APOOCADIISI 16 - Wanaadi A'deddu

Cancudu wei’jödö, yää Wanaadi wwä wätä’maminchajoonä cu’tädö

¹ Yaawä Wanaadi weichojo taca a’deu wetaaquene; jooje cönäätaacä. Edääje cönäätäcammaacä ñanno aacä amoojato’como amoode wwäiñe: —Ojoncomo; cancudu aca naadö i’chontantäcä nono de’cäi, yää Wanaadi wwä tumjunne’da wätä’maminchajoonä cu’tädö; quee cönäätäcammaacä.

² Yaawä awa’deeto amoode cöntämä; töcancudui acaano cöni’chomoi nono de’cäi. Soto cuncunnujäätöicho yaawä, tameedä ñanno odoocojaato nimaadaca’ño’jocoomo, ñanno chu’taajä ya’deme’nnamo dea. Töcääque cönä’jaacä chunnujäätödööcomo, se’ne jooje.

³ Yaawä yää ’jejaato amoode töcancudui acaano cöni’chomoi dama de’cäcä. Yää cönaamodeetai yaawä munuuje, äqueejö aquiiyö nönge. Tameedä na’cwacancomo cönä’jajoicho yaawä.

⁴ Yaawä aaduwaawoto amoode töcancudui acaano cöni’chomoi tunaacomo de’cäcä, tuna juduucomo de’cäcä mmaja. Yää tuna cönaamodeetajäätöi yaawä munuuje.

⁵ Wetaaquene yaawä amoode wa’deuwödö, ñäädä tuna edhaajä. Edääje cönä’döaacä: —Chäänöngato amäädä Wanaadi, Cajiichaana aashichaato. Chäänönge soto mimaaminchaato, amäädä eduuwa maadö, jenaadä mä’jaaquennö dea.

⁶ Tönwanno osootoi cömjajoicho, adha’deddu ecammajä’nnamo mmaja. Yääje yeijäcä munu mmaja chäwwäiñe memjoi eduuwa. Chäänönge mejeemaicho; quee cönä’döaacä ñäädä amoode.

⁷ Yaawä saaquidiijiisiyo dötoojo dö’tä anejja a’deu daja wetaaquene. Edääje cönäätaacä: —Chäänöngato dämma amäädä, Cajiichaana, Wanaadi jäduujato. Chäänönge soto mimaaminchaato; quee cönäätaacä.

⁸ Yaawä aacäicheeato amoode töcancudui acaano cöni’chomoi shii de’wä. Shii wwä cönä’tui yaawä soto yau’cwato’como wa’to que.

⁹ Soto cöiñatuujätöicho yaawä ta’nato joojato que. Yääje yeichaame tötö’tajäätödööcomo änsa’dumincha’da cöneiya’to. Tönwanno Wanaadi o’jodhaatoje ane’tä’da cöneiya’to, ñäädä yää wätä’maminchanä edhaajä. Cone’da mma cöna’deuwöicho chääjäcä.

¹⁰ Yaawä ijaatoodeaato amoode töcancudui acaano cöni’chomoi odoocojaato mudei de’cäcä. Odoocojaato sotoi jäcäiñe cöntööjamöi yaawä. Soto tunuuducoomo töneecajä’e cönä’ja’to yaawä, se’neiñe töweijäcäiñe.

¹¹ Yääje yeichaame tötö’tajäätödööcomo änsa’dumincha’da dea cöneiya’to tönnödööcomo e’nomjadö wetä. Tönwanno Wanaadi caju ñano jäcä cone’da cöna’deuwöicho töwwäiñe se’nato dhetuncadö e’nei, tucunnujäätödööcomo e’nei mmaja.

¹² Yaawä tooni amoojatooto amoode töcancudui acaano cöni’chomoi Eujadaate de’cäcä. Yää tuna cönsede’tai yaawä, ääma ’je yeichö wetä, shii weja’catoojo ñancomo cajiichaanacoomo we’do’to’comooje.

¹³ Yaawä weneeaquento aaduwaawä conemjöncomo weja’cadööcomo. Tönwanno cöneeja’caicho caimaana ntaiño, odoocojaato ntaiño mmaja, ecammajä’nei chäänöngemjönö ntaiño mmaja. Ñanno conemjöncomo codoocodo nöngeiñe cönä’ja’to.

¹⁴ Ñanno cönä’ja’to odo’shancomo. Tönwanno ene’ju’tojo tönnöe cönä’ja’to. Cajiichaanacoomo wwadäädä cöntonto tameedä nono weichö wa’cä, i’jummaiñe, töweewänä’tädööcomo wetä Wanaadi jäduujato nichu’nä’tä’jödö anootoi’chädö awä.

¹⁵ “Etaatäcä’ma; öwö weejödö na’de ätö’tajäätödööcomo ’nawä, tämeenato weejödö töweiye naichöje. Ta’cwaiñe eijai ña ñäädä towoinchadämjönö, ñäädä töwonconaato, töwonque’da’da yeichö wetä yaawä, töjöiye yeichö queiñe.”

¹⁶ Ñanno odo’shancomo cajiichaanacoomo cöni’jummaicho. Yää ye’jumma’jocoomo dö’tä eewedeeo töne’tä weneeneto Aadamaajedón ñanooje.

¹⁷ Yaawä aacä amoojatooto amoode töcancudui acaano cöni’chomoi jejeichä ai. Yaawä a’deu cönäätaacä mude dö’tä, yää Wanaadi weichojo caju ñano taca cönä’ja’dö. Jooje cönäätaacä; cönä’döaacä: —Tödööe na; quee.

¹⁸ Yaawä cönäncucui; cadeemedu cönäätai chea; cöneetötöömai chea. Nono cönäätu’mei yaawä; yää wa’coto a’que cönä’jaacä jenaadä, soto tödö’jödö jonnoto’jödöödä edä nono de’wä.

¹⁹ Yaawä yää jata tacaadato cöneedatoocai; aaduwaawä yeedatoocaajä cönä’jaacä. Anejja jata mmaja cöne’ducaajätöi chea. Wanaadi cöntö’tai yaawä Waawidooniya ñano jata jäcä, yää tacaadato. Chäwwä cönemjoi chääjedöödö eccudu, yää töwwä yäätä’maminchajootojo cu’tädö.

²⁰ Tameedä dhantadö cönännanö’jätöi yaawä, tameedä jöö mmaja.

²¹ Yaawä caju ñanno i’chajö adai’jocoomo cönä’mei soto de’cäcäiñe. Tamiiñeiñe cönä’jaacä, aaduwaawä saacuto jiyooto ’cäwa’cä. Wanaadi jäcä cone’da soto cöna’deuwöicho yaawä i’chajö que tömaaminchadööcomo e’nei, jooje cone’da yeijäcä.