2 CODINTIYO 3 - Wanaadi A'deddu

Eduuwaato weiñä Wanaadi necamma’jödö

¹ ¿Ñaa wewaacömaadöje ca mädä nichö’taanä äwwäiñe mädääje ñaa na’deuwaadö? Anejjacoomo weneenetoodöje’da ñaa na; jajeeda imennaajä chäänönge töweichö ecammatoojo tujunne’da na ñaa wwä. Äwwäiñe täneejoomö yääjato imennaajä tujunne’da na dea; ñaa jäcä yääjato ämmennädööcomo tujunne’da mmaja.

² Änwanno dea dajaane jajeeda imennaajä nönge maato, chäänönge ñaa weichö ecaademe’jonnamooje; änwanno maato ñaa tö’tajäätödö jäcä imennaajä eijai ñaadöje, tameedä soto owaanocoomoje, ña’de’tädööcomooje mmaja.

³ Änwanno Quidiito nimennädö nönge maato, ñaa mmaane yää imennaajä adääjaajä adäänei’jödööje ñaa na. Yää tömennä na imennotoojo que’da. Epíiditu Santo yää imennäneije na, ñäädä Wanaadi nudooto dö’sennoto we’ajä. Täju jäcä’da yää tömennä na, adheewanööcomo jäcääne.

⁴ Wanaadi ecaanö’ancädä yääje wimenna, Quidiito jäcäinchädä.

⁵ Ñaa dea mma chäänönge tödööjai’cha ñaa weichaame; Wanaadi jonnoone ne’a ñaa wwä tödöötojo.

⁶ Töwö Wanaadi ñaa döne eduuwaato weiñä töneecamma’jödö ecammajä’nnamooje. Yää eduuwaato weiñä Wanaadi necamma’jödö na imennaajä woije tödöödö que’da, Epíiditu Santo nutuudu weiñä queene. Yää jenaado’jä waanontänä imennaajä wäämanä mma necamma; Epíiditu Santo mmaane weichojo nu’a.

⁷ Yää jenaado’jä waanontänä Moisé wwä cönä’tuichö täju jäcä cönä’mennäi. Yaawä ñanno iisadaaediitacoomo Moisé jedö ene’majai’cha cönä’ja’to tawaane chääjäcä yeijäcä, töwaatameemö mma yeichaame yää tawaanato.

⁸ Yää imennaajä wäämanä ecammatoojo yeichaame aashichaato eneejancädä cönä’tui; töwaacö’je mma Epíiditu Santo necammadö, aashichaato jaiñoone neneeja, yää e’jodhe’cä jeene.

⁹ Yää wäämatoojodä aashichaato eneejancädä cönä’ja’ne’; töwääcö’je mma mädä Wanaadi jadä wä’dönä ecammatoojo.

¹⁰ Yää aashicha cönä’ja’dö aashicha’da na eduuwa, to’jodhaato weejö’jödö weijäcä.

¹¹ Yää töwaatameemödä aashichaato eneejancädä cönä’tuiñe; töwaacö’je mma töwaatamemjönö, aashicha’cä jeene.

¹² Mädä töneecanö’e ñaa weijäcä tösaade’da töneecammajä’e ñaa weneene,

¹³ Moisé cönä’ja’döje’daane; töwö cönä’je’dui iisadaaediitacoomo wwäiñe yää tawaanato töwaatameemö eneedö queiñe.

¹⁴ Ñanno äntö’tammecö’da cönä’ja’to; eduuwa naadö jona tödööene yää jenaado’jä Wanaadi necamma’jödö imennaajä töwwäiñe a’de’tädaawä ñanno judhío töje’ducaato nönge naato, aneeta’da. Quidiito ecamjödö que mma yää ije’dutuucomo ääsecaajai ña.

¹⁵ Eduuwa naadö jona tödööene, Moisé nimennä’jödö töwwäiñe a’de’tädaawä chö’tajäätödööcomo töwaata’due na.

¹⁶ Cajiichaana ecaanö’a’jäcä yää dha’dutu ääsecaajai ña.

¹⁷ Cajiichaana ñäädä Epíiditu Santo. Yäätä Epíiditu Santo weichö dö’tä aashicha weiñä ’je.

¹⁸ Yääje yeijäcä cönwanno jecuude nönge caato, Cajiichaana Jesuuquidiito weichö queenejaato, töje’duque’daiñe cöweichomjäcä. Quidiito nönge mmaja cä’döaato dea, aashicha cöweichöcoomo jonno aashicha’cä jeene cöweicho’como aca tödööene. Cajiichaana woije dea mädääje caato, ñäädä Epíiditu Santoje naadö dea.