APOOCADIISI 19 - Wanaadi A'deddu

¹ Yääje mma yaawä caju ña wetaaquene a’deu; jooje cönäätaacä. Yää a’deu cönä’jaacä jooja’como soto wa’deuwödööcomo. Tönwanno cönä’döa’to: Aadeduuya. Äwaanacaanei mä’dä Cöwaanadiiyöcoomo, jäduujato mmaja, aashicha wa’deutojooje mmaja,

² chäänönge soto tönemmencaiñe yeijäcä. Töwö wodi nimaaminchai, ñäädä masuuduijato, tacaadato’jödö, ñäädä tömaasuduichö que nono de’woncomo cone’maneichomo’jödö. Töwö Wanaadi nijo’täi tanoonö jajo’jocoomo chäwwä; quee cönä’döa’to caju ñancomo.

³ Edääje mmaja cönä’döa’to dea: —Aadeduuya. Yau’cwa’jödö niweedeiña’de yeichöödäje; quee.

⁴ Yaawä ñanno tooni sotooto de’wä aacäicheea’como inchoncomo, ñanno aacäicheea’como amoode’na’como mmaja, tä’mudhe cönä’döicho; cönääje’duicho yaawä nono wwadäädä Wanaadi je’taca, ñäädä mude de’wono je’taca. Tönwanno cönwa’deme’ca’to; cönä’döa’to: —Amén. Aadeduuya; quee.

⁵ Yaawä mude dö’tä a’deu cönäätaacä: Aashicha adha’deutäcä Cöwaanadiiyöcoomo jäcä, änwanno shootoi, änwanno mmaja ñontännamo, täneejuca’como mmaja, soto mmädä mmaja; quee cönäätaacä.

Oweeja nnedö’cä jötaatojo

⁶ Yaawä wetaaquennea a’deu, jooja’como soto wa’deuwödööcomo nönge. Shoodö we’duccadö wa’cä cönäätaacä, cadeemedu töweiye naichö wa’cä mmaja. Edääje cönä’döa’to: Aadeduuya. Cädhaajotoncomo Wanaadi cajiichaanaje na; ñäädä mma töwö jäduujato.

⁷ Töwa’cwainchaane ca’cwainchato’ñojo; aashicha ca’deuto’ñojo chääjäcä, Oweeja nnedö’cä jötaatojo cu’nädö aca yä’dö’jödö weijäcä. Ijiiñamo töweesomaajä’e na.

⁸ Chäwwä u’ajä na camiisha tajääde’dato döaajä awä yeewontotoojo. Iiñataaje yoomö na, weijotä; quee cönä’döa’to ñanno caju ñancomo. Aashicha Wanaadi sotoi nödö’jocoomo cu’tädö yää camiisha tajääde’dato.

⁹ Yaawä ñäädä amoode cönä’döaacä öwwä: —Edääje imennäcä: “Ta’cwaiñe eijai ñaato ñanno Oweeja nnedö’cä jötaadawä ääwashinchä a’dejja’como,” quee imennäcä; quee cönä’döaacä amoode. Edääje mmaja cönä’döa’dea öwwä: —Wanaadi a’deddu chäänöngato mädä; quee cönä’döaacä.

¹⁰ Yaawä tä’mudhe wä’döne ñäädä amoode o’wawä, ya’demeecödööje. Töwö cönä’döaacä öwwä yaawä: —Mädääje’daane; Wanaadi anoonö mmaja öwö dea, anöngato mmaja, ajimmä nönga’como mmaja, ñanno chäänönge Jesuuquidiito a’deddu ecammajä’nnamo. Wanaadiiñe ya’deme’cä; quee cönä’döaacä. Ñanno Jesuuquidiito a’deddu ecammajä’nnamo ñanno Wanaadi nutuudu woije töneecammajä’e weneenetoodö.

Cawaayu tajääde’dato de’wono wäänejo’jödö

¹¹ Yaawä weneeaqueene caju wata’ducaadö. Yäätä cönääneaacä cawaayu, tajääde’de. Ye’wono eetö cönä’jaacä Aashichaatoje, Chäänöngatooje mmaja, chäänönge tönemmenca yeijäcä, töweewänä’tä mmaja.

