APOOCADIISI 14 - Wanaadi A'deddu

144 miide soto wecanta’ño’jocoomo

¹ Yää ’jeje wene’maaquene yaawä; weneeaqueene Oweeja nnedö’cä, jiidi, Siyon ’jödö de’wä. Chääjadä cönä’ja’to shootoi, 144 miide. Oweeja nnedö’cä eetö tömennä cönä’jaacä ijaawäiñe, Yuumö eetö mmaja.

² Yaawä caju ña wecanta’ñänä wetaaquene; shoodö wa’cä cönäätaacä, yeetötöömadö wa’cä mmaja. Jantuuda yeu’cwadö nönge cönääta’dea.

³ Wecanta’ñotoojo eduuwaato jäcä cöneecanta’ña’to mude je’taca, ñanno aacäicheea’como amoode’na’como je’tacaiñe mmaja, inchoncomo je’tacaiñe mmaja. Anejja oowanoomajai’cha cönä’jaacä yää wecanta’ñotoojo jäcä; ñanno 144 miide mmaane, ñanno nono de’woncomo antawonnoiñe yääwanaaca’como.

⁴ Ñanno naato masuuduijemjöncomo’jödö, wodi jadä eijöncomo’jödö. Tönwanno nötaato Oweeja nnedö’cä jadä, iichotoojo waadäi. Yääwanaaca’como tönwanno soto antawonnoiñe, awa’deena’como Wanaadi sotoije eiya’como, Oweeja nnedö’cä sotoije eiya’como mmaja.

⁵ Ätäncu’täjä’jöncomo tönwanno, conemjönö ’jemjöncomo mmaja Wanaadi owaadäädä, ñäädä mude de’wono.

Aaduwaawo’como amoode necamma’jocoomo

⁶ Weneeaqueene yaawä anejja amoode waiñömöödö caju dacääcä. Yeichöödoto aashichaato wätunnä dha’me cönä’jaacä nono de’woncomo wwäiñe täcammajä’emö, tameedä soto weichöcoomo wwäiñe täcammajä’emö, ñanno tameedä nono weichö de’woncomo, aata’deucwemjöncomo, tameedä jata waadoinchomo.

⁷ Ñäädä amoode töcä’de cöna’deuwacä; cönä’döaacä: —Wanaadi ñontätääcä; o’jodhaatoje e’tätääcä. Soto emmencato’como cu’nädö mädä eduuwa chäwwä. Ya’deme’täcä ñäädä caju tödöönei’jödö, nono mmaja, dama mmaja, tuna juduucomo dönei’jödö mmaja; quee cönä’döaacä ñäädä amoode.

⁸ Anejja amoode daja inchäcä cönta’dea; cönä’döaacä: —Nataamei, Waawidooniya ñano nataamei, yää jata tacaadato. Töwö tameedä soto wä’dacuuducoomo wetä chäwwäiñe tönemjo cönä’jaacä töneejodöödö chääjedöödö eccudu, yää jooje imaasuduichadö cu’tädö; quee cönä’döaacä ñäädä amoode.

⁹ Yaawä aaduwaawoto amoode cöntaacä inchäcäiñe. Töcä’de cöna’deuwacä; cönä’döaacä: —Anejja wwä odoocojaato ya’deme’ca’jäcä, chu’taajä mmaja ya’deme’ca’jäcä, chäwwä töjaawä yä’madaaca’ñäja’jäcä mmaja, tamäädö jäcä jeiñe mma,

¹⁰ ñäädä chääjedöödö eccudu nenga’de yaawä, yää Wanaadi nejoodödö ijeenato, cancudu aca accaajä, yää tumjunne’da Wanaadi wwä wätä’maminchajoonä cu’tädö. Ñäädä odoocojaato ya’deme’nei’jödö nätä’maminchaja’de wa’to nwaca, jiyooto comootödö ña, Wanaadi amoodedö neneedöcoomoje, Oweeja nnedö’cä neneedöje mmaja. Iiña wedeinchä nengaato’de, acuudajaada dhatu’jödö jodö joqque.

