1 TIIMOTEO 4 - Wanaadi A'deddu

Wanaadi a’deddu e’nomjannamo

¹ Epíiditu Santo täta necamma äcuude anejjacoomo weicho’como jäcä. Tönwanno töneecamjödööcomo ne’nomjaato’de äncu’tännamo a’deddu etaadö wetä, odo’shancomo nowaanomaadö etaadö wetä mmaja.

² Tönwanno nätäncu’täjaato’de juutuja’como weshi’jodööcomo que. Ñanno juutuja’como naato chö’tajäätödööcomo töweecone’ma, yaatuaajä töweiye naichöje.

³ Tönwanno soto ämjö’näjo’da naato, äwanshi tönaamoi’chä mmaja, yää Wanaadi namoode’nädö. Yää Wanaadi cönnöi quedeiyentecoomo ewanshiñööje, chäänöngato dhowaanoco’como ewanshiñööje mmaja; yää na aashicha Wanaadi wwä töwa’deuwancädä täwanshiñööje tödööemö.

⁴ Tameedä Wanaadi namoode’nädö aashicha na; ane’cä’cä töquiiñeme’quemje’da na aashicha Wanaadi wwä töwa’deuwancädä tödööa’jäcä,

⁵ Wanaadi a’deddu que, chäwwä awa’deuwödö que mmaja töweeconeeca yeijäcä.

Chäänönge Jesuuquidiito anoonöje weiñä

⁶ Mädääje quedeiyentecoomo yäätuuja’comjäcä äwwä Jesuuquidiito anoonö chäänöngatooje eijai ma yaawä, amäädä dea äwä’jädu’tancädä ecamjödö jäcä ecammajäätödö que, aashichaato woowanoomanä que mmaja, yää yoije määneneedö.

⁷ Edä nono de’wono wätunnä mmaane etaajä’jai’cha ma amäädä, wätunnä iiña mmädooto mmaja. Wanaadi nödöödö jäcääne äämu’cacä.

⁸ A’dhatooje mma töweiye nai edä nono de’wono tödöödö jäcä wäämu’canä. Wanaadi nödöödö mmaane yää e’jodhe na, eduuwa weichojooje yeijäcä, äcuude weichojooje yeijäcä mmaja.

⁹ Chäänöngato mädä wecammaadö, täcaanö’emje mmaja.

¹⁰ Mädä jäcäinchädä dea töweetadaawa’cajo cäänetääne, töwäätana’tojo cäänetääne dea, Wanaadi nudooto ecamjödö weijäcä cöwwäiñe, ñäädä tameedä soto Ewaanacaaneichomo, töwaacö’je ñanno täcaanö’nnamo.

¹¹ Edä tödöödö jäcä anontäcooto, owaanomaacotoode.

¹² Anejja wwä mä’quimmajoi’che mude’cäje aweijäcä; quedeiyente neneedöcoomoje chäänönge eichä awa’deuwödö jäcä, aweichö jäcä mmaja, wä’jummanä jäcä mmaja, ätö’tajäätödö jäcä mmaja, ecamjödö jäcä mmaja, aashichaato tödöödö jäcä mmaja.

¹³ Adöiña öötädö jonaane yeichöje quedeiyente netaadöcoomoje Wanaadi a’deddu imennaajä a’de’tädööje eichä’de, ijä’du’tädööcomooje mmaja, owaanomaadöcoomoje mmaja.

¹⁴ Ema’jödööje’da tödööcä Wanaadi nutuudu äwwä naadö, yää Wanaadi woije ade’wä ansiyaano tamäädöcoomo cönnöichodaawä äwwä cönä’tuichö.

¹⁵ Töwäämu’caane äämu’cacä edä wecammaadö tödöödö jäcä; täncano’tääne encano’täcä, tameedä eneiyeto awaatö’näjöödö.

¹⁶ Odhoowadäädä eichä aweichö jäcä, owaanomaadö jäcä mmaja; jäduuje eichä tameedä mädä nöngato jäcä. Mädääje aweiya’jäcä määwanaaca’de, tameedä adheetannamo’jödö mewaanacaato’dede.