2 CODINTIYO 1 - Wanaadi A'deddu

Yaajäntä’jödö

¹ Öwö Paudo, Wanaadi woije Jesuuquidiito nanontädö, cöjimmotoncomo Tiimoteeo acä ñaa nimenna äwwadäädäiñe, änwanno ñaa jimmä, Wanaadi ecaanö’nnamo Codinto ñancomo; tameedä Wanaadi sotoi Acaaya ña naatoodö wwadäädä mmaja ñaa nimenna dea.

² Aashichaato, täncanoode’da aweicho’como mmaja, äwwäiñe yei’she wa, Cumöötoncomo Wanaadi nutuudu, Cajiichaana Jesuuquidiito nutuudu mmaja.

Paudo wäntunamjö’jödö

³ Aashicha wa’deutojooje na Cädhaajotoncomo Jesuuquidiito Wanaadiyö, ñäädä Yuumö. Töwö na wentumje äneetä weiñä edhaajäje, wejäädu’tänä edhaajäje mmaja.

⁴ Töwö Wanaadi ñaa jädu’tätä weneene tameedä ñaa wäntunamjödö jäcä, anejjacoomo wäntunamjödö mmaja ijäädu’tädööcomo wetä yaawä ñaa wwä, yää que dea, Wanaadi wwä ñaa jädu’tä’jödö que dea.

⁵ Quidiito jäcäinchädä jooje ñaa wäntunaanö’taame Quidiito dea ñaa jäduudu tunu’e weneene, jooje mmaja.

⁶ Yääje yeijäcä ñaa wäntunamjödö weneene äjäädu’tädööcomooje, adheewanaacadööcomooje mmaja; Wanaadi wwä ñaa jädu’tädö ’quene änwanno äjäädu’tädööcomooje na dea, adheewanaacadööcomooje mmaja. Mädääje aashicha shinchäjai maato yää dea wäntunaanö’nä, töiñetunca ñaa weneenedö dea.

⁷ Yäätäädä äjääcäiñe ñaa tö’tajäätödö na, ñaa owaanäcä yeijäcä äwäntunaanö’taameiñe Wanaadi ä’wa’tätäiñe yeichö.

⁸ Jimmä, odhoowanääcäiñe yei’she wa Aasiya ña ñaa wäntunamjö’jödö. Ñaa wwä shinchädö e’jodhe deja ñaa maminchaneeto; äämajaicho wa’cä ñaa cöntö’taacä yaawä.

⁹ Tämaamoje e’ta’como töweiye naichodööje ñaa cöntö’taacä yaawä. Yää ñaa wwä eneejodö cönä’jaacä töjäädudu que mma shinchäjai’cha ñaa weichö, Wanaadi jäduudu que mmaane, ñäädä yäämaajo jonno soto adoncajaicho.

¹⁰ Töwö Wanaadi ñaa ewaanacaane yää joojato conemjönö ñaa emaajaicho jonno; mädä nöngato we’a’jäcä mmaja töwö ñaa ’wa’ta’dede. Töwö dea ñaa necaanö’a ñaa ’wa’täneije.

¹¹ Änwanno mmaja ñaa ’wa’täjai maato dea Wanaadi wwä awa’deuwödööcomo que. Jooje soto Wanaadi wwä ñaa jäcä ya’deuwa’comjäcä, jooje naato’de yaawä aashicha Wanaadi jäcä töwa’deuwaamo, ñaa jäcä aashichaato iiñö’jödö jäcäinchädä.

Codinto ña tä’da töwei’jödö jäcä Paudo necamma’jödö

¹² Ta’cwaiñe ñaa weneene, aashicha tötö’tajä’e ñaa weneene dea ñaa owaanäcä yeijäcä aashicha töwei’jödö, chäänönge töwei’jödö mmaja, edä nono de’woncomo antawäiñe, änwanno adhantawäiñe mmaja. Ñaa sejjedö que’da mädääje ñaa cönä’jaacä; Wanaadiiñe ñaa ’wa’täne.

^13-14 Äwwadäädäiñe ñaa tömmennä weneene äwwäiñe ata’de’täjaicho mma, odhoowanääcäiñe eijaicho mmaja. Odhoowanääcäiñe yeichaame jooje’cä jeene odhoowanääcäiñe yei’she wa ñaa jäcä ta’cwaiñe eijai aweichöcoomo Cädhaajotoncomo Jesuuquidiito we’a’jäcä, äjääcäiñe ta’cwaiñe ñaa eijai ñaadöje mmaja.

^15-16 Mädääje äjääcäiñe tö’tajäätödö weijäcä awa’deene ädö’täcäiñe Maasedooniya ña öötä’se wä’jaaquennö’je, yää ’jeje iiñano’jödö ädö’täcäiñe mmaja wennacaadö wetä yaawä, aacädeene ta’cwaiñe aweichöcoomo wetä adöiñaiñe öötädö weijäcä, äwwäiñe yenno’jadö wetä yaawä Judheea ña.

¹⁷ Mädääje tö’tajäätödö cönä’ja’dö’je; ¿iiña mmädooto ca yää cönä’jaacä, yääje yeiya’jäcä? ¿Quedeiyentejöönö nönge tö’taanä äwwäiñe, aacä ya’deddu, “ee” quee mmaja, “ng’jn” quee mmaja?

¹⁸ Wanaadi dhowaanäcä na äwwäiñe ñaa wa’deuwödö aacääne’da yeichö; “ee” queeto de’wä “ng’jn” ca’da ñaa.

¹⁹ Ñäädä Jesuuquidiito, Wanaadi nnedö, ñaa cöneecammajäätöi äwwäiñe, Siidawaano mmaja, Tiimoteo mmaja, öwö mmaja. Ñäädä Jesuuquidiito a’deddu töweiye cönä’jaacä “ee” queeto de’wä “ng’jn” quee töwä’döancädä’da. Töwö Quidiito töwa’deuwö’jödö nönge ännö’da’da weneene;

²⁰ töwö tameedä Wanaadi necamma’jödö tönnöe weneene. Yääje yeijäcä aashicha Wanaadi jäcä cöwa’deuwödaawäiñe “Amén” quee töwä’döe cäänetääne, töwö Jesuuquidiito jäcäinchädä dea.

²¹ Quidiito jäcäinchädä aashicha Wanaadi ñaa döne; änwanno mmaja aashicha ayöödötääne dea; töwö cösoomatääne dea.

²² Töwö Wanaadi cömaadaca’ñätääne; cöwwäiñe cuntui Epíiditu Santo, yää cöwwäiñe töweiyemö utuudu waajäntädööje.

²³ Wanaadi owaadäädä edääje wä’döa; töwö dhowaanäcä na chäänönge wa’deuwödö yeichö: Wentumje ayöödöjoodöcoomo queiñe dajaane Codinto ña tä’da weiyaqueene.

²⁴ Aneecamjödööcomo jäcä adhaanontäjaiñe’da ñaa weichaame, yäätäädääne aneecamjödööcomo weiyajä; ä’wa’tädööcomo mmaane mädä ñaa wwä, jooje’cä ta’cwaiñe aweichöcoomo wetä.