APOOCADIISI 11 - Wanaadi A'deddu

Aaco’como ecammajä’nenaamo wei’jocoomo

¹ Yaawä öwwä cönä’tui cudaata, oneejatoojo nönge. Edääje öwwä cönäätäcammai: —Aanöncä; Wanaadi weichojo oneejacä, adai’ja yeichö, saaquidiijiisiyo dötoojo mmaja; ime’cu’tocooto ñanno chaacancomo, Wanaadi wa’deme’nnamo.

² Jödoodo mmaane monoonejai’che, yää Wanaadi weichojo awoodhecääcä naadö. Audädä nei’ñojo yää, judhíojöncomo wwäiñe u’ajääje yeijäcä. Tönwanno naademaato’de jata aashichaato antai aacä sotooto de’wä aacä nuunä.

³ Öwö wanontaato’de aacä ya’deddu ecammajä’nnamo; tönwanno öwö untudu woije necammajä’aato’de 1,260 anooto, camiisha juduumato döaajä yoomöcoomoje; quee cönäätäcammai öwwä.

⁴ Ñanno ecammajä’nnamo naato yää aacä cujeedi ñaatö’taajä cu’tädööje, aacä adhaawa a’täi cu’tädööje mmaja, yää edä nono Edhaajä je’taca naadö.

⁵ Anejja täma’seiñe yeiya’jäcä, tönwanno nemaato’de yaawä wa’to töntadööcomo taiño weja’cadö que, yää tutu’de’tännamo töja’to’como. Mädääje nääma’de ñanno ecammajä’nnamo ema’sato.

⁶ Ñanno aaco’como ecammajä’nnamo wwäiñe na’de caju a’dutoojo, conoojo iiña’da yeichö wetä, töwwäiñe Wanaadi nutuudu woije ecammajäätödö anootoi’chädö wadaadäädä. Chäwwäiñe na’dede munuuje tuna chamjiyaacatoojo, cädäi che nono de’woncomo yuunacaato’como mmaja, tumjummadööcomo woije.

⁷ Ecammajäätödö jäcä yä’ca’comjäcä, ñäädä odoocojaato, ya’tadö inwadö ’jemjönö acaano’jödö weja’caajä, newäänä’ta’de chääjäcäiñe. Töwö ne’jodheinchaato’de; nöja’aato’dede.

⁸ Yaawä ñanno aaco’como ecammajä’nnamo’jödö equeejödööcomo na’de jata adai’joto annawääne. Yää jata eetö Sodhoomaje, Ejiitoje mmaja, yää jata nönge yeijäcä. Yäätä dea Cädhaajotoncomo cuduusa jäcä cönaatajoijojoi.

⁹ Yaawä jooje soto nene’maato’de ñanno aaco’como ecammajä’nnamo’jödö equeejödööcomo, tameedä jata waadoinchomo, tameedä soto weichöcoomo wa’cä, tameedä aata’deucwemjöncomo, tameedä nono weichö de’woncomo. Chääquejöödöcoomo aneewaacajo’da naato’de aacäicheeato anoototo annai.

¹⁰ Nono de’woncomo na’cwainchaato’de yaawä yä’jajo’jocoomo weijäcä. Täjemjönö’cä nu’jä’aato’de töjimmä wwäiñe, ta’cwaiñe töweichöcoomo e’nei, nono de’woncomo yuunacannamooje yei’jocoomo weijäcä ñanno aaco’como Wanaadi wa’deuwödö ecammannamo.

¹¹ Yää ’jeje aacäicheeato anoototo annai yä’döa’jäcä, Wanaadi täta’jiiñö cöna’jimmai ñanno ta’deddu ecammajä’nnamo do’taiñe; cönammöicho yaawä. Ñanno eneedöcoomo’jo tameedä soto cönääcatoncaicho yaawä jooje.

¹² Yaawä ñanno ecammajä’nnamo waadonca’como a’deu cöneetaicho caju ña. Jooje cönäätaacä: —Sadä adhäänu’täcä; quee. Tönwanno cönäncuicho yaawä caju ña, ca’dutu de’cäi, tutu’de’tännamo’jödö neneedöcoomoje.

¹³ Yaawä dea mma nono cönäätu’mei jooje. Dhantai maa yää jataawono cönaata’dojoojätöi; 7,000 soto cönä’jajoicho yää nono wätu’medö canaadöje. Yaawä ñanno yä’ja’jöncomo’jödö cönääcatoncaicho jooje; Wanaadi caju ñano o’jodhaatoje cöne’ta’to yaawä.

¹⁴ Eduuwa aacädeeto wäntunaanö’tojo töweeja’dä’e na; inchäcoono daja neja’dä’a eduuwa.

Aacä amoojatooto janau’cwa wäätö’jödö

¹⁵ Yaawä aacä amoojatooto amoode töjaanau’cwai cöneetöi. Wa’deunä cönäätaacä yaawä caju ña, jooje. Edääje ya’deuwödööcomo cönäätaacä: Tameedä nono de’woncomo, ñanno cajiichaanacoomo sotoi, naato eduuwa Cädhaajotoncomo sotoije, dhanoonö Quidiito sotoije mmaja. Töwö Cajiichaanaje na’de yeichöödäje; quee cönäätaacä.

¹⁶ Yaawä ñanno tooni sotooto de’wä aacäicheea’como inchoncomo, Wanaadi je’taca tumuudeichomo de’wä cönä’ja’todö, nono wwadäädä cönääje’dujäätöicho. Tönwanno Wanaadi cönwa’deme’ca’to;

¹⁷ cönä’döa’to: Aashichaatoje ñaa na’deuwa äwwä, Cajiichaana, Wanaadi jäduujato, amäädä eduuwa maadö, jenaadä mä’jaaquennö dea, äcuude ma’dedö dea, äjäädudu eneejodö awaajäntä’jödö weijäcä, Cajiichaanaje äwä’dö’jödö weijäcä mmaja.

¹⁸ Sotoocomo cöneewodoicha’to töwäätömaadöcoomoje; äwwä yäätä’maminchajooto’como anooto cu’nädö aca nä’döi eduuwa, yä’ja’a’como imencato’como cu’nädö aca mmaja, adhaanonö ejeemato’como mmaja, ñanno adha’deddu ecammajä’nnamo’jödö, tameedä osootoi mmaja, ñanno tönoiñe adheenennamo, tameedä täneejuca’como mmaja, soto mmädä mmaja. Nono de’woncomo imaaminchannamo töja’to’como cu’nädö aca nä’döi eduuwa; quee cönä’döa’to ñanno inchoncomo.

¹⁹ Yaawä Wanaadi weichojo cönaata’ducai caju ña. Yää jatuuwa, ñeecamma’jödö imennaajä ewöötö, cönääneaacä Wanaadi weichojo taca. Cönäncucui yaawä; cadeemedu cönäätai chea; cöneetötöömai chea. Nono cönäätu’mei yaawä; i’chajö adai’jocoomo cönä’mei chea.