APOOCADIISI 1 - Wanaadi A'deddu

Jesuuquidiito neneejo’jödö

¹ Edä yää Jesuuquidiito neneejo’jödö, Wanaadi nutuudu chäwwä, tanoonö wwäiñe eneejodö wetä, eduuwa mma töweeja’dä’emö. Töwö Jesuuquidiito tamoodedö cönaanontäi tanoonö Juan wwä ecammajä’e.

² Töwö Juan chäänönge cöneecammajäätöi tameedä töneene’jödö jäcä, Wanaadi a’deddu mmaja, Jesuuquidiito necammajäätö’jödö mmaja.

³ Ta’cwaiñe eijai ña ñäädä soto netaadöcoomoje edä a’deu imennaajä Wanaadi nutuudu a’de’tänei; etannamo mmaja ta’cwaiñe eijai ñaato dea, imennaajä woije tödönnamo mmaja, yeeja’do’tojo amoinche’da yeijäcä.

Quedeiyentecoomo wwadäädä Juan nimennä’jödö

⁴ Öwö Juan, äwwadäädäiñe wimenna, änwanno Aasiya ñancomo quedeiyentecoomo, aacä amoojato ajaatadööcomo naadö. Aashichaato, täncanoode’da aweicho’como mmaja äwwäiñe yei’she wa, Wanaadi nutuudu, ñäädä eduuwa naadö, jenaadä cönä’ja’dö dea, äcuude na’dedö dea, ñanno aacä amoojato’como Epíiditu nutuudu mmaja, ñanno Wanaadi mudei o’wawä naatoodö,

⁵ Jesuuquidiito nutuudu mmaja, ñäädä ecammajä’nei chäänöngato, awa’deenato töwäämaajo jonno weja’caajä, ñäädä edä nono de’woncomo cajiichaanacoomo Edhaajotoncomo. Töwö Jesuuquidiito cujummaneichomo, cöcoone’nadiiyöcoomo jonno cöcoccatääne taquiiyö que.

⁶ Töwö cajiichaanaja’comooje cödöötäne, Tumö Wanaadi wwä töwa’deuwaamoje mmaja. Töwö Jesuuquidiito na aashicha wa’deutojooje, cajiichaanaje mmaja, yeichöödäje. Amén.

⁷ Eneetäcä’de’ma, ca’dutu de’wä Quidiito weejödö. Tameedä soto neneeaato’de yaawä, ñanno töwännamo’jödö mmaja. Tameedä soto weichöcoomo wa’cä naamoaato’de eneedö’jo. Mädääje na.

⁸ “Öwö ñäädä yaajäntä’jödö, yä’cadö mmaja;” quee nä’döa Cajiichaana jäduujato, ñäädä eduuwa naadö, jenaadä cönä’ja’dö dea, äcuude na’dedö dea.

Juan wwä Quidiito ene’jödö

⁹ Öwö Juan, ajimmotoncomo dea, Jesuuquidiito jäcäinchädä yeetunu eneenei mmaja, Wanaadi sotoi mmaja, äshinchädööcomo nönge aashicha shinchänei mmaja. Öwö wä’jaaquene Paatamo antadö de’wä, Wanaadi a’deddu jo’tädööje yenno’jaajä, Jesuuquidiito jäcä ecammajäätödö e’nei.

¹⁰ Yaawä dominco awä, Epíiditu Santo woije wäädantäne; öncadheedä a’deu cönäätai yaawä töcä’de, janau’cwa etöödö wa’cä.

¹¹ Edääje cönäätaacä: —Öwö ñäädä awa’deeto, yaatameedö mmaja. Yää meneea’dedö imennäcä’de jajeeda jäcä; adoojocä’de yaawä Aasiya ñancomo quedeiyentecoomo wwadäädä, ñanno aacä amoojato ijaatadööcomo naadö, ñanno Eujeeso ñancomo, Eesimiidana ñancomo mmaja, Peecamo ñancomo mmaja, Tiiyatiida ñancomo mmaja, Saadisi ñancomo mmaja, Jiidadeujiya ñancomo mmaja, Daodiseea ñancomo wwadäädäiñe mmaja imennaajä adoojocä’dede; quee cönäätaacä a’deu.

¹² Wä’jedennacaane yaawä eneedö wetä, ¿änääcö öwwä na’deuwanä? quee öucwadööje. Yaawä wä’jedennaca’jäcä, yäätä wedantäne aacä amoojato adhaawa a’täi, oodo döaajä.

¹³ Yää aacä amoojato adhaawa a’täi yeichö antawä cönä’jaacä soto nnedö nöngato, nuwaato yoomöje, i’judu jona tödööene; tö’do’cäcä yä’möaajä cönä’jaacä oodo döaajä que.

¹⁴ Iju’jädö cönä’jaacä tajääde’de, wadeecu wa’cä. Chäänudu wa’to nönge cönä’jaacä.

¹⁵ I’judu cönä’jaacä ta’dawaane, oodojaato wa’to nwaca encaimaajä töweiye naichö wa’cä. Dha’deddu cönäätaacä jooje, shoodö wa’cä.

¹⁶ Ämu’demjönö dhamäädö jäcä cönä’jaacä aacä amoojato shidiichä. Inchai cöneeja’caacä sauda seqqueeto, ääjato yeedö. Ijeedö cönä’jaacä weijotä, shii tönweijo töweiye naichö wa’cä ca’dutu ’je’da yeichawä.

¹⁷ Öwwä eneea’jäcä ye’duccane yo’wawä, yaatacoichaajä nönge. Yaawä töwö yaajojoone tamäädö ämu’demjönö que; cönä’döaacä: —Määcatoncai; öwö ñäädä awa’deeto, yaatameedö mmaja.

¹⁸ Öwö ñäädä nudooto; wääma’jödö weichaame nudä wa eduuwa yeichöödäje. Wäämanä edhaajä öwö dea, yä’ja’a’como weicho’como edhaajä mmaja.

¹⁹ Aneene’jödö imennäcä’de, eduuwa weiñä naadö jäcä, äcuude weiñä na’dedö jäcä mmaja; quee cönä’döaacä ñäädä öwwä.

²⁰ Yaawä ñäädä soto nnedö nöngato cönä’döa’dea: —Edääje töwä’dö’se yeichö mädä chu’tädö meneeannö, ñanno aacä amoojato’como shidiichä yaamädö ämu’demjönö jäcä meneeantodö, aacä amoojato adhaawa a’täi meneeannö mmaja, yää oodo döaajä: Ñanno aacä amoojato’como shidiichä aacä amoojato amoode weichöcoomo cu’tädööje nä’janto, ñanno aacä amoojato ijaatadööcomo naadö quedeiyentecoomo edai’chännamo. Yää aacä amoojato adhaawa a’täi meneeannö mmaane, quedeiyentecoomo cu’tädööje nä’jaanä, ñanno aacä amoojato ijaatadööcomo naadö; quee cönä’döaacä öwwä.