2 CODINTIYO 2 - Wanaadi A'deddu

¹ Yääje yeijäcä wentumje ayöödöjooto’como dha’me adöiñaiñe öötä’se’da wa.

² Öwwä wentumje ayöödöja’comjäcä ¿änääcö ya’cwaimaneije eijai ñai yaawä? ñanno mmaane aweiya’como ya’cwaimannamooje eijaicho’jödö.

³ Yääje yeijäcä mädääjatooje jajeeda wimennäne äwwadäädäiñe, yaawä adöiñaiñe ööta’jäcä wentumje weichö quieñe äjääcäiñe, ya’cwaimannamoojato’jödö jäcäiñe. Yoowanääcä cönä’jaacä öwö ta’cwaiñe weiya’jäcä änwanno mmaja ta’cwaiñe eijai aweichöcoomo.

⁴ Jooje wentumje weichö que yää äwwadäädäiñe wadoojoneedö wimennäne; yeewanö jäcä cone’da wä’jaaquene, töwaamoone. Wentumje ayöödöjooto’comooje’da yää wimennäne, jooje ajummatäiñe weichö odhoowanääcäiñe yeichö wetääne.

Conemjönö tödöönei nödö’jödö encwanno’jojai cöweichöcoomo

⁵ Ñäädä wentumje yöödöjoonei’jödö öwö mma’da wentumje yöödöjoone, änwanno mmajaane, tameedä’da aweichaameiñe.

⁶ Chääwa’cä ñäädä michuuseijatääne, awe’jummadööcomo’jo chääjäcä adha’deutäneedö.

⁷ Yääje yeijäcä anejjejaane eijai maato eduuwa, encwanno’jojai maato iiñö’jödö, töwö ijäädu’täjai maato dea, to’jodheene mma wentumje ei’ño yaawä.

⁸ Yääje yeijäcä edääje wä’döa äwwäiñe: Tumjumma dea aweichöcoomo eneejotääcä’de eduuwa chäwwä.

⁹ Mädä jäcä äwwadäädäiñe wimennäne odhoonejaadöcoomoje, tameedä waanontädö tödööjai aweichöcoomo eneedö wetä.

¹⁰ Ñäädä choone’nadiiyö anencwanno’jodööcomo öwö mmaja wencwannä’ja dea. Yää wencwanno’joneedö äjääcäinchädäiñe wencwanno’jone, Quidiito owaadäädä,

¹¹ Caajuushawa wwä co’jodheinchadööcomo queiñe. Cönwanno cowaanäcäiñe’da’da töwö iiñödö.

Todoowa ña wentumje Paudo wei’jödö

¹² Quidiito wätunnäi aashichaato ecammajäätödö wetä Todoowa ña wä’döa’jäcä Cajiichaana tadaawaajui dötoojo wedantäneedö’je;

¹³ yaawääne’ täncanoode’da chö’tajä’jai’cha wä’jaaquene, yäätä weichacoono Tiito aneejodö’da wei’jödö weijäcä. Yääje yeijäcä wääcammane yaawä ñanno Todoowa ñancomo wwä; Maasedooniya ña wötääne yaawä.

Quidiito jäduudu que e’jodheinchajai cöweichöcoomo

¹⁴ Aashicha tä’tämje Wanaadi ña; töwö Jesuuquidiito ai ñaa e’se’tätä weneene, ñaa wwä e’jodheinchadö wetä. Ñaa ai töwö Wanaadi aashichaato wätunnä nemeecanta tameedä yeichö wa’cä, juu shimi’jotoojo jodö töweiye naichöje.

¹⁵ Wanaadi wwä Jesuuquidiito nutuudu juu shimi’jotoojo yau’cwaajä jodö töweiye naichöje ñaa na; yää näämecanta yääwanaaca’como antawäiñe, yännanö’a’como antawäiñe mmaja.

¹⁶ Ñanno yännanö’a’como wwä yää jodö na wäämatoojoje; yääwanaaca’como wwä mmaane nudä weichojooje daja. ¿Änääcö mädä wa’coto tadaawaaju ännödööde’ ?

¹⁷ Töwäätätöijatoojoje Wanaadi a’deddu ännö’da ñaa na; oncone’ma’da mmaja, anejjacoomo tönnöe weneenetoodöje’da. Chäänönge töweichö queene Wanaadi a’deddu töneecammajä’e ñaa weneene, Wanaadi nanontä’jödö woije, Wanaadi owaadäädä mmaja, Quidiito jadoonoje ñaa weijäcä.