1 JUAN 4 - Wanaadi A'deddu

Epíiditu Santo woijato ecammajäätödö

¹ Jimmä umjummadö, tameedä ecammajäätödö mmädä maneecanö’täi’che, ñanno Wanaadi woija’como wätä’tädö necammajäätödööcomo. Töneene’ju’eene eichäcä Wanaadi woijatooje yeichö, yoijatooje’da yeichö jeiñe mma. Jooje naato eduuwa edä nono de’wä ecammajä’nnamo chäänöngemjöncomo, Wanaadi woija’como wätä’tädö.

² Edääje ene’ju’jai maato Epíiditu Santo woijato ecammajäätödö: Ñäädä Jesuuquidiito Äwaanacaaneije yeichö ecammanei, sotooje yeejö’jödö ecammanei mmaja, Wanaadi dö’sennoto Epíiditu Santo ’jano ñäädä.

³ Ñäädä Jesuuquidiito sotooje yeejö’jödö ijo’me’dänei ’chene Epíiditu Santo ’je’da na; Jesuuquidiito tu’de’tänei woijato ñäädä. Änwanno töneeta mä’ja’quene ñäädä we’tojo. Eduuwa edä nono de’wä töwö na.

⁴ Önnacoomo’cä, änwanno maato Wanaadi sotoije. Anwanno me’jodheinchatääne ñanno ecammajä’nnamo chäänöngemjöncomo, jäduuje’cä yeijäcä ñäädä Epíiditu Santo ataacaiñe naadö, edä nono de’wono e’jodhe’cä.

⁵ Tönwanno edä nono de’wonooje naato; yääje yeijäcä edä nono de’wono jäcä töwa’deuwe weneeneto. Dha’dedducoomo töneeta weneeneto edä nono de’woncomo.

⁶ Cönwanno mmaane Wanaadi sotoije caato. Ñäädä Wanaadi jadoono ca’dedducoomo töneeta weneene; ñäädä Wanaadi jadoonojöönö mmaane ca’dedducoomo aneeta’da na. Mädääje ene’ju’jai caato ñäädä chäänöngato woije ecammajä’nei, chäänöngemjönö woije ecammajä’nei mmaja.

Wanaadi wä’jummanä edhaajäje yeichö

⁷ Jimmä umjummadö, cä’jummatäiye cönwanno, Wanaadi dö’sennotoone yää wä’jummanä yeiyajä. Ñäädä wä’jummanä ’jano Wanaadi nnedö ñäädä, Wanaadi jadoono mmaja.

⁸ Ñäädä wä’jummanä ’jemjönö Wanaadi jadoonojöönö ñäädä, wä’jummanä edhaajääne Wanaadi weiyajä.

⁹ Edä nono de’wä Tönnedö tooniyaano anontädö que Wanaadi cöwwäiñe cöneenejoi töwwä cujummadööcomo. Töwö Tönnedö cönaanontäi cöweichöcoomo u’neije.

¹⁰ Edä yää wä’jummanä neene jaiñoone, cöwwäiñe Wanaadi jummadööjönööne, töwö chäwwä cujummadööcomoone. Töwö Wanaadi Tönnedö cönaanontäi saaquidiijiisiyooje töwä’tueemöje, cöcoone’nadiiyöcoomo choccatoojoje.

¹¹ Jimmä umjummadö, cönwanno mmaja ä’jummajai caato dea, mädä wa’cä cujummaatöcoomo’da Wanaadi wwä.

¹² Wanaadi eneenei ’je’da na soto. Yääje yeichaame cöwä’jumma’comjäcä töwö cötaacaiñe na. Mädääje chäänönge cä’döaato Wanaadi jummadö jäcä.

¹³ Cöwwäiñe Epíiditu Santo utu’jödö weijäcä Wanaadi wwä, cönwanno cowaanäcäiñe na chääjadä cöweichöcoomo, töwö cötaacaiñe yeichö mmaja.

¹⁴ Ñaa cöneeneaacä Cumöötoncomo nanontä’jödö, ñäädä Iiñedö, edä nono de’woncomo ewaanacaaneichomooje cönaanontäichö. Ñäädä töneene’jödö töneecammajä’e ñaa weneene.

¹⁵ Ñäädä Jesuuquidiito Wanaadi nnedööje yeichö ecammanei Wanaadi jadoono ñäädä, Wanaadi chaaca na dea töwö.

¹⁶ Cönwanno cowaanäcäiñe cönä’döi, queecanö’täne dea cujummadööcomo Wanaadi wwä. Wanaadi ñäädä wä’jummanä edhaajä. Ñäädä wä’jummanä ’jano Wanaadi jadoono ñäädä, Wanaadi chaaca na dea töwö.

¹⁷ Mädääje chäänönge cä’döaato wä’jummanä jäcä, töjöiye’da cöweichöcoomo wetä yaawä wätämmencajootojo anootoi’chädö awä. Edä nono de’wä caatoodawä’jödöödä Jesuuquidiito nönge caato.

¹⁸ Wä’jummanä ’je weiñawä tösaade weiñä ’je’da na, tösaade weiñä töneemaane yeiyajä yää wä’jummanä. Tösaade weiñä töweiye nai töwäätä’maminchajoomöje weiñawä. Yääje yeijäcä ñäädä tösaadato chäänönge ä’dö’da dea na wä’jummanä jäcä.

¹⁹ Cönwanno Wanaadi quiijummaato chäwwä awa’deene cumjumma’jocoomo weijäcä.

²⁰ Ñäädä edääjato wä’dödö: “Wanaadi tumjumma öwö;” queeto wä’dödö töweichacoono tönquiiñeme’que töweichaamato, töwä’dunaato ñäädä. Töweichacoono eneetaame ämjumma’da yeiya’jäcä ¿aaquene mmaja Wanaadi ämjummadö deaade’, ñäädä töneene’jödööjönöödä?

²¹ Edääje töwö Wanaadi canontätääne: Ñäädä Wanaadi ijummanei, töweichacoono mmaja ijummajai ña dea, quee.