1 TEESADOONISENSE 5 - Wanaadi A'deddu

¹ Jesuuquidiito we’tojo cu’nädö mmaane äwwadäädäiñe imennäjai’cha ñaa na, dhanootoi’chädö mmaja.

² Änwanno odhoowanääcäiñe na Cajiichaana we’tojo ätö’tajäätödööcomo ’nawä, coijai tämeenato weejödö töweiye naichöje.

³ “Täncanoode’da caato; ä’jajo’da caato;” quee soto wä’döa’comjäcä, yaawä jadheedä chääjäcäiñe ne’a’de conemjönö, wodi wensu’dato iiñedo tödhe’nunge naichöje. Tönwanno töwäänejeeto’como aneejodö’da naato’de.

⁴ Änwanno mmaane, jimmä, tööjano’taca’da maato; tämeenato weejödö nönge’da eijai ña äwwäiñe yää anooto.

⁵ Änwanno maato tawaanato acancomooje, anooto awoncomooje mmaja. Cönwanno quedeiyentecoomo coijaichomoojönö, tööjano’tacancomoojönö mmaja.

⁶ Yääje yeijäcä öncö’daane queicho’ñojo, anejjacoomo naatoodöje’daane. Töwäädai’chääne cäädai’chäto’ñojo; cowaadäädäiñe mmaja queicho’ñojoode.

⁷ Ñanno tönnö’ca’como coijai nönö’caato. Töwä’dau’cwa’como coijai nä’dau’cwaato.

⁸ Cönwanno mmaane anooto awoncomo; cowaadäädäiñe eijai caato. Cöwwäiñe cöwoowontoto’comooje tödööjai caato ecamjödö, wä’jummanä mmaja, suddau tödo’tadö ewontotoojo tönnöe töweiye naichöje. Cuju’jocoomo ewontotoojo mmaja cöwwäiñe tödööjai caato dea, yää cöwääwanaacato’como tönwomo’que cäänetäänedö, suddau tuju’jä ewontotoojo tönnöe töweiye naichöje mmaja.

⁹ Töwäätä’maminchajaamoje’da Wanaadi ca’dejjatääne, Jesuuquidiito jäcäinchädä töwääwanaacaamojeene.

¹⁰ Ñäädä Jesuuquidiito cönäämai cöjääcäinchädäiñe, chääjadä cöweichöcoomo wetä. Nudä cöweiya’comjäcä chääjadä caato; cöwääma’comjäcä chääjadä dea.

¹¹ Yääje yeijäcä ä’wa’dätääcä änwannoje dea; ä’jädu’tätääcä, tönnöe määnetäänedööje dea.

Quedeiyente wätuuja’jocoomo

¹² Änwanno jimmä, edääje ñaa äwäätuujaato: Tönoiñe eneetäcä ñanno äjääcäiñe töweetadaawa’cajo weneenetoodö, Jesuuquidiito jäcäinchädä adhe’se’tännamo, ñanno äwäätuujannamo.

¹³ Aashicha tödöötäcä, ijummatääcä chaadawaajuichomo jäcäinchädä. Äwwäädäiñe ä’tu’de’tä’da eichäcä.

¹⁴ Jimmä, edääje mmaja ñaa äwäätuujaato dea: Yootuujatääcä ñanno töquiiña’como. Wentumja’como tö’tajäätödö ya’dätääcä; jäduujemjöncomo i’wa’tätääcä. Äätömaacoije’da eichäcä tameedä soto jäcäiñe.

¹⁵ Odhoowoinchadäiñe’da eichäcä, anejja mma adhantawäiñe töjääcä conemjönö tödö’jödö conemjönö que mmaja oojo’to’no. Aashichaato dödö mmaane encano’täjai maato änwannoje dea, tameedä soto jäcäiñe mmaja.

¹⁶ Ta’cwaiñe eichäcä yeichöje.

¹⁷ Wanaadi wwä yeichöje adha’deutäcä.

¹⁸ Yeichöje aashicha adha’deutäcä Wanaadi jäcä, tameedä äjääcäiñe yeeja’dätäädö jona’da. Mädääje Wanaadi awei’sheiñe na, Jesuuquidiito ecaanö’nnamooje aweijäcaiñe.

¹⁹ Epíiditu Santo maneeta’jöichojootäi.

²⁰ Änquiiñemeecö’da eichäcä Wanaadi nutuudu ecammajäätödö.

²¹ Tameedä chäänönge imencatääcä; aashichaato dea äwwäiñe tödöötäcä.

²² Ä’sancwatääcä tameedä conemjönö jonno.

²³ Wanaadi, ñäädä täncanoode’da weichojo edhaajä, chäänönge jeene ocoonecaato. Töwö dea yä’jödöödä adheedai’chaato conemjönö ’je’da aweichöcoomo wetä odo’tadööcomo jäcä, ätö’tajäätödööcomo jäcä mmaja, adheejöcoomo jäcä mmaja, Cädhaajotoncomo Jesuuquidiito weejödö jonaane.

²⁴ Chäänöngato ñäädä adha’dejjaneichomo’jödö; töwö dea mädääje äyöödöaato’de.

Yä’ca’jödö

²⁵ Jimmä, ñaa jäcä adha’deutäcä Wanaadi wwä.

²⁶ Tameedä quedeiyentecoomo a’dejjatääcä, töwä’jumma aweichöcoomo eneejancädä.

²⁷ Edääje wä’döa äwwäiñe Cajiichaana woije: Edä jajeeda a’de’tätääcä’de tameedä quedeiyentecoomo netaadöcoomoje.

²⁸ Aashichaato äwwäiñe yei’she wa Cädhaajotoncomo Jesuuquidiito nutuudu. Amén.