1 JUAN 2 - Wanaadi A'deddu

Jesuuquidiito cöjääcäinchädäiñe töwa’deuwemööje yeichö

¹ Önnacoomo’cä, edä wimenna äwwadäädäiñe conemjönö ännö’da aweichöcoomo wetä. Yaawääne’ conemjönö tödööa’jäcä anejja wwä, töweiye na Cumöötoncomo wwä cöjääcäinchädäiñe töwa’deuwemö, ñäädä Jesuuquidiito chäänöngato.

² Töwö Jesuuquidiito na saaquidiijiisiyooje, cöcoone’nadiiyöcoomo choccatoojoje; cönwanno cöcoone’nadiiyöcoomo choccatoojo mmajöönö, tameedä edä nono de’woncomo cone’nadiiyöcoomo mmajaane.

³ Wanaadi waanontä’jödö tödööa’jäcä cöwwäiñe cowaanäcäiñe eijai ña yaawä chääjadoonoje cöweichöcoomo.

⁴ Ñäädä, “Wanaadi jadoono öwö,” queeto wä’dödö, ñaanontä’jödö ännö’da töweichaame, töwä’dunaato ñäädä; chäänöngato ’je’da na töwö.

⁵ Ñäädä Wanaadi waanontä’jödö tödöönei mmaane chäänönge na Wanaadi jummadö jäcä. Mädääje ene’ju’jai caato Wanaadi jadoonoje cöweichöcoomo.

⁶ Ñäädä Wanaadi jadoonojaato wätä’tädö Jesuuquidiito wei’jödö nönge mmaja eijai ña dea.

Eduuwaato waanontänä

⁷ Jimmä, waanontänä wimenna äwwadäädäiñe, eduuwaatojöönö yeichaame, yaajäntä’jödö jonnoto’jödöödä odhoowanääcäiñe naadö deaane. Edä jenaado’jä waanontänä wecammaadö, yaajäntä’jödö jonnoto’jödöödä aneeta’jocoomo dea.

⁸ Yääje yeichaame eduuwaato waanontänä wa’cä na dea, tööjano’taca weiñä wataamenääje yeijäcä, weiyu neene jaiñoone wawaananääje yeijäcä mmaja. Jesuuquidiito yää waanontänä wä’dödö woije töweiye weneene; änwanno mmaja yää tönnöe määnetääne dea.

⁹ Ñäädä tawaanato acaano wätä’tädö, töweichacoono tönquiiñeme’que töweichaame, tööjano’taca dea na ñäädä.

¹⁰ Ñäädä töweichacoono ijummanei mmaane tawaanato aca töweiye weneene; shaadijamjai’cha na töwö.

¹¹ Ñäädä töweichacoono chiiñeme’nei tööjano’taca na; tööjano’tai näämannä’a töwö. Töwö tösaadijange na tööjato wwä tänuudu’jödö weijäcä.

¹² Äwwadäädäiñe wimenna änwanno önnacoomo’cä, Wanaadi wwä ocoone’nadiiyöcoomo encwanno’jo’jödö weijäcä, Jesuuquidiito jäcäinchädä.

¹³ Äwwadäädäiñe wimenna änwanno yuumötoncomo, ñäädä yaajäntä’jödöödoto jadoonoje aweijäcäiñe. Äwwadäädäiñe wimenna änwanno ääjömannamo, odo’sha e’jodheincha’jödö weijäcä äwwäiñe. Äwwadäädäiñe wimennäi änwanno önnacoomo’cä, Cumöötoncomo jadoonoje aweijäcäiñe.

¹⁴ Äwwadäädäiñe wimennäi änwanno yuumötoncomo, ñäädä yaajäntä’jödöödoto jadoonoje aweijäcäiñe. Äwwadäädäiñe wimennäi änwanno ääjömannamo, jäduuje aweijäcäiñe, Wanaadi a’deddu ataacaiñe yeijäcä mmaja, odo’sha e’jodheincha’jödö weijäcä mmaja äwwäiñe.

¹⁵ Edä nono mämjummatäi, edä nono de’wono mmaja. Ñäädä edä nono de’wono ijummanei Cumöötoncomo Wanaadi jummadö ’je’da na ñäädä.

