2 CODINTIYO 5 - Wanaadi A'deddu

¹ Edä cäjööcomooje naadö maa töwaatameemö nönge na. Cönwanno cowaanäcäiñe na edä wataamea’jäcä anejja maa cöwwäiñe töweiye yeichö caju ña, soto namäädöjöönö, Wanaadi namäädö yeichöödäjaatoone.

² Eetä caatoodawäädä cätäncano’taato caju ñano cömmaichomo ejoodö’se cöweichomjäcä.

³ Yää cöwwäiñe na’de töwonque’da töweichö queiñe camiisha awä wewontänä töweiye naichöje.

⁴ Edä cäjööcomooje naadö aca cöweichöcoomo cätäncano’taato, catansu’daato dea; yääje yeichaame cäjööcomo e’nomja’se’da cöweichöcoomojöönö mädä, mänööne ejoodö’se caato, caju ñanoone. Yaawä edä cöweichöcoomo töwaatameemöje naadö noto’jodheinchaja’de töwaatamemjönö wwä.

⁵ Wanaadi chea yääje töweiyaamoje cödöötäne. Töwö cöwwäiñe cuntui Epíiditu Santo, tameedä cöwwäiñe töweiyemö utuudu waajäntädööje.

⁶ Yääje yeijäcä ta’cwaiñe cäänetääne. Cowaanäcäiñe na eetä caatoodawäädä Cajiichaana Jesuuquidiito dö’tä’da cöweichöcoomo.

⁷ Cönwanno ecamjödö que caato, eneedö que’daane.

⁸ Cönwanno ta’cwaiñe cäänetääne edä cäjööcomooje naadö e’nomja’se cöweichaameiñe, Cajiichaana jadä cöweichöcoomo wetä yaawä.

⁹ Yääje yeijäcä Cajiichaana Jesuuquidiito a’cwaimadö encano’täjai caato, nudä cöweiya’comjäcä, töwääma cöweiya’comjäcä jeiñe mma.

¹⁰ Tameedä cä’mencajaato’de Quidiito wwä; yaawä cöwaadäiñe cäje’jocoomo queiyato’de chäwwä, edä nono de’wä cönnö’jocoomo jäcäinchädä, aashichaato jeiñe mma, conemjönö jeiñe mma.

Wanaadi jadä ääweichacoonoje cöweichöcoomo

¹¹ Yääje yeijäcä, Cajiichaana Jesuuquidiito tönontämje yeichö ñaa owaanäcä yeijäcä, soto wwäiñe töneecammajä’e ñaa weneene. Töwö Wanaadi dhowaanäcä na ñaa weichö; änwanno mmaja ñaa weichö chö’tamme’jai maato dea.

¹² Ñaa wewaacömaadöjöönö yeichaame mädä. Töjöiye’da ñaa jäcä awa’deuto’comoojeene yääje ñaa na’deuwa. Yaawä anejjacoomo soto eccujo’to’como ’je’da’da eijai maato. Tönwanno o’jodhe tötö’tajä’e weneeneto ye’wono jäcäinchädä mma, cone’da töweichaameiñe tödo’tacaiñe.

¹³ Tö’jeta ñaa weiya’jäcä Wanaadi wwonooje mädääje ñaa na. I’jeta’da ñaa weiya’jäcä mmaane äwwoncomooje mädääje ñaa na.

¹⁴ Quidiito wwä ñaa jummadö yeijäcä anejjeja eijai’cha ñaa na. Ñaa owaanäcä na tooniyaano dhanwa wääma’jödö tameedä soto jäcäinchädo’comooje; yääje yeijäcä tameedä naato yä’ja’a’como nönge.

¹⁵ Quidiito cönäämai tameedä soto jäcäinchädäiñe ñanno nudä naatoodö töwwoncomooje mma’da nudä yeichöcoomo wetä yaawä, ñäädä töjääcäinchädäiñe cönäämaichö wwonoojeene, töjääcäinchädäiñe cönaadoncaichö mmaja.

¹⁶ Yääje yeijäcä yäänedö que mma soto aneene’ma’da ñaa weneene. Jenaadä Quidiito yäänedö que mma töneene’ma ñaa cönä’ja’dö’je; yääje’daane eduuwa.

¹⁷ Ñäädä Quidiito jadoono eduuwaato amoodetaanö ñäädä. Yää jenaado’jä töwaatame yaawä; tameedä eduuwaatoje na yaawä.

¹⁸ Tameedä mädä Wanaadi woijatooje na. Töwö töjaadä ääweichacoonoje cödöötäne Quidiito ai. Ñaa tadaawaajuije cuntui töjaadä ääweichacoonoje soto tödöödöcoomo.

¹⁹ Edääje wä’dö’se weichö mädä: Töwö Wanaadi töjaadä ääweichacoonoje edä nono de’woncomo cönnöicho Quidiito ai; ñeejeque’näjöödöcoomoje choone’nadiiyöcoomo ännö’da cöneiyacä. Ñaa tadaawaajuije cuntui töjaadä ääweichacoonoje wä’dönä jäcä ecammajäätödö.

²⁰ Yääje yeijäcä Quidiito nanontädööje ñaa na. Wanaadi chea äwwäiñe na’deuwa ñaa ntai. Yääje yeijäcä Quidiito woije edääje ñaa nä’döa äwwäiñe: Ääweichacoonoje ä’dötääcä Wanaadi jadä.

²¹ Quidiito conemjönö ännö’da cöneiyacä; yääje yeichaame cöjääcäinchädäiñe Wanaadi Jesuuquidiito cönnöi conemjönö nönge, töwö Quidiito jadä cöwä’dödööcomo que Wanaadi weichö aashichaato cöwwäiñe töweiye yeichö wetä yaawä.