nnedö nöngato.