1 JUAN 5 - Wanaadi A'deddu

Edä nono de’wono e’jodheinchajai cöweichöcoomo

¹ Ñäädä Jesuuquidiito Äwaanacaaneije yeichö ecaanö’nei, Wanaadi nnedö ñäädä. Ñäädä Yuumö ijummanei iiñacoomo mmaja nijummaato dea.

² Wanaadi ijumma’jäcä cöwwäiñe, ñaanontä’jödö tödööa’jäcä mmaja, yaawä cowaanäcäiñe eijai ña Wanaadi nnacoomo tumjumma cöweichöcoomo.

³ Wanaadi ijummadö töweiye nai ñaanontädö tödöödö que. Wanaadi waanontädö tödöödö aquiimatä’da na.

⁴ Ñäädä Wanaadi nnedö chäänöngato ne’jodheincha edä nono de’wono. Cönwanno edä nono de’wono e’jodheinchajai caato cöneecamjödööcomo que.

⁵ Ñäädä mma edä nono de’wono e’jodheinchajai ña, Jesuuquidiito Wanaadi nnedööje yeichö ecaanö’nei mma.

Wanaadi nnedö ecammadö

⁶ Ñäädä Jesuuquidiito weejödö cönääne’ju’joi tuna que, munu que mmaja. Tuna que mma’da Jesuuquidiito weejödö cönääne’ju’joi, dhaquiiyö que mmajaane. Epíiditu Santo dea yääje yeichö necamma; chäänöngato ñäädä Epíiditu Santo.

⁷ Aaduwaawä naato yää ecammannamo caju ña; ñanno naato Cumöötoncomo, ñäädä A’deu mmaja, Epíiditu Santo mmaja. Tönwanno naato tooni mma.

⁸ Aaduwaawä mmaja na dea edä nono de’wä ecammannamo; Epíiditu Santo, tuna mmaja, dhaquiiyö mmaja. Yää aaduwaawä naadö äänönge ñeecammadö.

⁹ ¿Aashicha jönca soto necammadööcomo töneeta cäänetääne? Töwaacö’je aashicha tätamje na Wanaadi necammadö, yää Tönnedö jäcä töwö cöneecammaichö.

¹⁰ Ñäädä Wanaadi nnedö ecaanö’nei yääje mmaja nichö’tajä’a dea. Ñäädä Wanaadi aneecanö’jönö mmaane Wanaadi töwä’dunaatoje ne’ta, Tönnedö jäcä Wanaadi necamma’jödö aneecamjö’da töweichö que.

¹¹ Edä yää cöwwäiñe Wanaadi necamma’jödö: Töwö Iiñedö ecamjödö jäcäinchädä cöweichöcoomo töwaatamemjönö cönä’tui cöwwäiñe, Wanaadi nutuudu.

¹² Ñäädä Wanaadi nnedö ’jano töweichö neneea’de. Ñäädä Wanaadi nnedö ’jemjönö mmaane töweichö aneene’da na’de.

Yä’ca’jödö

¹³ Edä wimennäi äwwadäädäiñe änwanno Wanaadi nnedö ecaanö’nnamo, odhoowanääcäiñe yeichö wetä töwaatamemjönö weiñä ’je aweichöcoomo.

¹⁴ Cönwanno queecanö’ato chäänönge Wanaadi weichö. Töwö yoije ane’cä’cä chäwwä e’ca’a’jäcä cöwwäiñe, töwö töneeta yaawä.

¹⁵ Cöwa’deuwödööcomo töneeta yeichö cowaanäcäiñe yeijäcä, cowaanäcäiñe mmaja na dea cöne’catäädöcoomo tunu’e yeichö.

¹⁶ Conemjönö tödöödöje töweichacoono eneea’jäcä anejja wwä, wäämato’jönö mma iiñödö yeiya’jäcä, töwö Wanaadi wwä a’deujai ña yaawä töweichacoono jäcä. Ñäädä weichö Wanaadi nu’a’de yaawä, wäämato’jönö mma iiñödö yeiya’jäcä. Töweiye na conemjönö tödöödö wäämatoojo. Yää nöngato jäcä’daane wecamma chääjäcä Wanaadi wwä wa’deunä.

¹⁷ Tameedä chäänönge’da weiñä cone’da na Wanaadi wwä. Yaawääne’ töweiye na conemjönö tödöödö wäämato’jönö mma.

¹⁸ Cowaanäcäiñe na ñäädä Wanaadi jadoono conemjönö acaadä ei’cha yeichö, Wanaadi nnedö wwä tädai’chä yeijäcä, odo’sha wwä ajoojodö queiñe.

¹⁹ Cönwanno cowaanäcäiñe na Wanaadi sotoije cöweichöcoomo. Cowaanäcäiñe na dea odo’sha tameedä edä nono de’woncomo edhaajotoncomooje yeichö.

²⁰ Cowaanäcäiñe na Wanaadi nnedö weejö’jödö. Töwö cösejje’tätääne Wanaadi chäänöngato jadoonoje cöweichöcoomo wetä. Cönwanno caato ñäädä Wanaadi chäänöngato jadoonoje, Iiñedö Jesuuquidiito jadä cöweijäcäiñe. Ñäädä ñäädä Wanaadi chäänöngato, weiñä töwaatamemjönö edhaajä.

²¹ Önnacoomo’cä, äädai’chätääcä wanaadija’como chäänöngemjöncomo jäcäiñe. Amén.