1 PEEDHODO 5 - Wanaadi A'deddu

Quedeiyente wätuujadööcomo

¹ Edääje mänwätuujaato änwanno quedeiyente antawäiñe ansiyaanoje maatoodö, öwö mmaja ansiyaanoje weijäcä, Jesuuquidiito wäntunamjödö eneenei’jödö mmaja; aashichaato täneejoomöje naadö eneeneije töweiyemö mmaja öwö dea.

² Edääje wä’dö’se wa äwwäiñe: Edai’chätääcä Wanaadi sotoi, äwwäiñe ñeedai’chojoodö, oweeja edai’chänei täcöönö töneedai’chä töweiye naichöje. Owoijeiñe’da’da edai’chätääcä, owoijeiñeene, Wanaadi nijummadö woije; ane’cä’cä cana’cadö wetä’da mmaja, tödö’se aweichöcoomo que mmädääne.

³ Ñanno aneedai’chädööcomo edhaajotoncomo nönge aweiyancädäiñe’da edai’chätääcä, aashicha ñeenedööcomooje aweiyancädäiñeene, anöngeiñe mmaja eiyetoode yaawä.

⁴ Yaawä, ñäädä Ädai’chänei ñeene wääneja’jäcä, äwwäiñe nu’a’de aashichaato adheeje’jocoomoje, jemi yu’tacoi töweiye naichö nönge’da.

⁵ Chäänönge mmaja änwanno mudeeshi, adhe’jodha’como woijeiñe eichäcä. Tameedäädääne ootowoije eichäcä, o’jodhe ätö’tajä’ancädäiñe’da, Wanaadi töni’wa’tä yeijäcä ñäädä o’jodhe chö’tajä’jönö, o’jodhaato tö’tajäätödö jäcä mmaane nä’jädu’ta töwö.

⁶ Yääje yeijäcä o’jodhe chö’tajäätö’da eichäcä; töwä’tueene ä’tutääcä ñäädä Wanaadi jäduujato wwä, töwö towaanäcääne adai’jä ayöödötäiye yaawä.

⁷ Tameedä adhansu’däneichomooje weneenedö Wanaadi wwä ecammatääcä, töwö adheedai’chätäiñe yeijäcä.

⁸ Odhoowadäädäiñe eichäcä, äädai’chätääcä. Ätu’de’täneichomo odo’sha nätuujiya, mado töwaadeeto tääcaamö tunuujiye töweiye naichöje.

⁹ Oowontätääcä chäwwä, chäänönge ecaanö’ancädä. Mädääje dea töwäntunaanö’e weneeneto ajimmotoncomo tameedä yeichö wa’cä edä nono de’wä.

¹⁰ A’dhe äwäntunamjö’jejeiñe Wanaadi ocoonecaato’de. Töwö ä’wa’taato’de, yäätäädä äjäädu’taato’dede. Wanaadi ñäädä aashichaato edhaajä. Töwö ca’dejjatääne aashichaato töwaatamemjönö enennamooje cöweichöcoomo wetä, Jesuuquidiito jadä.

¹¹ Töwö Wanaadi yeichöje aashicha wa’deutojooje na, tameedä cajiichaanaje mmaja. Amén.

Yä’ca’jödö

¹² She’caasa edä jajeeda wimennäjoi Siidawaano wwä, ñäädä quedeiyente chäänöngato öwö chö’tadö naadö. Öwö wimennäi äwäätuujato’comooje, ecammadö wetä mmaja chäänönge yeichö mädä Wanaadi nutuudu aashichaato. Jäduujeedä eichäcä mädä jäcä.

¹³ Quedeiyente Waawidooniya ña naatoodö, maatoodöje eiya’como mmaja, ta’deujocoomo nadääjaato äwwadäädäiñe; önnedö Maadoco mmaja.

¹⁴ Äwwäädäiñe ata’dejjatääcä töwä’jumma aweichöcoomo äwäänejancädäiñe. Täncanoode’da aweicho’como äwwäiñe yei’she wa, tameedä änwanno Jesuuquidiito ecaanö’nnamo. Amén.