2 TIIMOTEO 1 - Wanaadi A'deddu

Yaajäntä’jödö

¹ Öwö Paudo, Wanaadi woije Jesuuquidiito nanontädö, yeichöödoto weiñä ecammaajä ecaademeecödö wetä öwwä, yää Jesuuquidiito jadä wä’dönä que naadö.

² Äwwadäädä wimenna amäädä Tiimoteo, önnedö umjummadö. Wentumje Wanaadi wwä adheene’se wa; aashichaato, täncanoode’da aweichojo mmaja, äwwä yei’she wa dea Cumöötoncomo Wanaadi nutuudu, Cädhaajotoncomo Jesuuquidiito nutuudu mmaja.

Quidiito ecammajäätödö

³ Äjääcä Wanaadi wwä wa’deuwödö waadäi aashicha töwa’deuwe wäänene Wanaadi wwä, ano, coijai mmaja, ñäädä aashicha tö’tajäätödö yeiyancädä dhanoonöje waadö, yaadai’chomo cönä’ja’todööje mmaja.

⁴ Awaamo’jödö jäcä tö’tajäätödaawä adheene’se tötö’tajä’e wäänene, ta’cwaiñe weichö wetä yaawä.

⁵ Tötö’ta wäänene aneecamjödö chäänöngato jäcä, yää awa’deene onootö Dowiida wwä cönä’jadö, yää ’jeje aanö Euniise wwä cöna’ja’dö mmaja, eduuwa amäädä äwwä daja nichö’ta.

⁶ Yääje yeijäcä mänwätuuja Wanaadi nutuudu äwwä naadö michaatu’nacaiye, yää yaamädö ade’wä wödöönedaawä äwwä cönä’tuichö.

⁷ Wanaadi cöwwäiñe cuntui tösaade cöweicho’comoojönö, jäduuje cöweicho’comoone, cöwä’jummato’como mmaja, tösejjeque cöweicho’como mmaja.

⁸ Yääje yeijäcä ajöichöje’da tödööcä’de Cajiichaana Jesuuquidiito ecammajäätödö; öwö mmaja cämjöichäi’chede, Jesuuquidiito jo’tädööje jedeesoje waadö. Wanaadi nutuudu äjäädudu que töshinchääne shinchäcä aashichaato wätunnä jo’tädööje äwäntunamjödö.

⁹ Töwö Wanaadi cäwaanacaatäne; ca’dejjatääne dea töwwonooje cöweichöcoomo wetä. Töwö cäwaanacaatäne aashichaato cönnödööcomo jäcäinchädä’da, tumjummadö woijeene, Jesuuquidiito jäcäinchädä cujummatäiñe töweijäcä mmaja. Töwö Wanaadi cujummatääne edä nono tödöödö owaajodääde.

¹⁰ Eduuwaane töwö cujummatäiñe töweichö cöneenejoi Cäwaanacaaneichomo Jesuuquidiito wäänejoodö que. Töwö Jesuuquidiito wäämanä cömjäduucai; aashichaato wätunnä ecammajäätödö que töwö cöncatu’nacaajoi töwä’camjönö weiñä, yää yeichöödoto.

¹¹ Wanaadi yeewaacane anontaajäje, aashichaato wätunnä ecammajä’neije mmaja, judhíojöncomo owaanomaaneichomooje mmaja.

¹² Mädä jäcäinchädä töwäätä’maminchajo wäänene, mädä waadö. Yääje yeichaame ejöichojo’daane wa, yoowanääcä yeijäcä ñäädä neecamjödö. Yoowanääcä na dea chäwwä needai’chojoodö töwö chäänönge edai’chäjai yeichö yää anooto jona tödööene.

¹³ Yää chäänönge monoowanoomaneedö woije eichä, ecamjödö ’je aweiyancädä, wä’jummanä ’je mmaja, yää Jesuuquidiito jadä weiñä que naadö.

¹⁴ Tädai’chääne edai’chäcä yää äwwä Wanaadi nutuudu; Epíiditu Santo ni’wa’tädö que tödööcä, ñäädä cötaacaiñe naadö.

¹⁵ Odhoowanääcä na tameedä Aasiya ñancomo wwä ye’nomja’jödö, Jijeedo mmaja, Eedemoojene mmaja.

¹⁶ Wentumje Cajiichaana wwä Oonesíijodo wä’jimmä’tädö ene’se wa, weiñäje ö’wa’tä’jödö weijäcä chäwwä; jedeesoje weichö ämjöichä’da cönä’jaacä töwö.

¹⁷ Dooma ña weichö tujiiyeene yuujiyaaquene yeedantädö wa’cä.

¹⁸ Cajiichaana wentumje neneea’de yää anooto awä. Amäädä odhoowanääcä na dea jooje Eujeeso ña cö’wa’to’jocoomo chäwwä.