2 TEESADOONISENSE 2 - Wanaadi A'deddu

Conemjönö tödöödö edhaajä

¹ Änwanno jimmä, edääje töwä’dö’se ñaa na äwwäiñe Cädhaajotoncomo Jesuuquidiito weejödö jäcä, töjaadä cu’jummato’como jäcä mmaja.

² Ä’sadiijannä’cajo’da eichäcä chäänönge ätö’tajäätödööcomo jonno; atansu’däjo’da mmaja eichäcääde. Ätääcatoncajo’da mmaja eichäcä’de anejjacoomo wwä, edääje yä’döa’comjäcä: “Cajiichaana Jesuuquidiito weejödö tö mädä;” ca’jäcä. Wanaadi woije yääje chäwwäiñe ecammajäätödö yeiyaatäi maneecanö’täi’che. Ñaa nimennädööjatooje e’taajä jajeeda äwwadäädäiñe adääjaajä yääje mmaja yä’döa’jäcä, maneecanö’täi’chede.

³ Mätäncu’tojootäi’che; yää Cajiichaana we’tojo anooto eejö’da na’de Wanaadi jäcä soto wä’jädu’toto’como cu’nädö aca yä’dödö wa’cä. Yaawä ñäädä dhanwa, conemjönö tödöödö edhaajä, nääneja’de, ñäädä töwännanö’emööje töweiyemö.

⁴ Tu’de ñäädä. Töwö nä’jädu’ta’de tameedä Wanaadi nödöödö jäcä, tameedä soto nijummadööcomo jäcä mmaja. Wanaadi weichojo tawä töwö nataajima’de. Wanaadije nätä’ta’de yaawä.

⁵ ¿Tötö’ta dea jönca maato yääje dea töneecammajä’e wei’jödö ajaadäiñe weichö?

⁶ Änwanno odhoowanääcäiñe na ñäädä dhanwa conemjönö tödöödö edhaajä aneenejoojönö töweiye yeichö. Yääje yeijäcä ñäädä conemjönö äänejoojai’cha na, chu’nädö aca yä’dödö wa’cä.

⁷ Töweiye yeichaame eduuwa conemjönö, yää ääne’da ijäädudu weneenedö, chu’nädö aca ä’dö’da deaane na. Yää mma a’que na eduuwa, ñäädä aneenejoojönö eseecadö mma;

⁸ yaawä jeene nääneja’de ñäädä conemjönö tödöödö edhaajä. Töwö nätäämaja’de yaawä Cajiichaana Jesuuquidiito eta’jiño que. Jesuuquidiito weejödö nawaananö’cadö que dea mma töwö nääma’de.

⁹ Ñäädä conemjönö edhaajä we’ajä na’de Caajuushawa woije. Töwö jäduuje na’de. Ene’ju’tojo nödööjä’a’de, täneemö mmaja, soto encu’toto’comooje.

¹⁰ Aneejejaiñene’jödöödä conemjönö que nencu’taato’de ñanno töwännanö’aamoje töweiyaamo. Tönwanno mädääje nätäncu’täjaato’de chäänöngato ämjumma’da töwei’jocoomo e’nei, yää töwääwanaacato’comoojato’jödö.

¹¹ Yääje yeijäcä Wanaadi nencu’täjaato’de chäänöngemjönö que, weshi’jonä mma ecamjödö wetä chäwwäiñe.

¹² Mädääje nännanö’aato’de tameedä chäänöngato ecamjö’semjöncomo’jödö, ñanno conemjönö ijummannamo’jödö.

Töwääwanaacaamoje cöweichöcoomo

¹³ Änwanno jimmä, Cajiichaana nijummadö, yeichöje Wanaadi wwä aashicha a’deujai ñaa na äjääcäinchädäiñe, jenaadä Wanaadi wwä töwääwanaacaamoje adhe’to’jocoomo weijäcä. Töwö Wanaadi osoomatääne Epíiditu Santo que, äwwäiñe chäänöngato ecamjödö que mmaja.

¹⁴ Mädääjatooje töwö Wanaadi adha’dejjatääne, aashichaato wätunnä ñaa necammajäätö’jödö que, aashicha Cädhaajotoncomo Jesuuquidiito weichö ejoodödö wetä äwwäiñe.

¹⁵ Yääje yeijäcä jimmä, jäduujeedä eichäcä. Mane’nomjatäi’che odhoowanooma’jocoomo ñaa wwä, yää ñaa necammajäätö’jödö, ñaa nimennä’jödö mmaja.

^16-17 Cumöötoncomo Wanaadi cujummatääne aashicha töweichö woije. Töwö cuntui cöwwäiñe cöwä’wa’doto’como yeichöödoto, ta’cwaiñe cöwo’womo’to’como mmaja. Töwö Wanaadi chea, Cädhaajotoncomo Jesuuquidiito mmaja, äjäädu’taato adheewanööcomo jäcä. Tönwanno ä’wa’taato tameedä aashicha awa’deuto’como jäcä, aashichaato tödöödö jäcä mmaja.