¹² Chäänudu cönä’jaacä wa’to nönge. Iju’jä de’wä cönä’jaacä jooje canaanadi. Chäätö imennaajä cönä’jaacä anejja dhowaanojöönö; töwö mmaane dhowaanäcä na.

¹³ Yoomö cönä’jaacä munu que töjööe. Töwö chäätö na Wanaadi A’dedduje.

¹⁴ Shootoi caju ñancomo inchäcä cönta’to cawaayu tajääde’da’como de’wä, iiñataaja’como yoomöcoomoje, camiisha aashichaato döaajä, tajääde’deiñe.

¹⁵ Ñäädä cawaayu de’wä cönä’ja’dö ntai cöneeja’caacä sauda dhejiiyajä, sotoocomo töja’to’como. Töwö chäädhajootoncomooje na’de, sejaadadi döaajä töwaichadööje. Töwö soto nimaaminchaato’de, eccucaatojo aca chääjedöödö etaajajä’nei töweiye naichöje. Chäwwäiñe nemja’de chääjedöödö eccudu, yää Wanaadi jäduujato wwä wätä’maminchajoonä cu’tädö.

¹⁶ Yoomö jäcä chäätö imennaajä cönä’jaacä, ijeetö jäcä mmaja. Cajiichaanacoomo Cajiichaanaichomo, ädhaamo Edhaajotoncomo mmaja, quee chäätö imennaajä cönä’jaacä.

¹⁷ Yaawä amoode weneeaqueene, jiidi, shii acuunawä. Töcä’de cöncä’töngacä tadiiñaamo wwäiñe, ñanno caju dacooconcomo waademaadö. Töwö cönä’döaacä chäwwäiñe: —Ä’täcä; adhe’jummatääcä, määwashinchätäiye Wanaadi nejoodödö tacaadato aca;

¹⁸ cajiichaanacoomo junu mänäätäiye, suddau edhaajotoncomo junu mmaja, jäduuja’como junu mmaja, cawaayu junu mmaja, ye’woncomo’jödö junu mmaja; tameedä soto junuucomo’jödö, tädhaajäca’como’jödö mmaja, tädhaajäquemjöncomo’jödö mmaja, täneejuca’como mmaja, soto mmädä mmaja, tameedä yeichöcoomo wa’cä; quee cönä’döaacä ñäädä amoode tadiiñaamo wwäiñe.

¹⁹ Yaawä ñäädä odoocojaato weneeaqueene; edä nono de’woncomo cajiichaanacoomo jadäiñe cönä’jaacä, tösootoichomo jadäiñe mmaja. Tönwanno ye’jumma’como cönä’jaacä töweewänä’tädööcomo wetä cawaayu tajääde’dato de’wono jadä, shootoi jadäiñe mmaja.

²⁰ Ñäädä ecammajä’nei chäänöngemjönö yäätä cönä’ja’dea, ñäädä odoocojaato neneedöje ene’ju’tojo tönnöe cönä’ja’dö. Töwö yää ene’ju’tojo tödöödö que tönencu’täiñe cönä’jaacä odoocojaato eetö que yä’madaaca’ña’como, ñanno chu’taajä ya’deme’nnamo. Yaawä ñäädä odoocojaato cönaatajoijoi chäwwäiñe, cawaayu tajääde’dato de’wä cönä’ja’dö wwäiñe. Ecammajä’nei chäänöngemjönö mmaja cönaatajoijoi chea. A’nädäncädä nudäädä cönäätämaajoicho jiyooto comootödö ña. Iiña wedeinchä nengaato’de, acuudajaada dhatu’jödö jodö joqque.

²¹ Tameedä shootoichomo’jödö cönä’jajoicho yaawä cawaayu tajääde’dato de’wono saudai canaadöje, yää inchaiño weja’cadö canaadöje. Tameedä tadiiñaamo cönwensu’tajäätöicho yaawä chääjäcuincheiñe.