1 TIIMOTEO 5 - Wanaadi A'deddu

Quedeiyente tödööto’como jäcä Paudo nimennä’jödö

¹ Täuwe mma maneuwöicho’de inchoncomo; töwäätuuja mmaane yäätuujacooto, tumö yäätuujadö töweiye naichöje. Ñanno ääjömannamo adhaacontomo nönge tödööcoto.

² No’sancomo mmaane aanö nönge tödööcoto; ajei’choto’ja’como ajaadui’chomo nönge tödööcoto, aneiñaja ätö’tajä’ancädä’da.

³ I’wa’täcooto iiño wä’jajo’jocoomo, ñanno wentumja’como jaiñoone.

⁴ Anejja iiño wääma’jödö iiñedö töweiye yeiya’jäcä, ijaadö jeiñe mma, ñannoone noowanooma’ña’to chäänönge töwä’jimmä’tädö tödöödö; tönnejenca’jocoomo nemeetacaama’ña’to tönnejencannamo’jödö jäcäiñe, yää Wanaadi wacö’je yeijäcä.

⁵ Ñäädä wodi iiño wääma’jödö töjääcäjeenato jaiñoone Wanaadi ecaanö’jai ña; Wanaadi wwä a’deujai ña ano, coijai mmaja.

⁶ Ñäädä iiño wääma’jödö edä nono de’wono jäcoono cadootadö mmaane nudä töweichaame yäämaajä nönge na.

⁷ Mädääje anontäcooto’de, täcammajä’aamoje’da yeichöcoomo wetä.

⁸ Ñäädä töjimmä ani’wa’täjöönö, töwä’jimmä’tädö ani’wa’täjöönö mmaja, töneecamjödö nijoome’da, quedeiyentejöönö o’näde na töwö.

⁹ Ñäädä iiño wääma’jödö quedeiyentecoomo wwä tö’wa’täämö eijai ña aaduwaawä soto wedu de’woto dea mma. Ñäädä eeto imennäjai maato yää iiño wääma’jödö tö’wa’taamo eetöcoomo a’täi jäcä. Tooni mma ñäädä tö’wa’täämö ño wei’jödö eijai ña.

¹⁰ Tacaade eijai ña aashichaato iiñö’jödö, mude’cä’cä iiñejenca’jödö jeiñe mma, aashicha soto tödöiñano womoomödö tödö’jödö jeiñe mma, quedeiyentecoomo i’wa’tä’jödö jeiñe mma, wentumja’como i’wa’tä’jödö jeiñe mma, anejja aashichaato tödö’jödö jeiñe mma.

¹¹ Ñanno mude’cäjeicha’como iiño wääma’jödö mmaane mani’wa’tätäi’che. Ñäädä eetö mämmennätäi’che yää iiñö wääma’jödö tö’wa’taamo eetöcoomo a’täi jäcä. Äcuude tujuunucoomo woije tönwanno e’nomjajai ñaato Quidiito jäcä mma tötö’tajäätödööcomo. Töwäätöiñono’se eijai ñaato yaawä.

¹² Mädääje chäänönge’da töweichöcoomo ejoodöjai ñaato, yää ätöiñono’da töweichöcoomo jäcä töwääcamma’jocoomo nönge ännö’da töweichöcoomo e’nei.

¹³ Töquiiñuta mmaja chiiñutaajai ñaato dea yaawä, ä’sa waadäi töwäämannäjöödöcoomo que; töquiiñe mma’da, wa’deuto’jönö jäcä töwa’deuwe mmaja.

¹⁴ Yääje yeijäcä ñanno mude’cäjeicha’como iiño wääma’jödö töwäätöiñonoone ätöiñonoojai ñaato, ennecaiyeto, tä’sadööcomo edai’chäiyeto; cutu’dedööcomo cöjääcäiñe cone’da ya’deutojo ’je’da yeichö wetä.

¹⁵ Dhantai iiño wääma’jödö tösaadijange naato Caajushawa ncäcä.

¹⁶ Anejja quedeiyente iiño wääma’jödö yä’jimmä’tädö töweiye yeiya’jäcä, ñäädääne ni’wa’to’ñojo, anejjacoomo quedeiyente encanoodöcoomoje’da yeichö wetä yaawä ñäädä iiño wääma’jödö; ñannoone, wentumja’como jaiñoone i’wa’tädööcomo wetä yaawä anejjacoomo quedeiyente wwä.

¹⁷ Ñäädä ansiyaano chäänönge soto edai’chäneichomo jooje’cä ijummajai maato, töwaacö’je ñanno ecammajäätödö jäconcomo wetaadawa’cajoodö, owaanomaadö jäconcomo wetaadawa’cajoodö mmaja.

¹⁸ Wanaadi a’deddu imennaajä yääje nä’döa: “Jaaca manincha’dutäi’che äiña acaadawä chäwwä;” quee nä’döa. Edääje mmaja nä’döa dea: “Ñäädä tadaawaaju tödöönei ätääjema’da’da eijai ña;” quee.

¹⁹ Ansiyaano ecammajäätödö maneetai’che, aacä, aaduwaawä jeiñe mma ecammajä’nnamo yeiya’comjäcä mmaane.

²⁰ Ñanno ansiyaano cönemjönö dödööje dea’como yäätuujacooto tameedä tätaamöje, anejjacoomo ääcatoncaiyeto yaawä.

²¹ Wanaadi owaadäädä yääje wä’döa äwwä, Jesuuquidiito owaadäädä mmaja, dhamoodedö eiya’como owaadäädäiñe mmaja: Tameedä edä waanontänä tödööcä’de äänönge soto tödööancädäiñe, o’jodhe anejja ijummancädä’da.

²² Jadheedä mma ansiyaano maneewaacai’che, choone’nadiiyö jäcä i’wa’täneije mma mei’ño; chäänönge eichä amäädä tameedä aweichö jäcä.

²³ Töjääcäjeene mma tuna maneenöi’che eduuwa; joojede’da’cä chääjedöödö eccudu anencä’de, aweenö ejiichöje, weiñäje cädäije aweijäcä.

²⁴ Anejjacoomo soto cone’nadiiyöcoomo tacaade töweiye nai; yää jo’tädööje nätä’maminchajaato’de. Anejjacoomo cone’nadiiyö mmaane äcuude’cä töwäänejoomöje na.

²⁵ Mädääje mmaja aashichaato tödöödö weneene dea, tacaade mmaja; yää tacaademjönö mmaane tacaade’daadä eijai’cha na.