APOOCADIISI 18 - Wanaadi A'deddu

Waawidooniya ñano wataame’jödö

¹ Yääje mma yaawä anejja amoode daja weneeaquennea, caju ñanno yä’tädö; jooje ijäädudu cönä’jaacä. Nono cönweijaacä tönnataadö que.

² Jäduuje cöncä’töngacä; cönä’döaacä: —Nataamei; Waawidooniya ñano tacaadato nataamei. Odo’shancomo weicho’comooje na eduuwa, canaimä weicho’comooje mmaja, tadiiñaamo töwöödöjööca’como weicho’comooje mmaja, ñanno conemjöncomo.

³ Tameedä sotoocomo ñeejodöödö que cönä’dacuicho, yää chääjedöödö eccudu. Yää cönä’jaacä imaasuduichadö cu’tädö. Edä nono de’woncomo cajiichaanacoomo chääjadä cömmasuuduichaicho. Edä nono de’woncomo töwäätätöijaamo cöninshomaatajäätöicho iiñödö joojato que; quee cönä’döaacä ñäädä amoode jäduujato.

⁴ Yaawä anejja a’deu daja caju ña wetaaquennea. Edääje cönäätaacä: —Waawidooniya ñanno adheeja’catääcä änwanno sootoi, choone’nadiiyö nönge mma männöto’no, mätä’maminchajooto’node chääjadä.

⁵ Choone’nadiiyö we’jummaajä jooje na eduuwa, caju tajoojoone. Eduuwa Wanaadi nichö’tamme’ca choone’nadiiyö jäcä.

⁶ Äwwäiñe inchu’jödö nönge mmaja chäwwä änu’täcä; aacäde ejeematääcä iiñö’jödö. Anejjacoomo wocöödö töneejodööe cönä’ja’dö ’cäwa’cä mmaja yoocödö aneejodöötäcä, ijeene’cä jeene.

⁷ O’jodhe tötö’tajä’e yei’jödö wa’coto mmaja, yä’wa’demeecö’jödö wa’coto mmaja, yäätä’maminchatoojo änu’täcä chäwwä, yaamotoojo mmaja. Edääje töwö chö’tajäätödö: “Öwö ñäädä cajiichaana wataajimaajä. Iiño wääma’jödööjönö öwö; yeetunu eneejai’cha wa;” quee chö’tajäätödö.

⁸ Yääje yeijäcä yää anooto awä dea conemjönö iiñetuncatoojo ne’ducca’de chääjäcä, wäämanä mmaja, waamonä mmaja, ämi mmaja. Töwö nä’dhau’cwaja’de wa’to que, jäduujatoone yeiyajä ñäädä imaaminchanei, Cajiichaana Wanaadi; quee a’deu cönäätaacä öwwä.

⁹ Yaawä ñanno edä nono de’woncomo cajiichaanacoomo cone’da nä’döjaato’de, ñanno ñäädä wodi jadä cömmasuuduichaichodö, chääjadä töwä’wa’deme’que cönä’ja’todö mmaja. Tönwanno ijunnei naamoaato’de, yäätuca’jödö wedeimödö eneea’jäcä.

¹⁰ Tönwanno tösaadöcomje amoinchenno yäätä’maminchajoodö nene’maato’de. Edääje nä’döaato’de: —Wentumje ma eduuwa Waawidooniya ñano, jata tacaadato’jödö, jäduuja’como jataadöcoomo’jödö. Jadheedä nä’döi äwäätä’maminchajootojo; quee nä’döaato’de ñanno cajiichaanacoomo.

¹¹ Nono de’woncomo töwäätätöijaamo mmaja cone’da nä’döjaato’dede yaawä; ijunnei naamoaato’de töwwäiñe aneejema’da yeichomjäcä.

¹² Yää täjeemaamö, oodo, jödaata mmaja, yaamante mmaja, mayuudu mmaja, camiisha tajääde’dato mmaja, jiyeichä eccuduujato mmaja, seedha döaajä mmaja, seweichato mmaja, tameedä dee töjoocato mmaja, tameedä odoocojaato detai döjä’ajä mmaja, tameedä dee täjeeto döjä’ajä mmaja, coowede mmaja, sejaadadi mmaja, täju täjeeto mmaja,

¹³ äwanshi cadoodö mmaja, jomi mmaja, juu shimi’jotoojo tödhau’cwaamö mmaja, adhaawa mmaja, cujeedi catö mmaja, chääjedöödö eccudu mmaja, chaatö mmaja, äiña mmaja, äiña ajooajä aashichaato mmaja, jaaca mmaja, oweeja mmaja, cawaayu mmaja, tadaada mmaja, soto mmaja, ñanno jedeesoja’como.

