1 PEEDHODO 3 - Wanaadi A'deddu

Tö’dha’como wätuujadööcomo, töiñoca’como wätuujadööcomo mmaja

¹ Änwanno mmaja töiñoca’como, oiñonootoncomo woije eichäcä, anejja quedeiyenteje’da yeiya’jäcä ecamjöiye yaawä, töwaataquiimajoodö’jo’da, töjiiñamo weichö eneedö que mma,

² masuuduije’da aweichöcoomo eneea’jäcä töwwä, nontätä aweichöcoomo eneea’jäcä mmaja.

³ Ye’wono que mma’da awennataamadööcomo nei’ñojo, yää tuju’jädö acaajödö, mayuudu que wensoma’täjä’nä mmaja, täjeeto que wewontäjä’nä mmaja.

⁴ Täwaanö jonnoto we’ajä queene awennataamadööcomo nei’ñojo, äänejöönö queene, ataamejöönö que mmaja, yää ta’cwaiñe weiñä, enta’mecö’da weiñä mmaja. Yääne Wanaadi emjataawä täje na.

⁵ Mädääje mmaja jenaadä wodiiñamo aashicha’como Wanaadi ecaanö’nnamo töwennataama töweiye cönä’ja’to; töiñonootoncomo woije töweiye cönä’ja’to.

⁶ Saada cönä’ja’dö naane’, Aawadán woije; tädhaajäje töne’tä cönä’jaacä. Änwanno Saada weichöje maato, aashichaato tödööa’jäcä äwwäiñe, ane’cä’cä onnontä’da aweiya’comjäcä mmaja.

⁷ Yääje mmaja änwanno tö’dha’como, aneene’jutu’da’daane eichäcä ajiiñantoncomo tödöödö jäcä. Aashicha ajiiñantoncomo tödöötäcä, odho’näiche töwö ijäädudu weijäcä, a’nädäncädä Wanaadi nutuudu aweichöcoomo äwwäiñe yeijäcä mmaja. Mädääje aweiya’comjäcä Wanaadi wwä awa’deuwödööcomo emu’dänei ’je’da eijai ña.

Aashichaato tödö’jödö jo’tädööja’como wäntunamjödö

⁸ Edääje mmaja wä’dö’se wa dea äwwäiñe: Tameedäädä äänönge ätö’tajä’täcä; wentumje äneetä eichäcä. Ä’jummatääcä, töweichacoono ijummadö töweiye naichöje. Ta’cwaiñeiñe eichäcä, o’jodhe chö’tajäätö’da mmaja.

⁹ Conemjönö que mmaja conemjönö maneemetaacamaatäi’che. Ätuushimaajätöödawäiñe wä’tushiimanä que mmaja moojo’tätäi’che. Aashichaato que mmaane emeetacaamatääcä’de. Yääje töweiyaamoje ta’dejja maato, Wanaadi nutuudu aashichaato äwwäiñe yeichö wetä.

¹⁰ Edääje imennaajä nä’döa: Ñäädä aashicha töwei’shato, ta’cwaiñe töwei’shato mmaja, cone’da a’deuwö’da nei’ñojo, ätäncu’tä’da mmaja.

¹¹ Nä’sancwa’ñojo conemjönö jonno; aashichaatoone nödö’ñojo. Täncanoode’da töweichojo nencano’to’ñojo; yää jäcä noowoincha’ñojoode.

¹² Cajiichaana emjataawä naato ñanno chäänönga’como; töwö töneeta töwwä ya’deuwödööcomo. Conemjönö dönnamo jäcäiñe mmaane töwö cone’da na; quee imennaajä wä’dödö.

¹³ ¿Änääcö mmaja conemjönö äjääcäiñe ännödö deaade’ aashichaato tönnöe aweiya’comjäcä?

¹⁴ Yaawääne’ aashichaato tödö’jödö weichaame äwäntunaanö’a’comjäcä, ta’cwaiñe eijai maato. Anejjacoomo monnontätäi; määcatoncatäi’chede.

¹⁵ Ätö’tajäätödööcomo jäcä cajiichaanaje Jesuuquidiito tödöötäcä. Adheecamma’jonnamo wwä ecammacoije eichäcä onwomoocödööcomo jäcä, tucuuna’se adha’dedducoomo tödööancädä, wo’nontänä que mmaja.

¹⁶ Conemjönö ’je’da ätö’tajäätödööcomo nei’ñojo, ñanno mijiichojootäiye, Quidiito jadä chäänönge aweichaameiñe jönaawä adheementännamo.

¹⁷ Wanaadi adhentunaanö’jo’se yeiya’jäcä, aashichaato tödö’jödö jo’tädööjeene äntunaanö’täcä, yää täje yeijäcä, conemjönö tödö’jödö jo’tädööje wäntunaanö’nä e’jodhe’cä.

¹⁸ Quidiito mmaja cönäntunamjöi chea; cöcoone’nadiiyöcoomo jo’tädööje töwö cönäämai, tooniye mma, yeichöje töweiyemööje. Töwö chäänönge töweichaame chäänöngemjöncomo jäcäinchädä cönäämai, Wanaadi wwadäädä cäneejödööcomo wetä. Töwö chääjö wääma’jödö weichaame, Epíiditu Santo woije cönaadoncai.

¹⁹ Epíiditu Santo ai mmaja Quidiito cöneecammajäätöi jenaado’jocoomo wwäiñe, ñanno chääcatoocomo jedeeso nönge naatoodö eduuwa.

²⁰ Ñanno cönä’ja’to Noé weichawä Wanaadi woije ännöjöncomo’jödö, yaawä Wanaadi numa cönwomo’caadawä jidaawa tödöödö Noé wwä. Yää jidaawa aca wanna’da soto cönääwanaacaicho yaawä tuna que, aaduwaawä amoojato mma.

²¹ Yää tuna cönä’ja’dö wautisaaje wä’dönä cu’tädööje na, yää töwäämaajo jonno Jesuuquidiito waadoncadö que cäwaanacaatoodö. Cö’donööcomo choccadööjönö yeichaame yää wautisaaje wä’dönä, Wanaadi owaadäädä chäänönge tötö’tajäätödö weichö eneejodö mmaane.

²² Töwö Jesuuquidiito caju ña cöntämä; yäätä na eduuwa Wanaadi jäcä ämu’demjönö dö’se. Töwö na tameedä Wanaadi amoodedö e’jodheiñe, cajiichaanacoomo e’jodheiñe mmaja, jäduuja’como e’jodheiñe mmaja.