1 TIIMOTEO 3 - Wanaadi A'deddu

Ansiyaano weicho’como

¹ Chäänöngato edä wecammaadö: Ñäädä soto e’se’täneichomooje töwei’shato tadaawaaju aashichaato nijumma.

² Yääje yeijäcä ñäädä ansiyaano aashicha eijai ña, täcammajä’emööje’da töweichö wetä. Tooni mma ijiiñamo eijai ña; wataasheje’da’da mmaja töwö eijai ña dea, acu’shämje mmaja, dhanwaaje mmaja. Tödöiñano wä’döaajä aashicha tödööjai ña töwö. Dhowaanäcä eijai ña soto owaanomaadöcoomo.

³ Wä’dau’nä yaacö’je’da eijai ña töwö ansiyaano; ewoodoicha’da mmaja eijai ña dea, ta’cwaiñeene eijai ña. Ätäccujäätö’da mmaja eijai ña dea, jödaata jäcä äätätäädä’da mmaja.

⁴ Aashicha töjaadoncomo anontäjai ñaato. Töwö tönnacoomo iiñejencajai ñaato ta’deucwe, tanoonöje mmaja.

⁵ Töjaadoncomo anontädö dhowaanäcä’da yeiya’jäcä, ¿aaquene mmaja Wanaadi sotoi aneedai’chädööto deeade’?

⁶ Quedeiyenteje ä’döeenö ansiyaanoje eijai’cha na, o’jodhe chö’tajäätö’no yaawä, odo’sha wei’jödö nönge mmaja ecoone’ma’no yaawä töwö.

⁷ Ñäädä ansiyaano aashicha täcaadö etaajojai ña quedeiyentejöncomo wwäiñe, töjääcä cone’da ya’deuwödööcomo queiñe, odo’sha wwä ätäncu’tojo’no yaawä.

Diyaacono weicho’como

⁸ Mädääje mmaja diyaacono eijai ñaato dea, tacu’shänäicheene; wanna dha’dedducoomo eijai’cha na. Wä’dau’nä yaacö’comje’da eijai ña; ane’cä’cä cana’cadö jäcä äätätäädä’da eijai ñaato dea.

⁹ Tönwanno dhowaanäcäiñe eijai ña Wanaadi a’deddu owaanojöönö’jödö, chäänönge tötö’tajäätödööcomo yeiyancädä.

¹⁰ Tämmencaane diyaacono eijai ñaato awa’de; chäänönge töwääneja’comjäcä yaawääne diyaaconooje eijai ñaato.

¹¹ Wodiiñamo mmaja tacu’shänäiche eijai ñaato dea, wätunnä dha’me’da mmaja, wataasheje’da’da mmaja; tameedä töweichöcoomo jäcä chäänönge eijai ñaato.

¹² Ñäädä diyaacono tooni mma töjiiñamo tödööjai ña. Aashicha tönnacoomo anontäjai ñaato, töjaadoncomo mmaja.

¹³ Ñäädä diyaacono weichö chäänönge tödöönei aashicha täcaadö nödööja, Jesuuquidiito ecamjödö jäcä tösaade’da töwa’deutojo mmaja nichaana’ca dea.

Cöneecamjödööcomo owaanojöönö’jödö

¹⁴ Eduuwa mma adheene öötotoojo yeichaame edä wä’wätuujanä wimenna äwwadäädä,

¹⁵ numa tä’da weiya’jäcä odhoowanääcä yeichö wetä Wanaadi sotoije weiñä, yää Wanaadi nudooto ecaanö’neije weiñä. Yää Wanaadi sotoije weiñä chäänöngato a’deu a’täije na, chä’sejöije mmaja.

¹⁶ Chäänöngato mädä adai’jä cöneecamjödööcomo weichö, yää owaanojöönö’jödö, edääje yeichö: Wanaadi sotooje cönäänejoi; Epíiditu Santo chäänönge yeichö cöneenejoi; amoode cöneenea’to. Tameedä soto wwäiñe töwö cönäätäcammai chea; tameedä yeichö wa’cä cönäätäcamjöi yaawä; caju ña cönaatadoojoi chea.