2 TIIMOTEO 2 - Wanaadi A'deddu

Jesuuquidiito sotoi töweewänä’täämö weichojo

¹ Amäädä önnedö, ä’jädu’täcä yää aashichaato Jesuuquidiito jadä cöweichomjäcä cöwwäiñe naadö que.

² Yää wannacoomo soto netaadöcoomoje neecammajäätödö metaaquennö que mmaja anejjacoomo chäänönga’como owaanomaacoto, tönwanno mmaja anejjacoomo owaanomaiyetoode yaawä.

³ Shinchäcä äwäntunamjödö, Jesuuquidiito sotoi töweewänä’täämö töweiye naichöje.

⁴ Ñäädä töweewänä’täämö anejja dödö jäcä ääjönca’da töweiye nai, töweewänä’täämöje täwaacanei’jödö nanontädö tödööcoije töweichö wetä.

⁵ Mädääje mmaja töwootoneejaamö; töwö chaana’caneije ätä’täjai’cha na chäänönge’da yootoneeja’jäcä.

⁶ Ñäädä ñaatö’tädö jäcoono wetaadawa’cajo’jödö awa’deene yää natö ejeedödö ajoojojai ña.

⁷ Chö’tamme’cä mädä wecammaadö; Cajiichaana äwwä nu’a’de tameedä chö’tamme’tojo.

⁸ Jesuuquidiito jäcä ätö’täcä, ñäädä töwäämaajo jonnoto waadonca’jödö, Dawí atöödö. Mädääje aashichaato wätunnä töneecammajä’e wäänene.

⁹ Yää aashichaato wätunnä jo’tädööje wäntunaanö’a, tömööjä’e, soto emaanei tödöödö töweiye naichöje; Wanaadi a’deddu mmaane tömööjä’e’da na.

¹⁰ Yääje yeijäcä tameedä tönshinchä wäänene ñanno Wanaadi neichö jäcäinchädäiñe, tönwanno mmaja yeichöödoto wääwanaacatoojo ejoodöiyetoode, yää aashichaato, Jesuuquidiito jadä weiñä naadö.

¹¹ Chäänöngato mädä yääje wä’dönä: Chääjadä cöwä’ja’a’comjäcä, chääjadä mmaja cöweichöcoomo queeneaato’de.

¹² Chääjadä cöwäntunaanö’a’comjäcä, chääjadä cajiichaanaje caato’dede. Ijoome’da’jäcä cöwwäiñe, töwö mmaja cöjoome’daato’dede.

¹³ Chäänönge’da cöweiya’comjäcä, töwö mmaane chäänöngeedä na, Wanaadi enwacaamajai’cha yeijäcä; quee wä’dönä naadö.

Chäänöngato wetaadawa’cajoodöje weiñä

¹⁴ Edä jäcä chö’tamme’jocooto; Cajiichaana owaadäädä yäätuujacooto wätunnä jäcä ätäccujäätö’da yeichöcoomo wetä. Aashicha dötä’da na yää wätäccujä’nä, töcoone’ma mma nichoone’ma etaanei’jödö.

¹⁵ Chäänöngato wetaadawa’cajoodöje aweichö Wanaadi wwä äwäänejootojo encano’täcä, töjöiye’da meiye dhowaadäädä, sa’donna ecammajä’ancädä a’deu chäänöngato.

¹⁶ Wätunnä iiña mmädooto jäcä mma mei; yää jäconcomo jooje’cä mma nääwaacajaato conemjönö aca.

¹⁷ Yääjato nowaanomaadö se’naamo wätäänädö töweiye naichöje na. Yääja’como ñanno Iimeneo, Jideeto mmaja.

¹⁸ Tönwanno tösaadijange naato chäänöngato jonno; töwäämaajo jonno waadoncanä töweeja’dä’e yeiyaatäi necaanö’aato. Mädääje töwa’deuwödööcomo que anejjacoomo necamjödö nichoone’maato.

¹⁹ Yääje yeichaame Wanaadi a’deddu yäätäädä na, yo’wadö töweiye naichöje. Edääje na chääjäcä imennaajä: “Cajiichaana dhowaanäcä na töwwoncomo;” quee. Edääje mmaja imennaajä nä’döa dea: “Ñäädä Quidiito sotoije yäätä’taajä nä’sancwa’ñojo conemjönö jonno;” quee.

²⁰ Maa adai’joto taca tödööajä töweiye nai oodo döaajä, jödaata döaajä dea mmajöönö, dee döaajä mmajaane, ädiiñä döaajä mmaja; anejja aashichaatoje tödöödö, anejja ’quene conemjönööje.

²¹ Mädääje mmaja quedeiyente; aashichaato tödööneije töwei’she töweiya’jäcä, chäänönge Cajiichaana anoonöje töwei’she töweiya’jäcä mmaja, töwö ecoccajai ña tameedä conemjönö jonno. Yaawä töweesomaajä’e na’de aashichaato tödööneije.

²² Yääje yeijäcä äänejeecä mude’cäje weiñä cone’nadi jonno. Chäänönge weiñääne encano’täcä, ecamjödö mmaja, wä’jummanä mmaja, täncanoode’da weiñä mmaja, ñanno aashicha tötö’tajäätödööcomo yeiyancädä Cajiichaana ecaanö’nnamo jadäiñe.

²³ Töwäädämmato wätunnä jäcä mmaane mei’che, yää döneijönö; odhoowanääcä na mädä wätäccujä’nä töneejodööjo yeichö.

²⁴ Cajiichaana anoonö wätäccujä’na jäcä eijai’cha na; ta’cwaiñe mmaane eijai ña tameedä soto jäcäiñe. Soto owaanomaadö dhowaanäcä eijai ña töwö; äätömaacoije’da mmaja eijai ña dea.

²⁵ Töwö töwäätuujacoonemjöncomo yäätuujajai ñaato jäduuje chääjäcäiñe töweiyancädä’da, Wanaadi wwä tötö’tajäätödööcomo sha’duminchatoojo edantäiyeto yaawä, chäänöngato dhowaanäcäiñe yä’dödö wetä.

²⁶ Yaawä towaadäädäiñe ä’döjai ñaato, äänejeejai ñaato yaawä odo’sha cadancwaniiyö acanno, ñanno tumjummadö woije tödöödöcoomo wetä odo’sha wwä tajäiye naatoodö.