APOOCADIISI 13 - Wanaadi A'deddu

Aaco’como odoocoja’como wei’jocoomo

¹ Yääje mma yaawä sa’dada de’wä wä’jaaquene yaawä, jiidi, dama jawä. Dama ’cwacanno odoocojaato wäncudu weneeaqueene yaawä. Aacä amoojato iju’jä cönä’jaacä, yeetai mmaane amoojadä. Yeetai waadäi cönä’jaacä canaanadi. Iju’jä jäcä chäätö imennaajä cönä’jaacä, Wanaadi wa’cä mmaja yäätä’taajä.

² Ñäädä odoocojaato weneeaqueene mado nönge, jadeemu ’judu nönge i’judu, inchadö mmaane cawaadiimä ntadö nönge. Chäwwä caimaana nutuudu cönä’jaacä ijäädudu, imuudei mmaja, cajiichaanaje yeichojo mmaja.

³ Tooni iju’jä weneeaqueene töwäätunui’chä. Yäämatoojoje eijaicho wa’cä cöntö’taacä yää yäätunui’chä’jödö; töwäädä töwe’jöeene’ cönä’ja’ne’. Ñäädä odoocojaato ncäcä cönta’to nono de’woncomo, töwääcatonca.

⁴ Ñanno soto caimaana cönwa’deme’ca’to yaawä, ñäädä odoocojaato cajiichaanaje yeichojo utu’jödö weijäcä chäwwä. Odoocojaato mmaja cönwa’deme’ca’to dea ñanno soto. Edääje cönä’döa’to: —¿Änääcö mmaja määdhä odoocojaato wa’cä eichöde’? ¿Änääcö ane’jodheinchadööde’? quee cönä’döa’to.

⁵ Odoocojaato wwä u’ajä cönä’jaacä cone’da ya’deutojo, Wanaadi wa’cä yäätä’totoojo mmaja. Cajiichaanaje yeichojo u’ajä cönä’jaacä aacä sotooto de’wä aacä nuunä.

⁶ Ñäädä odoocojaato cone’da cöna’deuwöi yaawä Wanaadi jäcä, Wanaadi weichojo ämääajä jäcä mmaja, caju ñancomo jäcä mmaja.

⁷ Chäwwä u’ajä cönä’jaacä Wanaadi sotoi jadäiñe yeewänä’totoojo, e’jodheinchato’como mmaja. Chäwwä u’ajä cönä’ja’dea tameedä soto weichöcoomo cajiichaanaichomooje yeichojo, ñanno tameedä jata waadoinchomo, aata’deucwemjöncomo mmaja, tameedä nono weichö waadoinchomo.

⁸ Tameedä nono de’woncomo ñäädä odoocojaato cönwa’deme’ca’to, tameedä ñanno edä nono tödö’jödö jonnoto’jödöödä weichojo jajeedai’chädö jäcä chäätöcoomo ’je’da naadö. Yää weichojo jajeedai’chädö edhaajäje na ñäädä Oweeja nnedö’cä, cönäätämaajoichö.

⁹ Eta’sato neta’ñojo.

¹⁰ Ñäädä jedeesoje soto tödöönei jedeesoje mmaja nä’döja’de; ñäädä sauda que soto emaanei sauda canaadöje mmaja nääma’de. Yääje yeijäcä ecamjödööje dea Wanaadi sotoi eijai ñaato, aashicha tönshinchä mmaja.

¹¹ Yää ’jeje yaawä weneeaqueene anejja odoocojaato daja, nono acanno yeeja’cadö. Aacä yeetai cönä’jaacä, oweeja nnedö’cä detai töweiye naichöje. Dha’deddu mmaane cönä’jaacä caimaana a’deddu nönge.

¹² Töwö jäduuje cönä’jaacä täneemö tödöödö jäcä, awa’deeto odoocojaato neneedöje, chä’cäwa’cä mmaja. Töwö awa’deeto odoocojaato niya’deme’ja’de nono de’woncomo wwä, ñäädä töwäämatoojojaato’jödö yäätunui’chä’jödö töwe’jöe cönä’ja’dö.

¹³ Töwö adai’jä ene’ju’tojo cönnöaacä, caju ñanno wa’to tönne’jo’jödöödä nono de’cäi, soto neneedöcoomoje.

¹⁴ Töwö odoocojaato nono de’woncomo cönencu’toicho täneemö tönnödö que. Chäwwäiñe cönnöjoi awa’deeto odoocojaato cu’taajä. Chäwwä yääje soto tödööto’como u’ajä cönä’jaacä awa’d eto odoocojaato neneedöje, ñäädä sauda que töwäätunui’chä’jödö weichaame cönaadoincaichö.

¹⁵ Ñäädä odoocojaato wwä u’ajä cönä’jaacä awa’deeto odoocojaato cu’taajä nudä tödöötojo, a’deudeme’jotoojo mmaja, änwa’deme’jöncomo töja’to’como mmaja.

¹⁶ Töwö tameedä soto cömmadaaca’ñojoicho dhamäädöcoomo ämu’demjönö jäcä, ijaawäiñe jeiñe mma, ñanno täneejuca’como mmaja, soto mmädä mmaja, tönsomaaca’como mmaja, tönsomaaquemjöncomo mmaja, tädhaajäquemjöncomo mmaja, tädhaajäca’como mmaja, tameedä yeichöcoomo wa’cä.

¹⁷ Ñanno tömaadaca’ñäjöncomo etöijäjai’cha cönä’ja’to yaawä, ñanno odoocojaato eetö imennaajä ’jemjöncomo, chäätö me’cudu imennaajä ’jemjöncomo mmaja.

¹⁸ Edä yää tötö’tamme’quemö; ñäädä töseedujä’nato nichö’tammecö’ñojo odoocojaato eetö me’cudu. Soto me’cuduuje na, 666, quee.