2 CODINTIYO 6 - Wanaadi A'deddu

¹ Yääje yeijäcä, Wanaadi jadoono wetaadawa’cajoodöje ñaa weijäcä, edääje ñaa mänwätuujaato: Töwäädämmatooje’da tödöötäcä äwwäiñe Wanaadi nutuudu aashichaato.

² Edääje töwö Wanaadi nä’döa, dha’deddu imennaajä jäcä naadö: Chu’nädö aca yä’döa’jäcä adha’deddu wetaane; wääwanaacatoojo cu’nädö awä mani’wa’täne; quee nä’döa. Chu’nädö aca yä’döaajä mädä eduuwa; wääwanaacatoojo cu’nädö mädä eduuwa caatoodö.

³ Soto sadiijanto’como döancädä’da ñaa weneene, cone’da ñaa tadaawaajui jäcä ya’deuwödööcomo queiñe.

⁴ Wanaadi anoonöje töweichö töwäänejo ñaa weneene tameedä ñaa weichö jäcä, aashicha töwääta’maminchajoodö shinchädö que, aashicha töwäntunamjödö shinchädö que mmaja, tameedä conemjönö awä mmaja,

⁵ töwaataiju’jojootödaawä mmaja, jedeesoje töwä’döjoodawä mmaja, töjääcä wewoodoichanaawä mmaja, tötaadawaajui tödöödawä mmaja, wetu dhetuncadaawä, ämi dhetuncadaawä mmaja.

⁶ Chäänönge töweichö que Wanaadi anoonöje ñaa weichö töwäänejo ñaa weneene dea, chäänöngato jäcä towaanojo’ne töweichö que mmaja, aashicha tönshinchä töweichö que mmaja, ta’cwaiñe töweichö que mmaja, Epíiditu Santo ’je töweichö que mmaja, chäänöngato wä’jummanä ’je töweichö que mmaja.

⁷ Weishi’jonä que’da töwa’deuwe ñaa weichö que Wanaadi anoonöje töweichö töwäänejo ñaa weneene, Wanaadi jäduudu ’je töweichö que mmaja. Chäänönge weiñä töwaichadööje tönnöe ñaa weneene, töwääwontotoojoje mmaja.

⁸ Aneedawä aashicha ñaa dötä soto weneeneto, aneedawä ’quene ñaa tu’de’tätä; aneedawä aashicha ñaa jäcä töwa’deuwe weneeneto, aneedawä ’quene cone’da. Aneedawä äncu’tännamooje ñaa e’tätä weneeneto, aneedawä chäänönga’comooje.

⁹ Aneedawä töjimmä nönge’da soto ñaa dötä weneeneto, aneedawä ’quene töjimmä nönge. Töwäämatoojojaato töneene ñaa weichaame nudä dea ñaa na; tömaamincha ñaa weichaame mmaja, ääma’da ñaa na;

¹⁰ wentumje ñaa weichaame mmaja, ta’cwaiñe dea ñaa weneene; tönsomaaque’da ñaa weichaame jooje anejjacoomo ñaa ninshoma’taato. A’ca’como nönge ñaa weichaame tameedä ñää wwä na.

¹¹ Änwanno jimmä Codinto ñancomo, tameedä ñaa tö’tajäätödö wecammai äwwäiñe, ajummatäiñe ñaa weijäcä.

¹² Caado’da äjääcäiñe ñaa weichaame änwannoone mädääje maato.

¹³ Edääje wa’döa äwwäiñe, dhanwa tönnacoomo tönwätuuja töweiye naichöje: Änwanno jummajai maato, ajummatäiñe waadöje mmaja.

Wanaadi nudooto weichojooje cöweichöcoomo

¹⁴ Ääweichacoonoje meichäi’che quedeiyentejöncomo jadäiñe; äänönge’da ñanno jadäiñe oojodööjai maato. ¿Aaquene mmaja chäänöngato ääweichacoonoje eichöde’ chäänöngemjönö jadä? ¿Aaquene tawaanato tööjato aca eichö deeade’ ?

¹⁵ ¿Ane’cäämö jäcäinchädä Quidiito oojodööjai ñai Caajuushawa acä? ¿Ane’cäämö jacäinchädä quedeiyente äänönge eijai ñai quedeiyentejöönö acä?

¹⁶ ¿Aaquene mmaja Wanaadi weichojo oojodöödö deeade’ chu’taajä acä? Änwanno Wanaadi nudooto weichojooje maato. Töwö Wanaadi chea cönä’döaacä: Öwö yo’tacaiñe wa’de; chääjadäiñe wäämannä’a’de. Yaanadiiyöcoomoje wa’de; tönwanno naato’de sootoije; quee Wanaadi cönä’döaacä.

¹⁷ Edääje mmaja töwö cönä’döa’dea: Adheeja’catääcä dhantawonnoiñe; shancwatääcä; quee nä’döa Cajiichaana. Conemjönö mma manaajojootäi’che; yaawä sootoije männöaato’de.

¹⁸ Öwö oomotoncomooje wa’de; änwanno önnacoomoje maato’de; quee nä’döa Cajiichaana O’jodhaato; quee Wanaadi cönä’döaacä.