¹⁴ Edääje nä’döaato’de yaawä ñanno edä nono de’woncomo töwäätätöijaamo: —Chääjedöödö anaamedö ’je’da na eduuwa, yää awaacö’je cönä’ja’dö. Äwanshi caadono ’je’da mmaja; iiñataaje aweichojo ’je’da mmaja. Nossaje’da aweichojo mmaja nataamei chea, tönsomaaque aweichojo mmaja; aneene’da ma’de eduuwa, yeichöödäje; quee nä’döaato’de.

¹⁵ Ñanno yää jäcä töwäätätöijaamo’jödö, chääje’jödö que cöninshomaataichodö, tösaadöcomje amoinchenno yäätä’maminchajoodö nene’maato’de. Tönwanno cone’da naato’de; töwaamoancädäiñe

¹⁶ edääje nä’döaato’de: —Wentumje nai eduuwa yää jata tacaadato’jödö. Iiñataaje cönä’jaacä töwö, wodi camiisha tajääde’dato döaajä wewontaajä awä töweiye naichö wa’cä, jiyeichä eccuduujato awä mmaja, seweichato awä mmaja, oodo que yensoma’taajä wa’cä mmaja, yaamante ’jano mmaja, tömaayuduichato mmaja.

¹⁷ Jadheedä nataamei tameedä mädä mösooma; quee nä’döaato’de ñanno töwäätätöijaamö’jödö. Tameedä ñanno jidaawa edhaamo, na’cwainchomo waademaadö mmaja, cudiiyada e’se’tännamo mmaja, tameedä jidaawa awoncomo wetaadawa’cajoodö mmaja, amoinchenno cöneene’ma’to.

¹⁸ Tönwanno cönaamoa’to yaatuca’jödö wedeimödö eneedö’jo. Edääje cönä’döa’to: —¿Äsha mädä ’jeje mädä wa’coto jata tacaade nai’chede? quee cönä’döa’to.

¹⁹ Jooje cone’da cönä’ja’to. Töwaamoancädäiñe nono wedennäjaato cönnöicho tuju’jocoomo de’wä, wentumje töweichöcoomo ene’ju’tojooje. Töcä’de cöna’deuwa’to; cönä’döa’to: —Wentumje nai eduuwa yää jata tacaadato’jödö. Yäätä tameedä jidaawa edhaamo cöninshomaataicho jata nsomaadö que, ñanno dama ’cwainchomo waademaadö. Jadheedä mma tameedä mädä necoone’mai; quee cönä’döa’to.

²⁰ Yaatame’jödö weijäcä adha’cwainchatääcä änwanno caju ñancomo, änwanno mmaja Wanaadi sotoi, anonta’como’jödö mmaja, Wanaadi wa’deuwödö ecammannamo’jödö mmaja. Ta’cwaiñe eichäcä Wanaadi wwä ojo’to’jocoomo weijäcä chääjäcä.

²¹ Yaawä amoode jäduujato täju adai’joto cönannäjöi, aco nöngato. Na’cwaca cöneemai yaawä; cönä’döaacä: —Mädääje mmaja Waawidooniya ñano nätäämaja’de, yää jata tacaadato; ätäädantäjo’da na’de yaawä yeichöje.

²² Yäätä ääta’da na’de jantuuda yeu’cwadö, shiwo etöödö mmaja, jiichu etöödö mmaja; janau’cwa etöödö mmaja ääta’da na’dede. Mösooma amoode’nänei ’je’da mmaja na’dede; cödheede töcöödö ääta’da na’dede yeichöje.

²³ Adhaawa niweijodö ääne’da na’de yäätä. Jötaanä tödöödawä töshiiye weiñä weneenedö ääta’da mmaja na’dede yeichöödäje. Yäätoncomo töwäätätöijaamo tacaadeiñe cönä’ja’to, anejjacoomo nono de’woncomo e’jodheiñe. Tameedä soto cönäätäncu’tojoicho ä’waichö que; quee cönä’döaacä ñäädä amoode.

²⁴ Yää Waawidooniya ñano jata cönäätä’maminchajoi Wanaadi wa’deuwödö ecammannamo’jödö töjaajo’jocoomo jo’tädööje, anejjacoomo Wanaadi sotoi mmaja, tameedä nono de’woncomo töjaajo’jocoomo jo’tädööje mmaja.