3 JUAN 1 - Wanaadi A'deddu

Caayo jäcä aashicha Juan wa’deuwö’jödö

¹ Öwö, ansiyaano, edä wimenna äwwadäädä, amäädä weichacoono umjummadö Caayo, chäänöngato que wijummaadö.

² Weichacoono umjummadö, Wanaadi wwä töwa’deuwe wäänene tameedä ännödö jäcä aashicha aweichö wetä, cädäije’da aweichö wetä mmaja, odo’tadö naadöje mmaja.

³ Jooje ta’cwaiñe wä’jaaquene chäänönge aweichö eta’jäcä öwwä. Anejjacoomo quedeiyente döiña cöneiya’todö mädääje aweichö cöneecammajä’a’to öwwä. Chäänöngato wätunnä woije dämma määnene.

⁴ Yää mma tameedä cho’jodhe ya’cwaimatä weneene, chäänöngato wätunnä woije önnacoomo weichöcoomo etaadö mma.

⁵ Weichacoono umjummadö, chäänönge töwäänejo määnene äwwä quedeiyentecoomo i’wa’tädööcomo que, odhoowanoojöncomo yeichaameiñe.

⁶ Eetä, quedeiyente we’jumma’como netaadöcoomoje tönwanno adheecammajä’neto wä’jummanä ’je aweichö. Chäänönge i’wa’täjaiñe ma ecammajä’e iichädööcomo jäcä, Wanaadi wwä tödöödö töweiye naichöje dea.

⁷ Tönwanno nötaato Jesuuquidiito tadaawaajui tödöödö wetä; Wanaadi dhowaanojöncomo wwä e’wa’tojo’da tönwanno.

⁸ Yääje yeijäcä cönwanno i’wa’täjaiñe caato chaadawaajuichomo jäcä, yää aashichaato wätunnä ecammajäätödö.

Chäänönge’da Diyootede wei’jödö

⁹ Öwö wimennäneedö’je quedeiyentecoomo wwadäädäiñe, yaawääne’ ñäädä Diyootede ñaa eta’se’da na, töwö jaiñoone chäädhajootoncomooje töwei’she töweijäcä.

¹⁰ Yääje yeijäcä adöiñaiñe ööta’jäcä tameedä iiñödö wecammajä’a’de, iiña mmädä ñaa jäcä yeewätunnäichadö. Mädä mmajöönö tönnöe weneene, quedeiyentecoomo nwaadoncomo wötäädö aashicha ännö’daiñe mmaja töwö; ñanno aashicha tödö’sa’como wwä ännöjo’da mmaja. Tu’ca mma tunu’ca weneeneto quedeiyentecoomo jadä yeichöcoomo jonno.

¹¹ Weichacoono umjummadö, conemjönö tödöödö mma mäncu’jätöi, aashichaato tödöödö mmaane. Ñäädä aashichaato tödöönei, Wanaadi nnedö ñäädä; ñäädä conemjönö tödöönei mmaane Wanaadi aneene’da na ñäädä.

Chäänönge Demeetediiyo wei’jödö

¹² Tameedä soto aashicha töwa’deuwe weneeneto Demeetediiyo jäcä; chäänönge weiñä woije töwö weneene. Ñaa mmaja ñaa owaanäcä na dea chäänönge yeichö. Änwanno odhoowanääcäiñe na chäänönge ñaa necammadö yeichö.

Yä’ca’jödö

¹³ Jooje äwwä täcammajä’emö nä’jannö’je öwwä, yaawääne’ jajeeda jäcä ämmennä’da wa.

¹⁴ Eduuwa mma adheene’se wa, ääje’tacaane ca’deujätöiye.

¹⁵ Täncanoode’da aweichojo äwwä yei’she wa. Eetoncomo ajimmä ta’deujocoomo nadääjaato äwwadäädä. Yä’deujödö ecammacä’de cöjimmotoncomo waadäiñe.