2 PEEDHODO 2 - Wanaadi A'deddu

Chäänöngemjöncomo ecammajä’nnamo

¹ Jenaadä ecammajä’nnamo chäänöngemjöncomo töweiye cönä’ja’to iisadaaediita antawäiñe. Mädääje mmaja adhantawäiñe naato’dede owaanomannamo chäänöngemjöncomo. Tönwanno jo’wadootoje wecoone’matoojo wätunnä nejoodöaato’de. Tädhaajotoncomo jadä’jödöödä nijoome’daato’de, ñäädä Täwaanacaaneichomo. Mädääje jadheedoto töwännanö’to’como nejoodöaato’de.

² Jooje naato’de shootoichomo, conemjönö iiñödööcomo nönge tödönnamo mmaja. Tönwanno yoija’comooje cone’da soto na’deuwaato’de quedeiyenteje weiñä jäcä.

³ Ñanno owaanomannamo chäänöngemjöncomo onsomaadöcoomo jäcäinchädä adhencu’taato’de ta’dedducoomo yääjönö wa’coto que. Jenaado’jä’jödöödä yäätä’maminchajooto’como täcamma na. Töwännanö’to’como aneemaicha’da naato’de.

⁴ Conemjönö tödööa’jäcä Wanaadi amoodedö wwäiñe töwö Wanaadi aneewanaaca’daiñe cöneiyacä; wa’to nwaca cönenno’jaicho. Jedeesoje cönnöicho tööjano’taca, cadheena que tömööjä’e, yäätä töwäätä’maminchajooto’como cu’nädö womoocödö wetä.

⁵ Wanaadi aneewanaaca’daiñe cöneiya’dea ñanno jenaado’jocoomo. Tunaamä cönenno’jai ñanno soto töwoijemjöncomo jäcäiñe. Noé mma cöneewanaacai, ñäädä chäänönge weiñä jäcä ecammajä’nei’jödö; aacä amoojato soto mmaja cöneewanaacaicho dea.

⁶ Sodhooma ñancomo, Comooda ñancomo mmaja, Wanaadi cönennanö’caicho dea yau’cwadö que. Mädääje töwö cönnöi yää ’jeja’como conemjönö dönnamo wä’sejje’toto’comooje.

⁷ Doote mmaane Wanaadi cöneewanaacai, ñäädä dhanwa chäänöngato. Ñäädä Doote töquincha cönä’jaacä conemjönö tödöödö eneedö ñanno conemjöncomo wwäiñe.

⁸ Anooto waadäi ñäädä dhanwa chäänöngato cone’da töwä’döjo cönä’jaacä täwaanö jäcä, conemjönö iiñödööcomo töneene’jödö jäcä, töneeta’jödö jäcä mmaja, chaajadäiñe töweichö.

⁹ Mädääje Wanaadi ñanno cöneewanaacaicho. Töwö dhowaanäcä na dea töwoija’como ewaanacaadöcoomo yä’yunaacajoodöcoomo jonno. Töwö dhowaanäcä mmaja töwoijemjöncomo maminchadööcomo, wätä’maminchajootojo anootoi’chädö neene jona tödööene.

¹⁰ Jooje’cä jeene Wanaadi nimaaminchaato’de ñanno conemjönö tumjummadööcomo woija’como, ñanno Cajiichaana chiiñeme’nnamo. Tösaademjöncomo tönwanno, jäduuja’como mmaja. Tönoiña’como jäcä cone’da töwa’deuwödööcomo onnontä’da tönwanno.

¹¹ Wanaadi amoodedööde’ cho’jodheiñe töweichaameiñe cone’da a’deuwö’da weneeneto ñanno tönoiña’como jäcä Cajiichaana Wanaadi owaadäädä.

¹² Ñanno conemjöncomo weneeneto chö’tajäätö’da, aneene’jutu’da mmaja, odoocoja’como weneenetoodöje mmaja, ñanno tajäiyaamo, töja’aamo mmaja. Tönwanno cone’da töwa’deuwe weneeneto towaanojöncomo jäcä. Tönwanno nä’ja’aato’de, odoocoja’como nönge mmaja.

¹³ Näntunaanö’aato’dede anejjacoomo soto cönentunamjöichodö jo’tädööje. Shiiyöcoomoje weneene anooto waadäi töweewodoichadööcomo. Jöije naato; tujuumä äwääwashinchädööcomo töncone’ma weneeneto. Conemjönö tumjummadööcomo aca töweewodoicha töweichaameiñe, ajaadäiñe dea töwääwashinchä weneeneto, yääjönö wa’cä.

¹⁴ Conemjönö jäcä chö’tajäätö’da töweiyancädäiñe wodi wwadäädä eneejai’cha naato; conemjönö tödöödö que chaaquejö’da mmaja weneeneto dea. Tönwanno tönencu’täiñe jäduujemjöncomo. Töwäämu’ca naato conemjönö ijummadööje. Tönwanno töwännanö’e naato.

¹⁵ Ääma chäänöngato to’nomja naato, tösaadijaamödööcomo wetä. Tönwanno naato Wadan wei’jödö nönge mmaja, ñäädä Wanaadi wa’deuwödö ecammanei’jödö, Weoode nnedö. Töwö Wadan yaacö’je töweiye cönä’jaacä conemjönö dödö que jödaata cana’cadö.

¹⁶ Töwö cönäätäujoi conemjönö tönnö’jödö jo’tädööje. Odoocojaato ta’deudemjönö soto a’deucwe cöna’deuwöi chäwwä. Mädääje ñäädä Wadan ’jedö cöneedennanö’joi.

¹⁷ Ñanno yääja’como naato tuna judu sede’taajä töweiye naichöje, ca’dutu jejeichä nemannäjöödö töweiye naichö nönge mmaja. Tönwanno yeicho’comooje tödööajä na tööjato.

¹⁸ Iiña mmädä töwa’deuwe weneeneto, yääjönö wa’cä. Conemjönö que, tujuunu nijummadö que mmaja, tönencu’täiñe weneeneto ñanno chäänöngemjöncomo jonnoto yäänejeea’como.

¹⁹ Aashicha yeicho’como töneecamma weneeneto, conemjönö anoonöje mmaja töweichaameiñe tönwanno, yää to’jodheinchanei’jödö anoonöjeene weiñä yeiyajä.

²⁰ Tönwanno edä nono de’wono conemjönö jonno cönä’sancwaicho Cajiichaana Jesuuquidiito towaanäcäiñe tödöödö que, ñäädä Cäwaanacaaneichomo. Yää ’jeje yää aca mmaja töwaatashiichuudäja’comjäcä, chäwwä töwooto’jodheinchaja’comjäcä mmaja, cone’da’cä jeene yeicho’como na yaawä, jenaadä yei’jocoomo o’nä’cä jeene.

²¹ Chäänöngato weiñä jäcä aneeta’da yei’jocoomo mmaane äächädääjemma choone’nadiiyöcoomo eichö. Yää cone’da’cä jeene na, waanontänä aashichaato töwwäiñe u’ajä jonno yä’sancwajoodöcoomoone.

²² Ñanno naato yääje wä’dönä naichöje: “Sö’na töweenaduudu döiña töwennaca töweiye nai; cuushi töjööajä socoojato aca mmaja ecoodoima iichädö;” quee wä’dönä töweiye naichöje naato.