1 TIIMOTEO 1 - Wanaadi A'deddu

Yaajäntä’jödö

¹ Öwö Paudo, Jesuuquidiito nanontädö, Cäwaanacaaneichomo Wanaadi nanontä’jödö woije, Cajiichaana Jesuuquidiito woije mmaja, ñäädä cönwomoocödööcomooje naadö.

² Äwwadäädä wimenna, amäädä Tiimoteo, önnedö neene, ecamjödö jäcäinchädä. Wentumje Wanaadi wwä adheene’se wa; aashichaato, täncanoode’da aweichojo mmaja, äwwä yei’she wa dea, Cumöötoncomo Wanaadi nutuudu, Cädhaajotoncomo Jesuuquidiito nutuudu mmaja.

Chäänöngemjönö wätunnä owaanomaadö jäcä Paudo nimennä’jödö

³ Maasedooniya ña wötäänedaawä äwwä wä’döaaquennöje dea wä’döa eduuwa; Eujeeso ña dea eichä’de, anejjacoomo miyäätuujaiyeto chäänöngemjönö wätunnä jäcä onoowanooma’da yeichöcoomo wetä,

⁴ wätunnä wwadäädä ijaanata’da yeichöcoomo wetä mmaja, soto adai’choncomo’jödö ime’cu’tädö mmaja, yää yä’cadö ’jemjönö. Mädä ecammajäätödö que wätäccujä’nä mma noojodööa, Wanaadi tadaawaajui ecamjödööcato tödöödö jäcä mmaane wa’tätä’da na, yää cöwwäiñe töwö cuntuichö.

⁵ Amäädä owaanomaajai maato wä’jummanä jäcä; yää wä’jummanä ne’a äwaanö choonecaajä jonno, tö’tajä’nä aashichaato jonno mmaja, ecamjödö weishi’jonä quemjönö jonno mmaja.

⁶ Anejjacoomo mädä jonno cönääcumeicho; töwäädämmato wätunnä jäcä tösaadijange naato.

⁷ Wanaadi a’deddu jäcä owaanomannamooje töwei’she’jödö mma tönwanno, towaanäcäiñe’da yeichaame töneecammajäätödööcomo, töwäätunnäichomo towaanäcäiñe’da yeichaame mmaja.

⁸ Cönwanno cowaanäcäiñe na aashicha waanontänä imennaajä weichö, chäänönge mma tödööa’jäcä.

⁹ Cönwanno cowaanäcäiñe eijai ña aashicha’como wwonooje’da yää waanontänä imennaajä weichö. Yää waanontänä töweiye nai tanontä’jödö ännöjöönö wwonoojeene, töweewodoichaato wwonooje mmaja, conemjönö dönei mmaja, chäänöngemjönö mmaja, Wanaadi onnontäjöönö mmaja, dha’deddu onnontäjöönö mmaja, tumö emaanei, senö emaanei wwonooje mmaja. Soto emaanei wwonooje mmaja na dea yää waanontänä,

¹⁰ masuuduijato wwonooje mmaja, dhanwa acä dhanwa conemjönö tödöönei mmaja, soto ememme’nei mmaja, juutujaato mmaja, soto ementännamo mmaja. Tameedä chäänöngato woowanoomanä juntacaano wwonooje mmaja na dea yää waanontänä.

¹¹ Yää chäänöngato woowanoomanä na Wanaadi aashichaato wätunnäi woije, yää täcammajä’emööje öwwä tu’e naadö.

Wanaadi wwä wentumje täne’jödö weijäcä ta’cwaiñe Paudo wei’jödö

¹² Aashicha ya’deuwa Cädhaajotoncomo Jesuuquidiito wwä, ñäädä ecammajä’neije weichö wetä jäädu’tänei. Chäänönge tö’ta’jäcä chäwwä tänoonöje yeewaacane yaawä.

¹³ Töwö Jesuuquidiito mädääje yöödöne jenaadä töjääcä cone’da töwa’deuwe wei’jödö weichaame, tömmamincha wei’jödö weichaame mmaja, töneetana’tä wei’jödö weichaame mmaja. Yääje yeichaame töwö wentumje yeeneaaquene yoowoinchadä yääje wei’jödö weijäcä quedeiyenteje’da weichö.

¹⁴ Mädääje Cädhaajotoncomo joojato aashichaato cönnöi jääcä; ecamjödö mmaja öwwä cuntui chea, wä’jummanä mmaja, yää Jesuuquidiito jadä cöweichomjäcä cöwwäiñe yä’tuaajä naadö.

¹⁵ Chäänöngato edä wecammaadö, täcaanö’emje mmaja: Jesuuquidiito cöneejä edä nono de’cäi conemjöncomo ewaanacaiñe, öwö waadö, tameedä cho’jodha’como’cä jaiñoone.

¹⁶ Yaawääne’ edä jäcäinchädä töwö Wanaadi wentumje yeeneaaquene, jääcä awa’deene Jesuuquidiito wwä eneejodö wetä aashicha töweichö. Mädääje täneemöje wä’döne, ñanno Jesuuquidiito töweicho’comooje ecaanö’nenaamo neneedöcoomoje.

¹⁷ Yääje yeijäcä aashicha tödööto’me na ñäädä Cajiichaana yeichöödoto, aashicha wa’deutojooje mmaja yeichöödäje. Töwäämamjönö töwö, töwäänemjönö mmaja, ñäädä mma Wanaadi, töseedujä’nato. Amén.

¹⁸ Amäädä önnedö Tiimoteo, edä waanontänä wimenna äwwadäädä, chäänönge adheewänä’täiye, ecamjödööje dea aweiyancädä, aashicha ätö’tajäätödö tödööancädä mmaja, jenaadä anejjacoomo quedeiyente Wanaadi woije aweichojo cöneecammajäätöichodööje dea.

¹⁹ Anejjacoomo mmaane töneecamjödööcomo jonno tösaadijange naato, chäänönge tötö’tajäätödööcomo ne’se’tädö woije ännö’da töweichomjäcä.

²⁰ Ñanno naatoodö yääja’como, Iimeneo, Aadejantudu mmaja. Ñanno wu’neto Caajuushawa wwä, yä’cuseijadööcomo wetä, Wanaadi jäcä cone’da a’deuwö’da yeichöcoomo wetä yaawä.