1 TIIMOTEO 6 - Wanaadi A'deddu

¹ Ñanno tädhaajäca’como tädhaajotoncomo ñontäjai ñaato, anejjacoomo soto Wanaadi jäcä cone’da ya’deuwödööcomo queiñe, quedeiyenteje weiñä jäcä mmaja.

² Ñanno quedeiyente chäädhajootoncomo töjimmäje yeijäcäiñe mma onnontä’da eijai’cha naato. Aashicha’cä mmaane tödööjai ñaato, quedeiyenteje yeichomjäcä ñanno tötaadawa’cajonnamo, Wanaadi nijummadööje yeichomjäcä mmaja. Mädääje owaanomaacoto, yäätuujacooto’dede.

Ätäncano’tä’da weichojooje quedeiyenteje weinä yeichö

³ Anejja wwä chäänöngemjönö wätunnä que owaanoma’jäcä, Cädhaajotoncomo Jesuuquidiito a’deddu chäänönge aneecamjö’da yeiya’jäcä mmaja, quedeiyenteje weiñä jäcä woowanoomanä aneecamjö’da yeiya’jäcä mmaja,

⁴ ñäädä o’jodhaato wa’cä nääcanö’a; towaanojo’nemjönö töwö. Töwö wätunnä jäcä töwäätäccujäätödö yaacö’je na. Yää que we’neimmanä töwoojodööe weneene, wätäunä mmaja, cone’da wa’deunä mmaja, töweichacoono jäcä cone’da tö’tajä’nä mmaja,

⁵ wätäccujä’nä töwä’camjönö mmaja. Tameedä mädä noojodööa chö’tajäätödö wecoone’ma’como jäcäiñe, ñanno chäänöngato ’jemjöncomo. Tönwanno necaanö’aato quedeiyenteje weiñä ane’cä’cä cana’catoojoje yeiyaatäi. Yääja’como shancwacooto.

⁶ Chaana’catoojoje yeichaame yää quedeiyenteje weiñä, ätäncano’tä’da weiñä jadä yeiya’jäcä.

⁷ Cönwanno tänwase’da quennutääne edä nono de’wä; tänwase’da mmaja cöötaato’dede edä nono jonno.

⁸ Cäwanshiñööcomo töweiye yeiya’jäcä, cöwoomöcoomo mmaja, yää mma cöjoonaiñe eijai ña.

⁹ Ñanno tönsomaaque töwei’sha’como mmaane nä’yunaacajaato, nataajäijaato dea chäänöngemjönö ijummadö que; yää chäänöngemjönö woije wecoone’manä aca nätäämajaato yaawä. Yääje weiñä soto töncone’ma töweiye nai, tönennanö’ca mmaja.

¹⁰ Jödaata ijummadö tameedä conemjönö ju’jäje na. Yää jäcä töwäätätäädä töweichöcoomo woije anejjacoomo tösaadijange naato ecamjödö jonno; yää e’nei jooje conemjönö töneene weneeneto.

Cöneecamjödööcomo jäcäinchädä ewäänä’täjai cöweichöcoomo

¹¹ Amäädä Wanaadi anoonö mmaane tameedä mädoocomo jonno äänejeecä. Aashichaato mmaane encano’täcä, Wanaadi woije weiñä mmaja, ecamjödö mmaja, wä’jummanä mmaja, aashicha shinchädö mmaja, o’jodhe chö’tajäätö’da weiñä mmaja.

¹² Aashicha adheewänä’täcä cöneecamjödööcomo jäcäinchädä; chäänönge ajäichä yeichöödoto weiñä, yää chääjäcäinchädä mata’dejjajoonedö wannacoomo soto netaadöcoomoje määcammaaquennawä.

¹³ Edääje wä’döa äwwä Wanaadi owaadäädä, ñäädä tämeedä yeichö wa’cä weichojo u’nei, Jesuuquidiito owaadäädä mmaja, ñäädä Ponsiyo Pidaato netaadöje töwääcammadaawä aashicha cönääcammajäätöichö.

¹⁴ Edä waanontänä wödööja äwwä, äncu’naca’da mödöiye, täcammajä’emööje’da aweichö wetä, Cajiichaana Jesuuquidiito weejödö jonaane.

¹⁵ Töwö Jesuuquidiito Wanaadi woije nääneja’de tucu’nädö awä. Ñäädä mma ñäädä Wanaadi jäduujato, aashichaato mmaja, yäätonno ’jemjönö, tameedä cajiichaanacoomo Cajiichaanaichomo, tameedä ädhaamo Edhaajotoncomo mmaja.

¹⁶ Ñäädä mma töwö yeichöödoto. Töwö yeichojo na tawaanato aca, wötooto’jönö ña. Wanaadi eneenei’jödö ’je’da na soto, äänejöönö töwö yeijäcä. Töwö na aashicha wa’deutojooje, yeichöödäje tameedä Cajiichaanaje mmaja. Amén.

¹⁷ Yäätuujacooto edä nono de’woncomo tönsomaaca’como, o’jodhe chö’tajäätö’da yeichöcoomo wetä, mösooma jäcä jooje chö’tajäätödööcomo queiñe mmaja, töwaatameemö mma yeijäcä yää mösooma. Wanaadi jäcääne chö’tajä’jai ñaato, ñäädä nudooto, aashicha cöweicho’comooje ewontancädä’da cöwwäiñe tameedä u’nei.

¹⁸ Ñanno tönsomaaca’como yäätuujacooto, aashichaato tödöiyeto; aashichaato tödöödö queene ninshomaata’ña’to. Tamääne’da nei’ña’tode, u’coijeene.

¹⁹ Mädääje äcuudatooje tönsomaadöcoomo i’jummajai ñaato, yeichöödoto weiñä ejoodöiyeto yaawä.

Yä’ca’jödö

²⁰ Tiimoteo, tösoomaane shoomacä yää äwwä cönä’tuichö. Edä nono de’wono wewäätunnäichanä wwadäädä ijaanata’da eichä, iiña mmädooto wätunnä wwadäädä mmaja. Chäänönge’da yää weichaame towaanojo’ne weiñäje soto töne’tä weneeneto.

²¹ Yää nöngato ecamjödö que anejjacoomo tösaadijange naato ecamjödö chäänöngato jonno. Aashichaato Wanaadi nutuudu äwwä yei’she wa. Amén.