1 TEESADOONISENSE 3 - Wanaadi A'deddu

¹ Yääje yeijäcä, shinchäjai’cha ñaa wä’döa’jäcä, töjääcäjeene ñaa cöno’nomjoi Ateena ña.

² Adöiñaiñe ñaa cönaanontäi töweichacoono Tiimoteo. Töwö na Wanaadi anoonöje, ñaa jadoono wetaadawa’cajoodö Quidiito wätunnäi aashichaato ecammajäätödö jäcä. Yääje yeijäcä ñaa cönaanontäi adöiñaiñe, äjäädu’täneichomooje, äwäätuujaneichomooje mmaja ecamjödö jäcä,

³ aweejäduuquejöödöcoomo queiñe mmaja mädä äwäntunamjödööcomo e’nei. Änwanno odhoowanääcäiñe na mädääje töwäntunaanö’aamoje cöweichöcoomo.

⁴ Ajaadäiñe ñaa weichö dhowaajodä dea töneecammajä’e ñaa cönä’jaacä töwäntunaanö’aamoje cöweichöcoomo. Mädääje dea cöneeja’dätäi; änwanno odhoowanääcäiñe na yääje yeichö.

⁵ Yääje yeijäcä ä’shinchä’da yaanonö wanontäne adöiñaiñe, yoowanääcä yeichö wetä aneecamjödööcomo jäcä yeichö. Edääje tö’tajä’ne: Odo’sha wwä töwäätäncu’tojo mma eiñoto, töwäädämma ñaa tadaawaajui’jödö ei’ño yaawä; quee tö’tajä’ne äjääcäiñe.

⁶ Eduuwa Tiimoteo töwä’döe na adöiñancomo’jödö. Töwö adheecammajä’täne aashicha töneecanö’e aweichöcoomo, wä’jummanä ’je aweichöcoomo mmaja. Töwö cöneecammajäätöi chea adha’cwaniiyöcoomo que ñaa jäcä tötö’tajä’e aweichöcoomo, jooje ñaa ene’se aweichöcoomo mmaja. Ñaa mmaja adheene’seiñe na dea.

⁷ Yääje yeijäcä, jimmä, jooje töwäntunamjödö jona’da, töwaatansu’dädö jona’da mmaja, äjääcäinchädäiñe ñaa cöna’cwainchai, chäänönge töneecanö’e aweijäcäiñe.

⁸ Ñaa adoncajoodö wa’cä cönä’jaacä yää Cajiichaana jadä chäänöngeedä aweichöcoomo eta’jäcä.

⁹ Wanaadi owaadäädä jooje ta’cwaiñe ñaa na äjääcäiñe. Yääje yeijäcä edenna’da ñaa na äjääcäinchädäiñe aashicha töwa’deuwödö Wanaadi wwä.

¹⁰ Wanaadi wwä töwa’deuwe ñaa weneene ano, coijai’jödöödä, cöwääneto’como jäcä. Adheene’seiñe ñaa na, jooje’cä aneecamjödööcomo ejannä’cajoodö wetä.

¹¹ Cumöötoncomo Wanaadi, Cädhaajotoncomo Jesuuquidiito mmaja, towaanäcäiñe ñaa enno’jaato’de adöiñaiñe.

¹² Ñäädä Cädhaajotoncomo adhaatö’nä’jaato, äwä’jummato’como mmaja nu’a dea, tameedä soto ijummato’como mmaja, ñaa ajummaatoodöje dea.

¹³ Töwö äjäädu’taato ätö’tajäätödööcomo jäcä yäätäädä aweichöcoomo wetä, tösooma mmaja, conemjönö ’je’da aweichöcoomo wetä mmaja Cumöötoncomo Wanaadi owaadäädä, tameedä tösootoi jadäiñe Jesuuquidiito we’a’jäcä.