1 TEESADOONISENSE 4 - Wanaadi A'deddu

Wanaadi wacö’je weiñä

¹ Änwanno jimmä, edääje äwwäiñe töwä’dö’se ñaa na, äwäätuujadööcomooje, Cädhaajotoncomo Jesuuquidiito eetö joi: Ñaa odhoowanoomatääne Wanaadi wacö’je weiñä jäcä, mädä maatoodö. Yääje yeichaame jooje’cä jeene mädä tödööjo’se ñaa na äwwäiñe.

² Änwanno odhoowanääcäiñe na yää waanontänä Jesuuquidiito woije äwwäiñe ñaa cöneecammaichö.

³ Wanaadi conemjönö ’je’da aweichonse na. Töwö nijumma masuuduichanä e’nomjadö äwwäiñe.

⁴ Töwö awaadäiñe odhoowanääcäiñe yei’she na ajiiñantoncomo tödöödö, conemjönö jäcä ätö’tajä’ancädäiñe’da, aashicha tödööancädäiñeene.

⁵ Änwanno ajiiñantoncomo tödööjai’cha maato ajuunucoomo nijummadö woije mma, äänawä awei’sheiñe aweichöcoomo jäcäinchädä mma’da mmaja. Quedeiyentejöncomo mmaane mädääje weneeneto, ñanno Wanaadi dhowaanojöncomo.

⁶ Anejja conemjönö ännöi’che töweichacoono jiñamo jäcä. Cädhaajotoncomo nimaamincha’de tameedä yää nöngato conemjönö tödöönei. Mädääje dea töneecammajä’e ñaa töweiye cönä’jaacä äwwäiñe, äwäätuujadööcomooje.

⁷ Wanaadi ca’dejjatääne aashicha tödönnamooje, conemjönö tödönnamooje’daane.

⁸ Yääje yeijäcä ñäädä edä wä’wätuujanä chiiñeme’nei, soto a’deddujöönö nichiiñeme’ca, Wanaadi a’dedduune, ñäädä Epíiditu Santo u’nei’jödö cöwwäiñe.

⁹ Töweichacoono ijummadö jäcä mmaane äwwadäädäiñe tömennämje’da na; Wanaadi chea odhoowanoomatäiñe weneene äwä’jummadööcomo jäcä.

¹⁰ Mädääje dämma tumjumma määnetääne tameedä quedeiyentecoomo Maasedooniya ñancomo. Yääje yeichaame jooje’cä jeene mädä tödööjo’se ñaa na äwwäiñe.

¹¹ Täncanoode’da aweicho’como encano’tätääcä. Äwwäädäiñe ännödööcomo jäcääne ätö’tajä’täcä, awaadäiñe ataadawaajuichomo tödööancädä mmaja, ñaa odhoowanoomatäänedööje dea.

¹² Yaawä quedeiyentejöncomo aashicha chö’tajä’jai ñaato äjääcäiñe. Mädääje aweiya’comjäcä a’que’da’da äwwäiñe na’de.

Cajiichaana we’tojo

¹³ Änwanno jimmä, odhoowanääcäiñe yei’she ñaa na ñanno yä’ja’a’como jäcä, wentumje aweichöcoomo queiñe, quedeiyentejöncomo weneenetoodöje; tönwanno naato a’que inwomoocödööcomo.

¹⁴ Cönwanno queecanö’ato Jesuuquidiito wääma’jödö, yaadonca’jödö mmaja. Queecanö’ato dea ñanno quedeiyentecoomo wä’jajo’jocoomo Wanaadi wwä anontotoojo Jesuuquidiito weejödö jadä.

¹⁵ Yääje yeijäcä edääje ñaa nä’döa äwwäiñe Jesuuquidiito woije: Cönwanno nudo’como, Jesuuquidiito weejödö jonaanato wo’somjo’jocoomo, tä’da caato’de ñanno yä’ja’a’como owaajo.

¹⁶ Cajiichaana Jesuuquidiito dea nä’ta’de caju ñanno, jäduuje töcä’töngancädä. Wanaadi amoodedö edhaajotoncomo töcä’de nichä’tönga’de; Wanaadi janau’cwai nääta’de yaawä. Yaawä ñanno quedeiyentecoomo wä’ja’a’como naadoncaato’de awa’de,

¹⁷ yaawä jeene cönwanno nudo’como. Chääjadäiñe coojodööaato’de yaawä; tujuumä cataadäjaato’de yaawä ca’dutu de’wä, caju ña Jesuuquidiito ejoodödö wetä cöwwäiñe. Yaawä cöweichöcoomoje caato’de Cädhaajotoncomo jadä.

¹⁸ Yääje yeijäcä ä’wa’däätäcä edä ecammajäätödö que.