1 JUAN 1 - Wanaadi A'deddu

Weichojo A’deu

¹ Ñäädä yaajäntä’jödö jonnoto’jödöödä töweiye cönä’ja’dö, ñäädä Weichojo A’deu edhaajä, ñaa necammajä’a äwwäiñe. Ñäädä wa’deuwödö töneeta ñaa cönä’jaacä; tänuudu que töneene ñaa cönä’ja’dea; töneene’ma ñaa cönä’ja’dea; tamäädö que tönaajojo ñaa cönä’ja’dea.

² Ñäädä Weichojo edhaajä cönäänejoi; ñaa cöneeneaacä. Yääje yeijäcä ñaa necammajä’e äwwäiñe Weichojo töwaatamemjönö edhaajä jäcä. Töwö cönä’jaacä Cumöötoncomo jadä; ñaa wwä cönäänejoi yaawä.

³ Töneene’jödö, töneeta’jödö mmaja ñaa necammajä’a äwwäiñe, ääjimmäje cöweichöcoomo wetä. Cönwanno caato Cumöötoncomo jadoonoje, Iiñedö Jesuuquidiito jadoonoje mmaja.

⁴ Edä ñaa nimenna äwwadäädäiñe ta’cwaiñe’cä jeene aweichöcoomo wetä.

Wanaadi tawaanatooje yeichö

⁵ Edä yää wätunnä Jesuuquidiito wwä ñaa neta’jödö; äwwäiñe ñaa necamma eduuwa: Wanaadi ñäädä tawaanato jaiñoone; tööjato ’je’da töwö.

⁶ Chääjadoonoje cöwäätä’ta’comjäcä tööjano’taca cöwäämannä’taameiñe, cöwä’duntaato yaawä, chäänöngato ännö’da mmaja.

⁷ Dha’da ’quene tawaanato ai cöwäämannä’a’comjäcä, töwö Wanaadi tawaanato aca naadöje mmaja, ääjimmäje caato yaawä, Iiñedö Jesuuquidiito aquiiyö nichocca yaawä tameedä cöcoone’nadiiyöcoomo.

⁸ Conemjönö ’je’da cöwäätä’ta’comjäcä, cöwwäädäiñe cätäncu’taato yaawä, chäänöngato ’je’da caato dea.

⁹ Yaawääne’ Wanaadi wwä conemjönö cönnö’jocoomo ecamma’jäcä cöwwäiñe, täcaanö’emje töwö na chäänönge tödööjai yeichö. Töwö conemjönö cönnö’jocoomo nencwannä’ja yaawä; tameedä cöcoone’nadiiyöcoomo nichocca dea.

¹⁰ Conemjönö ännö’da cöwäätä’ta’comjäcä, töwä’dunaatoje Wanaadi que’taato; dha’deddu ’je’da caato yaawä.