¹¹ Yeichöödäje wedeinchä näänea’de, yää yäätä’maminchajooto’como wedeimödö. Ñanno odoocojaato ya’deme’nnamo’jödö, odoocojaato cu’taajä ya’deme’nnamo’jödö mmaja, yäädeetato’como ’je’da na’de yeichöje, ano, coijai’jödöödä, tameedä ñanno odoocojaato eetö que yä’madaaca’ñäja’como’jödö.

¹² Yääje yeijäcä ecamjödööje dea Wanaadi sotoi eijai ñaato, aashicha tönshinchä mmaja, tameedä ñanno Wanaadi waanontädö tödönnamo, Jesuuquidiito ecaanö’nnamo dea; quee cönä’döaacä ñäädä aaduwaawoto amoode.

¹³ Yaawä a’deu wetaaquene caju ña. Edääje cönäätaacä: —Edääje imennäcä: “Ta’cwaiñe eijai ñaato ñanno eduuwa naadö jonno Cajiichaana ecaanö’nnamo wä’jajoodöcoomo;” quee imennäcä; que a’deu cönäätaacä öwwä caju ña. Edääje Epíiditu Santo cöneccujä’acä yaawä: —Yääje dämma na; ñanno Cajiichaana ecaanö’nnamo wä’jajoodöcoomo näädeetaato’de tötaadawaajuichomo tödö’jödö jonno. Tönwanno neneeaato’de tönnö’jocoomo; quee.

Nono de’wono acäätä’jödö

¹⁴ Weneeaqueene yaawä ca’dutu tajääde’dato; yää ca’dutu de’wä cönä’jaacä soto nnedö nöngato, shuucu. Iju’jä de’wä cönä’jaacä canaanadi, oodo döaajä. Chänwawä cönä’jaacä cömö dhejiiyajä, aco’tojo.

¹⁵ Yaawä Wanaadi weichojo tacanno anejja amoode daja cöneeja’cai. Jäduuje cöncä’töngacä ñäädä ca’dutu de’wä shuucu cönä’ja’dö wwä; cönä’döaacä: —Acöömöi che acä’cä eduuwa, aco’tojo cu’nädö aca yä’döeetö’da. Tuyu’tajä’e na eduuwa nono de’wono; quee cönä’döaacä.

¹⁶ Yaawä ñäädä ca’dutu de’wä shuucu cönä’ja’dö nono de’wono cönaacätäi töcöömöiche. Yää nono de’wono cönaatacäätäi yaawä.

¹⁷ Yaawä Wanaadi weichojo caju ñano tacanno anejja amoode daja cöneeja’cai chea, cömö dhejiiyajä dha’me mmaja.

¹⁸ Anejja amoode cöneeja’cai yaawä saaquidiijiisiyo dötoojo dö’tonno; wa’to edhaajä cönä’jaacä ñäädä. Jäduuje cöncä’töngacä ñäädä cömö dhejiiyajä dha’me cönä’ja’dö wwä; cönä’döaacä: —Acöömöi dhejiiyajä que acä’cä chääjedöödö nono de’wono, töwau’cwange naadö; quee cönä’döaacä.

¹⁹ Yaawä ñäädä amoode töcöömöi che cönaacätäi chääjedöödö nono de’wono. Chääjedöödö cönnöi yaawä eccucaatojo aca, yää tumjunne’da Wanaadi wwä wätä’maminchajoonä cu’tädö.

²⁰ Yää chääjedöödö cöneccucaicho yaawä jata tö’wä. Eccucaatojo o’cäcä munu cöneeja’caacä jooje. Yää munu cuncunnäjöi yaawä cawaayu suda’wajai. Jö’wacaadä munuuje cönääneaacä yaawä amoinche; amoojadä anooto wötäänä ’cäwa’cä cönä’jaacä amoinche yeichö.