APOOCADIISI 17 - Wanaadi A'deddu

Wodi masuuduijato wääma’jödö

¹ Yaawä tooni amoode cöneejä öwwadäädä, ñanno aacä amoojato’como amoode jimmä, aacä amoojato cancudu dha’me cönä’ja’todö. Töwö cöna’deuwacä öwwä; cönä’döaacä: —Ä’cäde, äwwä weneejoiye wodi masuuduijato wätä’maminchajootojo, ñäädä tacaadato, jooje tunaacomo de’wä shuucu naadö.

² Ñäädä jadä edä nono de’woncomo cajiichaanacoomo cömmasuuduichaicho. Edä nono de’woncomo soto cönä’dacuicho chääjedöödö eccudu inchudu que, yää imaasuduichadö cu’tädö; quee cönä’döaacä ñäädä amoode öwwä.

³ Yaawä Epíiditu Santo wwä yää eneejodaawä öwwä, ñäädä amoode yaadäne yaawä jata ’jemjönö aca. Iiña wodi weneeaqueene, shuucu, odoocojaato seweichato de’wä. Ñäädä odoocojaato jäcä imennaajä cönä’jaacä jooje chäätö, conemjönö dea, Wanaadi wa’cä yäätä’taajä. Ñäädä odoocojaato ju’jä cönä’jaacä aacä amoojato, yeetai mmaane amoojadä.

⁴ Ñäädä wodi cönä’jaacä jiyeichä eccuduujato awä, seweichato awä mmaja. Töwö töwensoma’tä cönä’jaacä oodo que, yaamante que mmaja, mayuudu que mmaja. Chänwawä cönä’jaacä cancudu, oodo döaajä. Yää cancudu tu’que cönä’jaacä, choone’nadiiyö cu’tädööje, imaasuduichadö cu’tädööje mmaja.

⁵ Ijaawä chäätö imennaajä cönä’jaacä, owaanojöönö. Edääje cönä’jaacä: “Waawidooniya ñano tacaadato, masuuduija’como dhenö, tameedä nono de’wono conemjönö edhaajä;” quee chäätö cönä’jaacä.

⁶ Töwä’dau’cwe weneeaqueene ñäädä wodi, Wanaadi sotoi aquiiyö que, Jesuuquidiito jäcäinchädo’como wä’jajo’jocoomo aquiiyö que mmaja. Eneedö’jo töwääcatonca mma wääcatoncane.

⁷ Yaawä ñäädä amoode cönä’döaacä öwwä: —¿Ane’que’nei määcatoncannea? Ecammajai chajaane wa äwwä yää owaanojöönö ñäädä wodi jäcä, odoocojaato jäcä mmaja, wodi ye’wä naadö, ñäädä aacä amoojato iju’jä naadö, amoojadä yeetai ñaadö mmaja.

⁸ Ñäädä odoocojaato meneeannö jenaadä cönä’jaacä; eduuwa mmaane ei’cha na. Töwö neja’ca’de ya’tadö inwadö ’jemjönö acanno, töwännanö’emööje mma. Ñäädä eneedö’jo nono de’woncomo nääcatoncaato’de, ñanno weichojo jajeedai’chädö jäcä chäätö ’jemjöncomo edä nono tödö’jödö jonnoto’jödöödä. Ñäädä odoocojaato jenaadä töwei’jödö weichaame eduuwa ei’cha na; yaawääne, äcuude töweiyemööje dea na.

⁹ “Ñäädä töseedujä’nato edä chö’tamme’jai ña: Yää aacä amoojato odoocojaato ju’jä meneeannö aacä amoojato jöö yeichö cu’tädööje na, wodi ye’wä naadö.

¹⁰ Yää aacä amoojato iju’jä na dea aacä amoojato cajiichaana weichöcoomo cu’tädööje mmaja. Ijaatoodea ñanno cajiichaana töwä’ja’e naato; tooni ña eduuwa. Tooni ei’cha dea na. A’dhe töweiyemööje mma na’de ñäädä.

¹¹ Ñäädä odoocojaato jenaadä cönä’ja’dö, eduuwa ei’cha naadö, ñäädä ñäädä aaduwaawä amoojatooto cajiichaanaje töweiyemö. Ñanno aacä amoojato’como jimmä dea töwö, töwännanö’emööje töwö yeichojo.

¹² “Yää amoojadä yeetai meneeannö amoojadä cajiichaana weicho’como cu’tädööje nä’jaanä. Eduuwa cajiichaanaje’da dea naato. Äcuude chäwwäiñe nä’tua’de odoocojaato jadä cajiichaanaje yeicho’como, a’dhe mma, tooni shii wääseca’jödö mma.

¹³ Tooni mma chö’tajäätödööcomo na’de ñanno cajiichaanacoomo. Tönwanno nä’tuaato’de odoocojaato wwä, shootoije töweichöcoomo wetä; tösootoichomo mmaja nu’aato’de chäwwä, shootoije.

¹⁴ Tönwanno newäänä’taato’de Oweeja nnedö’cä jadä. Töwö Oweeja nnedö’cä ne’jodheinchaato’de, cajiichaanacoomo Cajiichaanaichomooje töweijäcä, ädhaamo Edhaajotoncomooje töweijäcä mmaja. A’dejja’como ñanno Oweeja nnedö’cä jadoncomo, Wanaadi neichö mmaja, chäänönga’como mmaja; quee cönä’döaacä amoode öwwä.

¹⁵ Edääje mmaja cönä’döa’dea öwwä: —Yää tuna meneeannö, ye’wä wodi masuuduijato wataajimaajä nä’jannö, jooje soto weichöcoomo cu’tädööje nä’jaanä, jooje soto aata’deucwemjöncomo, ñanno nono weichö wa’concomo, tameedä jata waadoinchomo.

¹⁶ Ñanno cajiichaanacoomo, amoojadä odoocojaato detai meneeannö chu’tädööcomooje nä’jannö, nichu’de’taato’de ñäädä wodi masuuduijato. Tönwanno nimaaminchaato’de; niyoncaato’de yaawä tänäädö wetä töwwäiñe. Wa’to que niyau’cwaato’de.

¹⁷ Wanaadi yääje nichö’tamme’jaato’de tumjummadö woije tödöödö wetä chäwwäiñe. Yääje yeijäcä yää dea chö’tajäätödööcomo na’de. Tönwanno nä’tuaato’de odoocojaato wwä Wanaadi a’deddu weja’dätäädö wa’cä; tösootoichomo mmaja odoocojaato wwä nu’aato’de, shootoije.

¹⁸ Ñäädä wodi meneeannö, jata tacaadato cu’tädööje na, ñäädä nono de’woncomo cajiichaanaichomo edhaajä; quee cönä’döaacä amoode öwwä.