2 CODINTIYO 13 - Wanaadi A'deddu

Yä’ca’jödö

¹ Aaduwaawädeeto mädä eduuwa adöiñaiñe wöta’dedö. Aacä, aaduwaawä jeiñe mma enennamo’jödö necammajäätödööcomo etaadö’joone tameedä wichooneca’de.

² Aacädeeto ai weiyaquennawä wiyäätuujaneeto ñanno conemjönö tönnöe cönä’ja’todö; eduuwa ajaadäiñe’da weichaame yääje wä’döa dea ñanno wwäiñe, anejjacoomo conemjönö dönnamo wwä mmaja: Eduuwa ööta’jäcä wentumje adheenetäiñe’da wa’de.

³ Yaawä Quidiito woije töwa’deuwe weichö odhoowanääcäiñe na’de, eduuwa aneecamjö’da aweichaameiñe. Ñäädä Quidiito jäduuje’da’da weneene adhantawäiñe, jäduujeene.

⁴ Töwö cuduusa jäcä cönaatajoijoi jäduujemjönö nönge; yääje yeichaame Wanaadi jäduudu woije nudä na eduwwa. Ñaa mmaja jäduuje’da ñaa na dea, töwö cönä’ja’döje mmaja; yääje yeichaame Quidiito jadä ñaa weijäcä Wanaadi jäduudu que ñaa weichö na’de, ä’wa’tännamooje ñaa weichö wetä.

⁵ Änwanno deaane ä’mencatääcä chäänönge aneecamjödööcomo weichö jäcä. Äwwäädäiñe äänetääcä. ¿Odhoowanääcäiñe’da ca’ nai Jesuuquidiito ataacaiñe yeichö, quedeiyente neeneje aweiya’comjäcä?

⁶ Änwanno odhoowanääcäiñe eijai ña chäänönge’da’da ñaa weichö.

⁷ Wanaadi wwä töwa’deuwe ñaa weneene conemjönö ännö’da aweichöcoomo wetä. Aashicha ñaa weichö ecaademe’jodö jäcäinchädä’da yääje Wanaadi wwä töwa’deuwe ñaa weneene, chäänönge aweichöcoomo wetä mmädääne, anejjacoomo wwä ñaa ementätaame.

⁸ Chäänönge weiñä juntaca ä’jädu’täjai’cha ñaa na; tö’wa’tä mmaane i’wa’täjai ñaa na.

⁹ Yääje yeijäcä cone’da ännö’da ñaa na jäduuje’da töweichö, jäduuje dea aweiya’comjäcä änwanno. Wanaadi wwä wa’deunäje dea ñaa na’de chäänönge jeene äwä’dödööcomo wetä.

¹⁰ Edä wimenna äwwadäädäiñe adöiñaiñe öötääje, jäduuje a’deuwö’da weichö wetä yaawä adöiñaiñe ööta’jäcä, yää jäädudu Cajiichaana nutuudu que. Töwö Cajiichaana Jesuuquidiito yää cuntui öwwä äjäädu’toto’comooje, adheuto’comooje’daane.

¹¹ Mädääje mma wä’dö’se wä’jaanä, jimmä. Chäänönge aweichöcoomo encano’tätääcä; ä’jädu’tätääcäde; aata’deucwe eichäcä; täncanoode’da eichäcääde. Yaawä Wanaadi ajaadäiñe eijai ña, ñäädä täncanoode’da weiñä edhaajä, wä’jummanä edhaajä mmaja.

¹² Töwä’jumma aweichöcoomo eneejancädä ata’dejjatääcä.

¹³ Tameedä quedeiyentecoomo ta’deujocoomo nadääjato äwwadäädäiñe.

¹⁴ Cajiichaana Jesuuquidiito nutuudu aashichaato äwwäiñe yei’she wa, wä’jummanä Wanaadi nutuudu mmaja, Epíiditu Santo ni’wa’tädö mmaja. Amén.