2 TIIMOTEO 4 - Wanaadi A'deddu

¹ Edääje mänwätuuja Wanaadi owaadäädä, Jesuuquidiito owaadäädä mmaja. Ñäädä Jesuuquidiito cajiichaanaje ne’a’de tameedä nudo’como emmencadööcomo wetä, yä’ja’a’como emmencadööcomo wetä mmaja. Ñäädä owaadäädä edääje wä’döa äwwä:

² Wanaadi a’deddu töneecammajä’e eichä; chääjäcä töweesomaajä’e deaane eichä’de, chu’nädö awä mecammajä’töiye, chu’nädö awä’da mmaja. Yää que soto e’jodheinchacooto, cone’da tödööjocootode, yäätuujacooto’dede, owaanomaadöcoomo jäcä aquinchancädä’da.

³ Aneedawä chäänöngato wätunnä eta’se’da soto weicho’como cu’nädö na’de. Tönwanno ni’jummaato’de töwaacötö jäcä owaanomannamo mma, töjaanashiiyännamooje mma.

⁴ Tönwanno ne’nomjaato’de chäänöngato wätunnä etaadö; iiña mmädooto wätunnä mma netaato’de.

⁵ Amäädä mmaane chäänöngeedä eichä; shinchäcä äwäntunamjödö; aashichaato wätunnä ecammajäätödö jäcä oowoinchacä; chäänöngeene tödööcä ataadawaajui.

⁶ Öwö mmaane äämajai wä’döi eduuwa, saaquidiijiisiyo töweiye naichöje; öötotoojo cu’nädö aca yä’döaajä mädä eduuwa.

⁷ Chäänönge yeewänä’täne; yeemadö jonno shaadijaamö’da wa; chäänönge neecamjödö wödööne.

⁸ Yääje yeijäcä öwwonooje yeeje’jödö tösooma na, yää chäänönge wei’jödö eje’jödö. Cajiichaana yää nu’a’de öwwä yää anooto awä, ñäädä chäänönge emmencanei. Öwwä mma’da yää nu’a’de, tameedä ñanno ijummadö que yeejö’sa’como’jödö wwäiñe mmajaane.

Tiimoteo wwä tödööemo Paudo necamma’jödö

⁹ Eduuwaiche mma döiña aweejödö ätäncano’täcä’de.

¹⁰ Deema ye’nomjane, edä nono de’wono tumjumma töweijäcä; cöntämä Teesadoonica ña. Quedeesente mmaane cöntämä Cadaasiya ña; Tiito ’quene Daadamaasiya ña daja.

¹¹ Duuca mma töjääcäjeene jaadä na. Awe’a’jäcä Maadoco ene’cä’de; öwwä tujunne na, ö’wa’täneije.

¹² Tíiquico wanontäne Eujeeso ña.

¹³ Woomö de’wono ene’cä’de awe’a’jäcä, yää Caadopo e’saca wiñännedö, Todoowa ña. Jaajedai ene’cä’dede; yää jajeeda imomjä’ajä tujunne jeene öwwä na.

¹⁴ Aadejantudu, ñäädä sejaadadi jäcoono wetaadawa’cajoodö, jooje conemjönö cönnöi jääcä. Cajiichaana nejeema’de iiñö’jödö jo’tädööje.

¹⁵ Amäädä mmaja chääjäcä odhoowoinchadä’da eichä; cöneecammajäätödööcomo tu’dedö ñäädä.

¹⁶ Awa’deene acu’shänääcomo wwä yeecamma’jodaawä ya’deunedaawä, ö’wa’tänei ’je’da cönä’jaacä; tameedäädääne ye’nomjaneeto. Chäwwäiñe Wanaadi aneejemaajo’daane yei’she wa yää.

¹⁷ Cajiichaana mmaane jaadä cönä’jaacä; töwö jäädudu cuntui tacoichaane ta’deddu ecammajäätödö wetä öwwä judhíojöncomo netaadöcoomoje. Mädääje Cajiichaana yeewanaacane mado jonno;

¹⁸ töwö dea yeewanaaca’de tameedä conemjönö jonno; aashicha yeedai’cha’de töjaatacäi caju ña wä’dödö jonaane. Töwö aashicha wa’deutojooje na, yeichöödäje. Amén.

Yä’ca’jödö

¹⁹ Ya’deujödö wadääja Pidiisica wwadäädä, Aquiida wwadäädä mmaja, Oonesíijodo wä’jimmä’tädö wwadäädä mmaja.

²⁰ Edaasoto cöno’nomjoi Codinto ña; Todóojimo mmaane wiñänne Mideeto ña, cädäije.

²¹ Tu’que yeichö aca ä’dö’dadä ä’cäde’de. Euwudu ta’deujödö nadääja äwwadäädä, Pudhente mmaja, Diino mmaja, Cadaudiya mmaja, tameedä anejjacoomo quedeiyente mmaja.

²² Cajiichaana Jesuuquidiito ajaadä na; aashichaato Wanaadi nutuudu äwwäiñe yei’she wa. Amén.