1 PEEDHODO 2 - Wanaadi A'deddu

¹ Yääje yeijäcä e’nomjatääcä tameedä conemjönö, tameedä wätäncu’tänä mmaja, juutuje weiñä mmaja, we’neimmanä mmaja, wä’tu’de’tänä mmaja.

² Mude’cä’cä ennueenö shuushu tumjumma töweiye naichöje mmaja Wanaadi a’deddu chäänöngato ijummatääcä, yää que maatö’nä’täiye, tadoiñe odo’tadööcomo weichö wetä,

³ aashicha Cajiichaana weichö oneejaatö’da äwwäiñe.

Täju yeichöödoto nönge Quidiito weichö

⁴ Jesuuquidiito wwadäädä ä’täcä. Töwö na täju yeichöödoto töweiye naichöje. Sotoocomo cönquiiñemeecöicho, Wanaadi mmaane cönei, chäwwä tujunne na.

⁵ Änwanno mmaja täju yeichöödoto töweiye naichöje maato. Wanaadi woije oojodö’täcä Epíiditu Santo ewöötöje aweichöcoomo wetä, maa amääajä töweiye naichöje, Wanaadi wwä töwa’deuwaamo shooma’comooje aweichöcoomo wetä mmaja. Yaawä Jesuuquidiito ai Wanaadi wwono saaquidiijiisiyo aashichaato u’jai maato, Wanaadi wacö’je.

⁶ Edääje imennaajä nä’döa: Siyon ña dhanwa wödööa, öwö neichö, öwwä tujunnato mmaja. Maa anno’tojo täju döaajä töweiye naichöje töwö na’de; ñäädä ecaanö’nei ämjöichojo’da wa’de; quee imennaajä nä’döa.

⁷ Änwanno ecaanö’nnamo wwäiñe tujunne töwö na. Ñanno aneecanö’jöncomo wwä mmaane töquiiñeme’que na, imennaajä nä’döaadöje: Yää täju, maa amännamo cönquiiñemeecöichodö, anno’tojooje na eduuwa; quee imennaajä nä’döa.

⁸ Edääje mmaja imennaajä nä’döa dea: Ñäädä dhanwa na’de soto weju’co’to’me; täju soto emajjoneichomo töweiye naichöje mmaja na’dede; quee. Ñanno aneecanö’jöncomo neju’cä’aato Wanaadi a’deddu ännö’da töweijäcäiñe. Yääje töweiyaamoje dea cönä’ja’to.

Wanaadi sotoi weichöcoomo

⁹ Änwanno mmaane soto eiya’como, Cajiichaana Wanaadi wwä töwa’deuwaamo mmaja, soto coneeca’como mmaja, Wanaadi sotoije mmaja. Yääje yeijäcä änwanno ecammajä’jai maato Wanaadi nödöödö aashichaato, ñäädä tööjano’tacanno adha’dejjaneichomo’jödö tönaawanaanö’cadö aashichaato aca.

¹⁰ Jenaadä Wanaadi sotoije’da mä’ja’quene; eduuwa mmaane shootoije maato. Jenaadä anejja wentumje adheenetäiñe’da cönä’jaacä; eduuwa mmaane Wanaadi wentumje adheeneaato.

Wanaadi anoonöje eijai cöweichöcoomo

¹¹ Jimmä umjummadö, edä nono de’woncomoojönö änwanno; ajaatawäiñe’da maato. Yääje yeijäcä edääje mänwätuujaato: Ajuunucoomo nijummadö männötäi, yää odo’tadööcomo jadä töwä’tu’de’tä weneenedö.

¹² Aashicha eichäcä Wanaadi dhowaanojöncomo jadäiñe. Eduuwa conemjöncomooje adhe’tätaameiñe, yaawä aashichaato ännödööcomo eneedö’jo Wanaadi jäcä aashicha na’deuwaato’de, chäwwä töwäätäcamma’jojoodawäiñe.

¹³ Jesuuquidiito jäcäinchädä tameedä adheedhajootoncomo woije eichäcä, adai’joto acu’shänä yeiya’jäcä,

¹⁴ dho’noichato yeiya’jäcä jeiñe mma. Ñanno dho’noicha’como, acu’shänä newaacadö ñanno, conemjönö dönnamo maminchannamooje, aashichaato dönnamo ya’deme’nnamooje mmaja.

¹⁵ Mädääje Wanaadi awei’sheiñe na, aashichaato tödöödö que Wanaadi dhowaanojöncomo meta’jöichajootäiye, aneene’jutu’jöncomo mmaja.

¹⁶ Änwanno jedeeso nönge aweichöcoomo jonno töwäätu’ca maato eduuwa. Yääje yeichaame mädä töwäätu’ca aweichöcoomo conemjönö ännöto’comooje tödööjai’cha maato; Wanaadi anoonöjeene eijai maato.

¹⁷ Tameedä soto aashicha tödöötäcä. Quedeiyentecoomo ijummatääcä. Wanaadi ñontätääcä. Aashicha acu’shänä tödöötäcä.

Quidiito wäntunamjö’jödö

¹⁸ Änwanno tädhaajäca’como, adheedhajootoncomo woije eichäcä; tönoiñe eneetäcä, aashicha’como dea mma’da, ta’cwaiña’como dea mma’da mmaja, tääde’cwada’como mmajaane.

¹⁹ Aashicha töweiye nai Wanaadi jäcäinchädä jönaawä tämentädö aashicha shinchädö.

²⁰ ¿Aaquene mmaja täje eichöde’ conemjönö ännö’jödö jo’tädööje mmädä amaaminchadö shinchädö? Yääne Wanaadi yaacö’je na, aashichaato tödö’jödö weichaame äwäntunamjödö shinchädööne.

²¹ Mädääje töweiyaamoje Wanaadi adha’dejjatääne. Jesuuquidiito mmaja cönäntunamjöi chea äjääcäinchädäiñe, aneenedööcomooje töweiyemööje, töwö yei’jödö nönge mmaja aweichöcoomo wetä.

²² Töwö Jesuuquidiito conemjönö ännö’da cöneiyacä, ätäncu’tä’da mmaja cöneiya’dea.

²³ Töwö tutuushimaadawä oojo’tä’da cöneiyacä. Täntunamjödaawä äncu’nä’täjäätö’da cöneiya’dea. Töwä’tue mmaane cönä’tui Wanaadi wwä, ñäädä chäänönge ämmencanei wwä.

²⁴ Quidiito dea cöcoone’nadiiyöcoomo töjääcä cönshinchäi cuduusa jäcä töweichö, conemjönö tödöödö jäcä yäämaajä nönge cöweichöcoomo wetä, aashichaato mmaane tödööcoije cöweichöcoomo wetä. Töwö yäätunui’chä’jödö que töwääjichö’tä maato.

²⁵ Jenaadä änwanno mä’ja’quene oweeja sadiijanga’como töweiye naichodööje. Eduuwaane adhennacaatäne Quidiito wwadäädä, ñäädä adhe’se’täneichomo, odo’tadööcomo edai’chänei mmaja.