1 JUAN 3 - Wanaadi A'deddu

Wanaadi nnedööje weiñä

¹ Chö’tamme’täcä’ma Cumöötoncomo Wanaadi wwä tujunne cöweichöcoomo, tönnacoomoje cä’taatoodö naane’. Iiñacoomoje dämma caato. Iiñacoomoje cöweichöcoomo aneene’jutu’da weneeneto edä nono de’woncomo, Wanaadi dhowaanäcäiñe’da yeichomjäcä.

² Änwanno umjummadö, eduuwa caato Wanaadi nnacoomoje, yaawääne, cowaanäcäiñe’da dea na äcuude cöweicho’como. Edääje yeichö mmaane cowaanäcäiñe na, Jesuuquidiito we’a’jäcä töwö ñönge mmaja caato’de, töwö yeichö jaiñoone cöwwäiñe eneejäcä.

³ Ñäädä yää womo’nei aashicha töwei’she weneene, Jesuuquidiito aashicha naadöje mmaja.

⁴ Ñäädä conemjönö tödöönei Wanaadi waanontädö tömja’do’jo, waanontänä ija’do’jodö mmaane yeiyajä yää conemjönö tödöödö.

⁵ Änwanno odhoowanääcäiñe na cöcoone’nadiiyöcoomo jonno cöcoccaiñe Jesuuquidiito weejö’jödö. Töwö mmaane conemjönö ’je’da na.

⁶ Yääje yeijäcä, tameedä chääjadoono conemjönö acaadä ei’cha na. Ñäädä conemjönö acaadä töweiyato Jesuuquidiito aneenejöönö ñäädä, Jesuuquidiito jadoonojöönö mmaja.

⁷ Önnacoomo’cä, mätäncu’tojootäi’che anejja wwä. Ñäädä chäänöngato tödöönei chäänönge na, Jesuuquidiito chäänönge naadöje mmaja.

⁸ Ñäädä conemjönö acaadä töweiyato mmaane odo’sha sotoi ñäädä, conemjönö tödööneiñe odo’sha yeiyajä yaajäntä’jödö jonnoto’jödöödä. Yääjatooje Wanaadi nnedö cöneejä, odo’sha nödöödö emaaneije.

⁹ Ñäädä Wanaadi nnedö conemjönö acaadä ei’cha na, Wanaadi weichö tötaaca yeijäcä. Töwö conemjönö acaadä eijai’cha na, Wanaadi nnedööje töweijäcä.

¹⁰ Mädääje täne’ju’dhe naato Wanaadi nnacoomo, odo’sha nnacoomo mmaja. Ñäädä chäänöngato tödööneijönö, töweichacoono ämjummajöönö, Wanaadi nnedööjönö ñäädä.

Cönwannoje dea ä’jummajai cöweichöcoomo

¹¹ Edä yää wätunnä yaajäntä’jödö jonnoto’jödöödä töneeta määnetäänedö: Cä’jummatäiye cönwannoje dea.

¹² Caín nönge’daane queicho’ñojo. Töwö cönä’jaacä odo’sha sotoi. Töwö tacoono cöneemai. ¿Ane’cäämö jo’tädööje cöneemai, quee ’ja? Conemjönö tönnöe töwö töweijäcä, dhacoono mmaane chäänönge tönnöe cönä’jaacä.

¹³ Jimmä, cone’da mma mä’döjootäi’che edä nono de’woncomo wwäiñe äquiiñeme’ca’comjäcä.

¹⁴ Cönwanno töwäämaamöje cöwei’jocoomo jonno töwäämaamöje’da cä’dötääne; yääje cöweichöcoomo cowaanäcäiñe na cöjimmotoncomo tumjumma cöweijäcäiñe. Ñäädä töweichacoono ämjummajöönö töwäämaamöjeedä na.

¹⁵ Ñäädä töweichacoono chiiñeme’nei, soto emaanei wa’cä mmaja na dea ñäädä. Änwanno odhoowanääcäiñe na soto emaanei weichö töwaatamemjönö ’je’da yeichö.

¹⁶ Cöjääcäinchädäiñe Jesuuquidiito wääma’jödö que cönwanno coowanoomatääne wä’jummanä chäänöngato jäcä. Yääje mmaja cönwanno cöweichöcoomo u’jai caato cöjimmotoncomo jäcäinchädä.

¹⁷ Ñäädä töwwä töweiyato, töweichacoono a’que eneetaame ani’wa’täjöönö, Wanaadi nutuudu wä’jummanä ’je’da na ñäädä wwä.

¹⁸ Önnacoomo’cä, ca’dedducoomo que mma’da cä’jummato’ñojo, cöntadööcomo que mma’da mmaja, chäänöngato queene, tödööancädä mmaja.

Wanaadi owaadäädä töjöiye’da cöweichöcoomo

¹⁹ Mädääje ene’ju’jai caato chäänöngato woije cöweichöcoomo, töjöiye’da cöweichöcoomo wetä Wanaadi owaadäädä.

²⁰ Conemjönö ’je cötö’ta’comjäcä Wanaadi na cötö’tajäätödööcomo e’jodhe; töwö tameedä dhowaanäcä na.

²¹ Yääje yeijäcä jimmä umjummadö, conemjönö ’je’da cötö’ta’comjäcä, töjöiye’da eijai caato Wanaadi owaadäädä.

²² Tameedä cöne’catäädöcoomo töwö u’jai ña yaawä, ñaanontä’jödö tönnöe cöweijäcäiñe, yaacötö tönnöe cöweijäcäiñe mmaja.

²³ Wanaadi waanontä’jödö yää Iiñedö Jesuuquidiito ecamjödö, cöwä’jummadööcomo mmaja, töwö canonta’quennöje dea.

²⁴ Ñäädä Wanaadi waanontädö tödöönei Wanaadi jadoono ñäädä, Wanaadi chaaca na dea töwö. Wanaadi cötaacaiñe yeichö cowaanäcäiñe na Epíiditu Santo woije, ñäädä cöwwäiñe Wanaadi nutuudu.