APOOCADIISI 15 - Wanaadi A'deddu

Aacä amoojatooto wätä’maminchanä edhaamo wei’jocoomo

¹ Anejja ene’ju’tojo daja weneeaqueene yaawä caju ña, adai’joto; tönoiñe cönä’jaacä jooje. Aacä amoojato amoode weneeaquento, wätä’maminchanä edhaamo. Yää wätä’maminchanä cönä’jaacä conemjönö jäcä cone’da Wanaadi weichö eneejodö wä’cadööje.

² Yaawä dama nöngato weneeaqueene; ta’dawaane cönääneaacä, jeteiya aca wa’to wäänedö töweiye naichöje. Weneeaquento dea ñanno odoocojaato e’jodheinchannamo’jödö, odoocojaato cu’taajä e’jodheinchannamo’jödö mmaja, ñanno chäätö me’cudu e’jodheinchannamo’jödö mmaja. Jiidi cönä’ja’to dama ta’dawaanato jawä. Jantuuda dha’me cönä’ja’to, Wanaadi nutuudu.

³ Tönwanno cöneecanta’ña’to Oweeja nnedö’cä wecanta’ñotoojo jäcä, Moisé wecanta’ñotoojo jäcä mmaja, ñäädä Wanaadi anoonö. Edääje cöneecanta’ña’to: Adai’joto tönnöe määnene, tönoiñato mmaja, amäädä Cajiichaana Wanaadi jäduujato. Chäänönge töweiye määnene amäädä, aashicha mmaja, amäädä soto cajiichaanaichomo.

⁴ ¿Änääcö onontä’da eichöde’, amäädä Cajiichaana? ¿Änääcö o’jodhaatoje adhe’tä’da eichöde’? ñäädä mmaane aweiyajä aashichaato. Tameedä sotoocomo ne’aato’de äwwadäädä; awa’deme’caato’de, chäänönge aweichö tacaade yeijäcä; quee soto cöneecanta’ña’to.

⁵ Yääje mma yaawä weneeaqueene Wanaadi weichojo wata’ducaadö caju ña, yää Wanaadi necamma’jödö imennaajä ewöötö.

⁶ Wanaadi weichojo tacanno cöneeja’caicho yaawä aacä amoojato amoode, ñanno aacä amoojato wätä’maminchatoojo edhaamo. Camiisha aashichaato döaajä awä cönä’ja’to, weijotä yoomöcoomo. Tö’do’cäcäiñe yä’möaajä cönä’jaacä oodo döaajä que.

⁷ Yaawä ñanno aacäicheea’como amoode’na’como jimmä cuntui aacä amoojato’como amoode wwäiñe aacä amoojato cancudu, oodo döaajä, tooni chääwaadäiñe. Yää cancudu acaano cönä’jaacä Wanaadi Yeichöödoto wwä tumjunne’da wätä’maminchajoonä cu’tädö.

⁸ Wanaadi weichojo cuntu’camöi yaawä wedeinchä que, yää Wanaadi o’jodhaatoje yeichö cu’tädö, jäduuje yeichö cu’tädö mmaja. Chaaca womonto’me’da cönä’jaacä yaawä, yää wätä’maminchatoojo wataamedö wa’cä, yää chäädhaamoje ñanno aacä amoojato’como amoode cönä’ja’todö.