¹⁶ Tameedä edä nono de’wono Cumöötoncomo dö’sennotoojönö, edä nono de’wono mma, yää cujuunucoomo nijummadö, cänuuducoomo nene’madö ijummadö mmaja, o’jodhe töwei’she weiñä mmaja.

¹⁷ Edä nonoodö wataamedö mädä, tameedä edä nono de’wono tujunnato mmaja. Ñäädä Wanaadi woije tödöönei mmaane yeichöödäje töweiyemööje na.

Chäänöngato ene’jutuudu

¹⁸ Önnacoomo’cä, anooto wataamedö cu’nädö aca yä’döaajä mädä eduuwa. Änwanno metaatäne Quidiito tu’de’tänei we’tojo jäcä. Jooje naato eduuwa Jesuuquidiito tu’de’tännamo. Mädääje yeijäcä ene’ju’jai caato anooto wataamedö cu’nädö yä’döaajäje yeichö.

¹⁹ Tönwanno cönä’sancwajoicho cöjaadäiñe töweichöcoomo jonno. Cöjimmotoncomo neenejöönö cönä’ja’to. Dha’da ei’jo mmaane cösancwatäiñe’da eichö cöneiya’to. Tönwanno cösancwatääne täne’ju’dhe yeichö wetä cöjimmotoncomo neeneje’da töweichöcoomo.

²⁰ Äwwäiñe mmaane Quidiito cuntui Epíiditu Santo; tameedä towaanojo’neiñe maato.

²¹ Chäänöngato odhoowanääcäiñe’da aweichöcoomo jäcäinchädä’da äwwadäädäiñe wimenna, odhoowanääcäiñe yeichö jäcäinchädääne. Änwanno odhoowanääcäiñe wä’duntänä chäänöngato woije’da yeichö.

²² ¿Änääcö ñäädä töwä’dunaato, quee ’ja? Ñäädä Jesuuquidiito Äwaanacaaneije yeichö ijo’me’dänei, ñäädä ñäädä töwä’dunaato. Yääjato wä’dödö töwä’dunaato ñäädä, Quidiito tu’de’tänei mmaja, Cumöötoncomo tömjome’dä yeijäcä, Iiñedö tömjome’dä yeijäcä mmaja.

²³ Ñäädä Iiñedö ijo’manei Cumöötoncomo ’je’da mmaja na dea. Ñäädä Iiñedö ecammanei mmaane Cumöötoncomo ’je na dea.

²⁴ Yääje yeijäcä ataacaiñeedä shoomatääcä yää yaajäntä’jödö jonnoto’jödöödä aneeta’jocoomo. Yää yaajäntä’jödö jonnoto’jödöödä ataacaiñe dea yeiya’jäcä änwanno mmaja Iiñedö jadoonoje maato’de, Cumöötoncomo jadoonoje mmaja.

²⁵ Töwö Jesuuquidiito dea cöneecammai cöwwäiñe cöweichöcoomo töwaatamemjönö.

²⁶ Edä wimennäi äwwadäädäiñe adhencu’tä’sa’como jäcäiñe.

²⁷ Änwanno Epíiditu Santo ’je maato, ñäädä Jesuuquidiito nutuudu äwwäiñe. Yääje yeijäcä odhoowanoomaneichomo tujunne’da na, töwö Epíiditu Santo dea tameedä odhoowanoomatäiñe yeijäcä. Chäänönge ñäädä Epíiditu Santo nowaanomaadö, wätäncu’tänääjönö. Yääje yeijäcä Quidiito jadä eichäcä, Epíiditu Santo nowaanomaadö nönge deaane.

²⁸ Önnacoomo’cä, Quidiito jadä deaane eichäcä. Yaawä ta’cwaiñe eijai caato töwö yääneja’jäcä; dhowaadäädä töjöiye’da eijai caato yaawä töwö ye’a’jäcä.

²⁹ Änwanno odhoowanääcäiñe chäänönge Jesuuquidiito weichö. Yääje yeijäcä odhoowanääcäiñe eijai ña dea tameedä chäänönga’como Wanaadi nnacoomoje yeichöcoomo.