2 CODINTIYO 4 - Wanaadi A'deddu

¹ Yääje yeijäcä ejääduqueejö’da ñaa na, Wanaadi nödööjo’jödö yeijäcä edä ñaa tadaawaajuije naadö, wentumje äneetä töweichö woije ñaa wwä cuntuichö.

² Tameedä chäänönge’da weiñä töjo’ma na ñaa wwä, yääjönö wa’cä wäänejoonä mmaja. Ätäncu’tä’da mmaja ñaa na dea, Wanaadi a’deddu äncamjiyaaca’da mmaja. Chäänöngato mmaane töneecammajä’e ñaa weneene. Mädääje täcaadö tönnöe ñaa weneene Wanaadi owaadäädä; tameedä soto ñaa weichö chö’tammecöiyeto yaawä.

³ Aashichaato wätunnä töneecammajä’e ñaa weneenedö ääta’da yeiya’jäcä töwännanö’a’como wwä mma ääta’da na.

⁴ Tönwanno aneecamjö’da töweichomjäcä tötö’tajäätödööcomo cöntööjannä’cajoicho edä nono edhaajä wwä, tänuuque’da töweichöcoomo wetä, aashichaato wätunnä nawaananö’cadö eneedö queiñe töwwäiñe; yää wätunnä aashicha Quidiito weichö jäcä necammajä’a, ñäädä Wanaadi cu’taajä.

⁵ Ñaa wwä ecammajäätödaawä töweichö dea aneecammajäätö’da ñaa weneene, Jesuuquidiito Cajiichaanaje yeichööne. Jesuuquidiito junnei äwwäiñe tödönnamooje mma töwääcamma ñaa weneene.

⁶ Ñäädä Wanaadi, tawaanato que tööjato yeijonei’jödö, ñaa tö’tajäätödö cönweijoi chea, yää inweijodö que aashicha Wanaadi weichö ñaa owaanäcä yä’dödö wetä, yää Jesuuquidiito jedö jäcä naadö.

Ecamjödö que weiñä

⁷ Mädä aashichaato ñaa wwä u’ajä na ädiiñä nono döaajä aca ewöötö’taajä töweiye naichöje, owaanäcä yeichö wetä Wanaadi jäduudu aashichaatoje yeichö, ñaa jäduuduje’daane.

⁸ Jooje ñaa ansu’dänei töweiye yeichaame, cone’da ñaa dö’da weneene; taquiiñuque ñaa weichaame mmaja, ejääduqueejö’da ñaa weneene dea.

⁹ Tutu’de’täämöje ñaa weichaame, Wanaadi ñaa e’nomja’da na. Ñaa ewantäjä’taame, ääma’da ñaa weneene.

¹⁰ Jesuuquidiito cöneemaichodööje mmaja ñaa emaajai weneeneto dea; mädä weneene Jesuuquidiito weichö eneejotoojoje ñaa wwä.

¹¹ Yeichöje töwäämatoojojaato töneene ñaa weneene Jesuuquidiito jäcäinchädä; mädääje Jesuuquidiito jäduudu töneenejo ñaa weneene, töwäämaamöje ñaa weichaame.

¹² Mädääje na; töwäämatoojojaato töneene ñaa weneene; änwanno mmaane aashicha weiñä daja töneene määnetääne.

¹³ Wanaadi a’deddu imennaajä nä’döa: “Öwö wecaanö’ne, yääje yeijäcä ya’deune;” quee. Ñaa mmaja ñaa necaanö’a dea; yääje yeijäcä ñaa na’deuwa dea.

¹⁴ Ñaa owaanäcä na ñäädä yäämaajo jonno Cajiichaana Jesuuquidiito adoncanei’jödö wwä ñaa adoncatoojo mmaja Jesuuquidiito jadä; yaawä ajaadäiñe töwö Wanaadi Jesuuquidiito weichojo dö’tä ñaa adääa’de.

¹⁵ Tameedä mädä äjääcäinchädäiñe na; yaawä Wanaadi nutuudu aashichaato jooje yeejanga’jäcä jooje mmaja naato’de Wanaadi wwä aashicha töwa’deuwaamo; aashicha wa’deutojooje Wanaadi na’de yaawä.

¹⁶ Yääje yeijäcä ejääduqueejö’da ñaa weneene. Ñaa ejö wataametaame, ñaa do’tacaano mmaane anooto waadäi töwaatö’nä’e’cä mma naatö’nä’a.

¹⁷ Mädä wäntunaanö’nä’cä a’dhatooje mma na; yää eje’jödö na’de aashichaato yeichöödoto, yää wäntunaanö’nä e’jodhaato.

¹⁸ Täneetojöönö ñaa nencano’ta, äänejöönööne. Tameedä täneeto a’dhatooje mma töweiye nai; äänejöönö mmaane yeichöödotooje.