2 CODINTIYO 7 - Wanaadi A'deddu

¹ Mädääje na jimmä umjummadö; mädääje cöwwäiñe Wanaadi necamma’jödö na. Yääje yeijäcä quiichoccatäiye cöcoone’maneichomoojato, yää cäjööcomo choone’majaicho, cötö’tajäätödööcomo choone’majaicho mmaja. Wanaadi ñontancädä chäänönge jeene cä’tutäiye chäwwä.

Codinto ñancomo wwä töweichöcoomo sha’dumincha’jödö

² Ñaa jummatääcä. Soto jäcä conemjönö ännö’da ñaa na, soto änsadiijannä’ca’da mmaja, anencu’tä’da mmaja.

³ Ajiiyeme’jätöödöcoomoje’da yääje wä’döa. ¿Yaaje jönca wä’döaanä äwwäiñe, mämjummaato, quee? Yääje yeijäcä nudä weiya’jäcä jeiñe mma, wääma’jäcä jeiñe mma ajummadööcomooje dea wa’de.

⁴ Jooje ta’cwaiñe wa äjääcäiñe, aashicha äjääcäiñe töwa’deuwe wäänene dea. Änwanno jäädu’tätä määnetääne; jooje töwäntunaanö’e ñaa weichaame ta’cwaiñe ñaa tö’tamme’jotä määnetääne.

⁵ Maasedooniya ña ñaa wä’dö’jödö jonnoto’jödöödä täncanoode’da ei’cha ñaa na; wä’yunaacanä mma ñaa jäcä weneene, ñaa wätä’maminchajoodö mmaja, tösaade ñaa tö’tajäätödö mmaja.

⁶ Yääje yeichaame Wanaadi ñaa jädu’täne ñaa döiña Tiito enno’jadö que. Wanaadi ñäädä yä’yunaacajaajä jädu’tänei.

⁷ Tiito wä’dö’jödö jäcä mma’da ta’cwaiñe ñaa cönä’jaacä, äjääcäiñe ta’cwaiñe töwö yeijäcä mmajaane. Töwö ñaa wwä cöneecammajäätöi ñaa ene’se aweichöcoomo, wentumje aweichöcoomo mmaja, jummatä aweichöcoomo mmaja. Yää etaadö’jo jooje’cä ya’cwainchane yaawä.

⁸ Yää jajeeda wimennäneedö que wentumje ayöödöjo’jocoomo weichaame öwwä, cone’da yöödö’da na eduuwa. Yaawä cone’da wä’jaaquennö’je wentumje ömmennä’jödö ayöödöjo’jocoomo weijäcä; eduuwa yoowanääcä na a’dhe mma cone’da äwä’döjo’jocoomo yeichö.

⁹ Yääje yeijäcä ta’cwaiñeene wa, cone’da äwä’döjo’jocoomo jäcäinchädä’da yeichaame, aweeconeecadööcomo jonaane cone’da äwä’döjo’jocoomo weijäcääne. Wanaadi woijato que cone’da mä’döjootäne; yääje yeijäcä cone’da’da cöneiyacä yää.

¹⁰ Yää Wanaadi woijato que cone’da wä’döjoonä tötö’tajäätödö wesa’duminchadö nejoodöja; yää neja’ca yaawä wääwanaacatoojoje. Mädä nöngato que cone’da wä’döjoonä cone’da tödööemje’da na. Edä nono de’wono woijato que cone’da wä’döjoonä mmaane wäämanä nejoodöja.

¹¹ Änwanno Wanaadi woijato que cone’da mä’döjootäne. Yää aweeconeeca’seiñe ayöödöjootäne yaawä, chäänönge awei’sheiñe ayöödöjootäne dea; conemjönö jäcä adheetömaajotääne, adheecatoncatääne dea. Yaawä yeene’se mä’ja’quene; ñäädä yää conemjönö tödöönei yäätuuja’se mmaja ayöödöjootäne dea yää Wanaadi woijato que cone’da mä’döjootäneedö. Tameedä mädä chäänönge aweichöcoomo neneeja.

¹² Yääje yeijäcä äwwadäädäiñe wimennäne ñäädä conemjönö dönei jäcäinchädä’da, ñäädä chääjäcä conemjönö cönnöichö jäcäinchädä’da mmaja; yää wimennäne odhoowanääcäiñe yeichö wetä Wanaadi owaadäädä ñaa jummatä aweichöcoomo.

¹³ Yääje yeijäcä ta’cwaiñe ñaa na. Ta’cwaiñe’cä jeene mmaja ñaa na dea Tiito ta’cwaiñe yeijäcä; töwö ajaadäiñe yeichö tameedä änwanno ma’cwaimatääne.

¹⁴ Tiito wwä äjääcäiñe aashicha wa’deuwö’jödö jäcä ejöichä’da weiyaqueene. Äwwäiñe chäänönge töwa’deuwe ñaa weneene; mädääje mmaja chäänönge Tiito wwä äjääcäiñe ñaa wa’deuwö’jödö cöneeja’cai chea.

¹⁵ Änwanno Tiito a’deddu tödööcoije mä’ja’quene; aashicha mmaja töwö mödöötäne dea, ñontancädä. Yääje yeijäcä töwö jooje ajummatäiñe weneene yääje awei’jocoomo jäcä tötö’tajäätödaawä.

¹⁶ Öwö ta’cwaiñe wa chäänönge aweichöcoomo yoowanääcä yeijäcä.