2 TEESADOONISENSE 3 - Wanaadi A'deddu

Wanaadi wwä adha’deutäcä ñaa jäcä

¹ Änwanno jimmä, Wanaadi wwä adha’deutäcä ñaa jäcä, tameedä yeichö wa’cä Cajiichaana a’deddu ätääcammaiye, aashicha mmaja soto etaiyeto’de, änwanno metaatäneedöje mmaja.

² Adha’deutäcääde Wanaadi ñaa ewontäiye soto conemjöncomo jonno, chäänöngemjöncomo jonno mmaja. Tameedä’da töneecanö’e naato.

³ Chäänöngato ñäädä Cädhaajotoncomo. Töwö äjäädu’taato’de; adheewontaato’dede conemjönö wwä.

⁴ Cädhaajotoncomo dea nu’a ñaa wwä täncanoode’da äjääcäiñe ñaa tö’tajo’tojo, ñaa owaanäcä yeijäcä tönnöe aweichöcoomo tameedä adhaanonto’jocoomo ñaa wwä; ñaa owaanäcä mmaja tödöödöje dea eijai aweichöcoomo.

⁵ Cädhaajotoncomo ä’wa’taato Wanaadi jummadö äwwäiñe yeichö wetä, yäätäädä ätö’tajäätödööcomo weichö wetä mmaja, yää Jesuuquidiito nutuudu que.

Töquiiñe eijai’cha cöweichöcoomo

⁶ Jimmä, edääje adhaanontä’seiñe ñaa na Cädhaajotoncomo Jesuuquidiito eetö joi: Ä’sancwatääcä quedeiyente töquiiñato jonno, ñäädä ñaa odhoowanoomatäänedö nönge eijönö.

⁷ Änwanno odhoowanääcäiñe na äwwäiñe tödööemö, ñaa nönge mmaja aweichöcoomo wetä. Ajaadäiñe töweichö etaadawa’cajo’da’da ñaa töweiye cönä’jaacä,

⁸ täjeema’da’da töwääwashinchä ñaa cönä’ja’dea. Ñaa dea töweetadaawa’cajo ñaa cönä’jaacä ano, coijai’jödöödä, töwäntunamjödö que, töwänshiñö ejoodötoojo cana’cadö wetä, adheemu’däneichomooje’da ñaa weichö wetä.

⁹ Sa’donna äwwäiñe aateme’jai ñaa wei’jödö weichaame, ñaa dea töweetadaawa’cajo ñaa cönä’jaacä, ñaa eneedö’jo ñaa nönge mmaja aweichöcoomo wetä.

¹⁰ Ajaadäiñe ñaa weichö edääje töwä’döe ñaa cönä’jaacä äwwäiñe: “Ñäädä töweetadaawa’cajo’semjönö, ääwashinchä’da mmaja eijai ña dea;” quee.

¹¹ Ñaa wwä tacaade na dhantai änwanno etaadawa’cajo’da aweichöcoomo, wätunnä dha’me weiñä jäcä mma.

¹² Jesuuquidiito eetö joi edääje ñaa nanontaato ñanno yääja’como, yäätuujadööcomooje: Täncanoode’da netaadawa’cajo’ña’to, töweicho’como cana’cadö jäcä.

¹³ Jimmä, chaaquejö’da eichäcä aashichaato tödöödö jäcä.

¹⁴ Anejja wwä ñaa waanontä’jödö tödö’se’da yeiya’jäcä, edä jajeeda aca imennaajä naadö, odhoowadäädäiñe tödöötäcä ñäädä; chääjadä meichäi’che yaawä, töjöiye yeichö wetä töwö.

¹⁵ Tutu’de’tä deja mma mäntu’de’tätäi’che; töwäätuuja mmaane yäätuujatääcä’de, töweichacoono yäätuujadö töweiye naichöje deaane.

Yä’ca’jödö

¹⁶ Ñäädä, täncanoode’da weichojo edhaajä, täncanoode’da aweicho’como nu’a yeichöödäje, tameedä aweichöcoomo jäcä. Cädhaajotoncomo ajaadäiñe na, tameedä aweichöcoomo wa’cä.

¹⁷ Öwö Paudo dea edä wä’cadööje wimenna, tameedä ömmennäjoodö jäcä tömmennä wääneneedöje dea; edä naadö ömmennädö.

¹⁸ Cädhaajotoncomo Jesuuquidiito nutuudu aashichaato tameedä äwwäiñe yei’she wa. Amén.