1 TIIMOTEO 2 - Wanaadi A'deddu

Wanaadi wwä wa’deunä jäcä Paudo nimennä’jödö

¹ Edääje wä’dö’se wa awa’de: Quedeiyentecoomo Wanaadi wwä a’deujai ñaato tameedä soto jäcäiñe; tumjummadööcomo e’ca’jai ñaato dea, aashicha a’deujai ñaato dea Wanaadi wwä.

² Acu’shänä jäcä mmaja Wanaadi wwä a’deujai ñaato dea, tameedä cajiichaanacoomo jäcä mmaja, täncanoode’da cöweichöcoomo wetä yaawä, ätäncano’tä’daane, aashicha cöweichöcoomo wetä mmaja, Wanaadi woije.

³ Mädääje weiñä aashicha na, Cäwaanacaaneichomo Wanaadi wacö’je mmaja.

⁴ Töwö Wanaadi tameedä soto yääwanaaca’seiñe na, tameedä chäänöngato wätunnä dhowaanäcäiñe yei’she na dea.

⁵ Tooni mma Wanaadi ña, tooni mma mmaja soto jäcäinchädäiñe Wanaadi wwä töwa’deuwemö, ñäädä Jesuuquidiito, soto nnedö.

⁶ Töwö Jesuuquidiito cönä’tui töwäämadö wetä, tameedä soto wääwanaacato’como ejeemadö wetä. Yää cönäätäcammai ecammatoojo cu’nädö awä.

⁷ Yää ecammajä’neije tödööajääje wa öwö, anontaajäje mmaja, judhíojöncomo owaanomaadöcoomo wetä chäänöngato ecamjödö jäcä. Chäänöngato mädä Quidiito owaadäädä wecammaadö, weeshi’jodööjönö.

⁸ Yääje yeijäcä tameedä yeichö wa’cä dhanwaacomo Wanaadi wwä ya’deuwö’seiñe wa, tamäädöcoomo choccaajä annä’ancädä, töwäätöma’se töweiyancädäiñe’da, töwäätäuwö’se töweiyancädäiñe’da mmaja.

⁹ Wodiiñamo aashicha ewontäjai ñaato, wataasheje’da’da, töjöiyato töweiye naichöjeene. Yensoma’tojo’to’como eijai ña tuju’jädööcomo acaajodööjönööne; oodojöönö mmaja yennataamato’comooje eijai ña dea, mayuudujöönö mmaja, womö täjeetojöönö mmaja.

¹⁰ Aashichaato tödöödö queene ennataamajai ñaato, Wanaadi wwä yä’tua’como töweiye naichodööjeene.

¹¹ Äucwätä’da wodiiñamo oowanoomajai ñaato, jäduuje töweiyancädä’da.

¹² Wecanta’ñotoojo taca owaanomaaneije eijai’cha wodi ña, dhanwa e’jodhe eijai’cha mmaja. Äucwätä’daane wodi eijai ña,

¹³ Adhánne awa’deene amoode’näätö’da Wanaadi wwä, yää ’jejeene Eewa.

¹⁴ Adhánjönööne cönäätäncu’tojoi, wodiiñe cönäätäncu’tojoi, conemjönö cönnöi yaawä.

¹⁵ Yääje yeichaame töwö wodi nääwanaaca’de chäänönge tönnacoomo tödöödö que, ecamjödööje dea yeiya’jäcä, wä’jummanä ’je mmaja, masuuduije’da yeiya’jäcä mmaja, wataasheje’da’da yeiya’jäcä mmaja.