1 TEESADOONISENSE 1 - Wanaadi A'deddu

Yaajäntä’jödö

¹ Öwö Paudo, Siidawaano mmaja, Tiimoteo mmaja, ñaa nimenna äwwadäädäiñe, änwanno Teesadoonica ñancomo quedeiyentecoomo, Cumöötoncomo Wanaadi jadoncomo, Cädhaajotoncomo Jesuuquidiito mmaja. Aashichaato, täncanoode’da aweicho’como mmaja, äwwäiñe yei’she ñaa na, Cumöötoncomo Wanaadi nutuudu, Cädhaajotoncomo Jesuuquidiito nutuudu mmaja.

Aashicha töneecanö’e Teesadoonica ñancomo wei’jocoomo

² Aashicha Wanaadi wwä töwa’deuwe ñaa weneene äjääcäinchädäiñe; chäwwä töwa’deuwödö waadäi adhe’tätäiñe ñaa weneene.

³ Cumöötoncomo Wanaadi owaadäädä tötö’ta ñaa weneene ännödööcomo jäcä, yää ecamjödö jäcäinchädä tönnöe määnetäänedö. Tötö’ta ñaa weneene dea ataadawaajuichomo jäcä, yää wä’jummanä jäcäinchädä tönnöe määnetäänedö. Aashicha shinchädö que äwäntunamjödööcomo jäcä mmaja tötö’ta ñaa weneene dea. Yää tönshinchä määnetääne Jesuuquidiito weejödö tönwomo’que aweijäcäiñe.

⁴ Änwanno jimmä, Wanaadi nijummadö, ñaa owaanäcä na Wanaadi wwä adhe’to’jocoomo.

⁵ Ñaa wwä aashichaato wätunnä ecammajä’a’jäcä äwwäiñe, ecammajäätödö que mma’da ñaa cöneecammajäätöi, Epíiditu Santo jäduudu que mmajaane, chäänönge yeichö ñaa owaanäcä yeiyancädä mmaja. Odhoowanääcäiñe na äjääcäinchädäiñe aashicha adhantawäiñe ñaa wei’jödö.

⁶ Änwanno mä’dötääne ñaa cu’jä’nenaamoje, Cädhaajotoncomo Jesuuquidiito cu’jä’nenaamoje mmaja. Änwanno adha’cwaniiyöcoomo Epíiditu Santo nutuudu que aashicha metaatäne Wanaadi a’deddu, ijo’tädööje jooje äwäntunaanö’taameiñe.

⁷ Mädääje tameedäädä quedeiyentecoomo nene’madööcomooje mä’dötääne, ñanno Maasedooniya ñancomo, Acaaya ñancomo mmaja.

⁸ Yääje yeijäcä ojonnoiñe Cajiichaana a’deddu cöneecatai Maasadooniya ña, Acaaya ña mma’da. Tameedä yeichö wa’cä tacaade maato, Wanaadi töneecanö’e aweichöcoomo. Yääje yeijäcä adheecadööcomo täcammajä’emje’da ñaa wwä na.

⁹ Tönwanno dea töneecammajä’e weneeneto aashicha äwwäiñe ñaa dö’jödö, äwwäiñe chu’taajä jummadö e’nomja’jödö mmaja Wanaadi ijummadö wetä, shootoije äwä’dödööcomo wetä, ñäädä nudooto, chäänöngato mmaja.

¹⁰ Tönwanno dea töneecammajä’e weneeneto caju ñanno Jesuuquidiito weejödö womoocödööje aweichöcoomo, ñäädä Wanaadi nnedö, yäämaajo jonno Wanaadi cönaadoncaichö. Ñäädä Jesuuquidiito Cäwaanacaaneichomooje na conemjönö ne’a’dedö jonno.