APOOCADIISI 12 - Wanaadi A'deddu

Caimaana wwä wodi tu’de’tä’jödö

¹ Yaawä ene’ju’tojo adai’joto cönääneaacä caju ña; wodi cönä’jaacä, shii töwoomöje, nuunä i’judu o’nä. Iju’jä de’wä cönä’jaacä canaanadi, amoojadooto de’wä aacä shidiichä chääjäcä.

² Töwensu’de ñäädä wodi cönä’jaacä. Tönnedö cöiñe’maacä. Cöneecadaujä’acä tönnedö dhe’numuudu e’nei.

³ Anejja ene’ju’tojo cönäänea’dea yaawä caju ña, caimaana seweichato. Aacä amoojato iju’jä cönä’jaacä, yeetai amoojadä. Iju’jä de’wä cönä’jaacä canaanadi, tooni nshai chääwaadäi.

⁴ Dha’cödö shidiichä caju ñancomo cöni’ji’cha’to, jooje, annaicho dö’se, nono de’cäi imeeancädäiñe. Töwö caimaana cöneedennai yaawä wodi tönnedö dhe’madööje cönä’ja’dö je’taca, iiñedö tänäädö wetä yaawä töwwä, yennua’jäcä.

⁵ Cönennui yaawä ñäädä wodi nnedö, dhanwa, tameedä sotoocomo edhaajotoncomooje töweiyemö, sejaadadi döaajä yaichadö tönaanontä töweiye naichöje. Iiñedö cönaatadoojoi yaawä Wanaadi döiña, imuudei yöiña.

⁶ Ñäädä wodi cönäänejei yaawä jata ’jemjönö aca, Wanaadi nichoonecaadö töweichojo aca. Iiña Wanaadi cöneedai’chaacä 1,260 anooto.

⁷ Yaawä caju ña cöneewänä’ta’to. Ñäädä Miqueede, amoode edhaajotoncomo, dhamoodedö mmaja, cöneewänä’ta’to caimaana jadä. A’que cönoonejaicho ñanno caimaana, dhamoodedö mmaja.

⁸ Tönwanno cönooto’jodheinchajoicho Miqueede wwäiñe. Yeicho’como ’je’da cönä’jaacä yaawä caju ña.

⁹ Caju ñanno cönootonno’jajoi yaawä caimaana, ñäädä äcääyu, jenaadä cönä’ja’dö, odo’sha täätö, Caajuushawa täätö mmaja, nono de’woncomo encu’täneichomo. Töwö nono de’cäi cönootonno’jajoi tamoodedö jadäiñe.

¹⁰ Caju ña a’deu wetaaquene yaawä. Jooje cönäätaacä; cönä’döaacä: —Eduuwa chäänönge nä’döi wääwanaacatoojo, Cöwaanadiiyöcoomo wwä töjäädudu eneejotoojo mmaja, cajiichaanaje töweichö eneejotoojo mmaja, dhanoonö Quidiito cajiichaanaje yeichojo mmaja. Caju ñanno cönootonno’jajoi eduuwa ñäädä cöjimmotoncomo ementäneichomo’jödö, ñäädä ano, coijai’jödöödä Wanaadi wwä töneementäiñe töweiye cönä’ja’dö.

¹¹ Ñanno cöjimmotoncomo tämentäneichomo’jödö cöne’jodheinchaicho Oweeja nnedö’cä wääma’jödö que, dha’deddu ecammajäätödö que mmaja. Tönwanno töwäämadööcomo onnontä’da cönä’ja’to tämaadöcoomo jonaane.

¹² Yääje yeijäcä adha’cwainchatääcä änwanno caju ñancomo. Nono de’woncomo mmaane wentumje naato’de, änwanno mmaja dama ’cwawoncomo, odo’sha adöiñaiñe yä’tä’jödö weijäcä, jooje töwäätömaadöje. Töwö töwäätöma na dhowaanäcä yeijäcä numa’da töweichojo yeichö; quee a’deu cönäätaacä.

¹³ Yaawä nono de’wä ema’jödööje töwäädanta’jäcä, ñäädä caimaana cönaajäntäi wodi aje’cadö, ñäädä dhanwa wennuaajä dhenö.

¹⁴ Wodi ajä’sai cönä’tui yaawä, aacä, jiyaana adai’joto ajä’sai ñönge, jata ’jemjönö aca caimaana jonno yaiñöntojooje. Yäätä töweichojo coneecaajä awä nätäädai’chaja’de aacäicheeato wedu annai.

¹⁵ Yaawä wodi ncäcä tuna cönwenaucwai ñäädä caimaana, wodi wäämadö wetä chuuma’jödö awä.

¹⁶ Nono wodi cöni’wa’täi yaawä; cönäädha’tacai tuna shuumadö wetä, yää caimaana niweenaucwa’jödö.

¹⁷ Jooje’ca jeene caimaana cönäätömai yaawä wodi jäcä. Töwö cöntämä yaawä töweewänä’tädö wetä ñäädä wodi nnacoomo jadäiñe, ñanno Wanaadi waanontädö tödönnamo, Jesuuquidiito a’deddu woija’como.