1 PEEDHODO 4 - Wanaadi A'deddu

Wanaadi sotoije weiñä

¹ Jesuuquidiito sotooje töweichö yäntunamjö’jödö weijäcä änwanno mmaja yääje chö’tajä’jai maato dea, äwäntunamjödööcomo owaajo aweesomaajätöödöcoomoje mma. Ñäädä wäntunaanö’nä oneejanei conemjönö to’nomja na.

² Yääje yeijäcä edä nono de’wä maatoodawäädä töweesomaajä’e eichäcä Wanaadi waanontädö woije aweichöcoomo wetä, ajuunucoomo nijummadö woije’daane.

³ Chääwa’cä na yää jenaadä awei’jocoomo, Wanaadi dhowaanojöncomo wacöötö tönnöe mä’ja’quennö, yää masuuduichanä, tujummamjönö ijummadö mmaja, wä’dau’nä mmaja, wänwanä mmaja, wewoodoichanä mmaja, waanontänä wä’dödö nönge’da chu’taajä ijummadö mmaja.

⁴ Ñanno Wanaadi dhowaanojöncomo cone’da töwä’döjo weneeneto chääjadäiñe yää mänseedä dejaato conemjönö ännö’da aweichomjäcä eduuwa. Yääje yeijäcä cone’da äjääcäiñe töwa’deuwe weneeneto.

⁵ Tönwanno töwei’jocoomo jäcä nätääcamma’jajaato’de ñäädä nudo’como emmencaneichomo wwä, ñäädä yä’ja’a’como emmencaneichomo dea.

⁶ Ñanno yä’ja’a’como cönä’jajoicho soto töwääma weneenetoodöje dea. Yääje yeichaame chäwwäiñe mmaja aashichaato wätunnä cönäätäcammai chea, yo’tadööcomo nudä yeichö wetä yaawä, chäwwäiñe ecaanö’a’jäcä, Wanaadi nudä naadöje mmaja.

⁷ Tameedä yaatameetojo amoinche’da na. Yääje yeijäcä odhoowadäädäiñe eichäcä, acu’shämje mmaja. Yeichöje Wanaadi wwä adha’deutäcä.

⁸ Mädä de’wä mmaja jeene adheewanööcomo jadäädä ä’jummatääcä, wä’jummanä jooje conemjönö töneetatannä’ca yeijäcä.

⁹ Adhaaquiñuuducoomoje yeiyancädä’da soto adhe’sacaiñe ewa’tojootäcä, ewanshinchätääcä’dede.

¹⁰ Äwaadäiñe Wanaadi nutuudu äwwäiñe naadö tödöötäcä awe’wa’toto’comooje. Wanaadi nutuudu aneejejaiñene’jödöödoto chäänönge tödöötäcä.

¹¹ Ñäädä ecammajä’nei, Wanaadi a’deddu ecammajäätödö töweiye naichöje necammajäätö’ñojo. Ñäädä anejja wwä tödööjä’nei, töjäädudu Wanaadi nutuudu que nödö’ñojo. Mädääje tameedä ännödööcomo que aashicha Wanaadi weichö tacaade eijai ña, Jesuuquidiito joi. Ñäädä Jesuuquidiito yeichöje aashicha wa’deutojooje na, tameedä cajiichaanaje mmaja. Amén.

Quedeiyente wäntunaanö’tojo

¹² Jimmä umjummadö, cone’da ä’döjo’da eichäcä joojato conemjönö odhoonejaato’como äjääcäiñe yä’dödaawä; yääje töweiyaamoje’da aweiyaatäiñe mma määcanö’täi’che.

¹³ Ta’cwaiñe mmaane eichäcä Jesuuquidiito wäntunamjödö jimmäje aweijäcäiñe, ta’cwaiñe meichäiyede yaawä aashicha töweichö eneejodaawä chäwwä.

¹⁴ Jesuuquidiito ecamjödö jo’tädööje aquiiñeme’ca’comjäcä, ta’cwaiñe eijai maato, Epíiditu Santo aashichaato äjääcäiñe yeijäcä. Tönwanno cone’da töwa’deuwe weneeneto Jesuuquidiito jäcä, änwanno mmaane aashicha chääjäcä töwa’deuwe määnetääne.

¹⁵ Conemjönö jo’tädööje’daane äntunaanö’täcä, soto emaadö jo’tädööje’da mmaja, wemeenönnä jo’tädööje’da mmaja, wätunnä dha’me weiñä jo’tädööje’da mmaja.

¹⁶ Quedeiyenteje töweichö jo’tädööje anejja wäntunaanö’a’jäcä mmaane töwö töjöichöje yää tödööjai’cha na; aashicha mmaane Wanaadi jäcä a’deujai ña quedeiyenteje töweijäcä.

¹⁷ Eduuwa nä’döi wäntunaanö’nä waajontotoojo cu’nädö aca, Wanaadi sotoi jäcäiñe naajäntaadö naane’. ¿Aaquene mmaja aneemaichädööto deeade’ ñanno Wanaadi wätunnäi aashichaato ännöjöncomo, cöjääcäiñede naajäntaane’?

¹⁸ Aashichaatodä ääwanaacaque’jönö naane’, töwaacö’je mma Wanaadi woijemjönö, ñäädä conemjönö dönei.

¹⁹ Yääje yeijäcä ñano Wanaadi woije töwäntunaanö’aamo aashichaato tödöödöje dea nei’ña’to. Tödo’tadööcomo nedai’chojo’ña’to Wanaadi wwä, ñäädä tamoode’näneichomo’jödö chäänöngato wwä.