1 CODINTIYO 8 - Wanaadi A'deddu

Chu’taajä wwä u’ajä jäcä wä’wätuujanä

¹ Edääje wä’dö’se wa eduuwa äwanshi jäcä, yää saaquidiijiisiyooje chu’taajä wwä u’ajä jäcä. Towaanojo’ne cöweichaameiñe mma’ne mädä jäcääne’, yaawääne’ yää towaanojo’ne weiñä o’jodhe tö’tamme’jojä’tä mma töweiye nai; wä’jummanä mmaane ’wa’tätä na.

² Anejja towaanojo’ne töwääcanö’a’jäcä towaanojo’ne yeichöjöönö yää.

³ Wanaadi ijumma’jäcä mmaane soto wwä, Wanaadi owaanäcä na ñäädä yaawä.

⁴ Yääje yeijäcä edääje wä’döa äwanshi chu’taajä wwä saaquidiijiisiyooje u’ajä jäcä: Cönwanno cowaanäcäiñe na ñeeneje’da yää chu’taajä weichö, tooni mma Wanaadi weijäcä.

⁵ Jooje yeichaameiñe wanaadija’como e’ta’como mma caju ña, edä nono de’wä mmaja, ñanno wanaadije soto töne’tä weneenetoodö, ädhaajäje mmaja.

⁶ Cönwanno cöwwäiñe mmaane tooni Wanaadi ña, ñäädä Cumöötoncomo, tameedä tödööajä naadö tödöönei’jödö. Töwö chäwwonooje caato cönwanno. Tooni mma mmaja Ädhaajä na dea, ñäädä Jesuuquidiito. Töwö yoije tameedä tödööajä weneene, cönwanno jadä’jödöödä.

⁷ Tameedä’da soto mädä dhowaanäcäiñe na. Anejja chu’taajä jäcä töwäämu’ca töwei’jödö weijäcä yää chu’taajä wwä u’ajä tänääjai ña yääje tötö’tajä’ancädä: “Chu’taajä wwä u’ajä wänääanä;” quee tötö’tajä’ancädä. Yaawä jäduuje’da tötö’tajäätödö weijäcä conemjönö nejoodöja tötö’tajäätödö ai.

⁸ Äwanshi mmädä cödöötäiñe’da yeichaame Wanaadi owaadäädä. Cone’da’da eijai caato yää änäänä’da cöweiya’comjäcä; tänääa’jäcä aashicha cödöötäiñe’da mmaja.

⁹ Yääje yeichaame odhoowadäädäiñe eichäcä, änwanno mädä tödööjai aweichaameiñe ajimmotoncomo jäduujemjönö conemjönö aca mma maneema’joto’no.

¹⁰ Chu’taajä weichojo taca äwääwashincha’jäcä naadö naane’; amäädä yää chu’taajä jäcä chö’tajäätö’da aweichaame anejja quedeiyente jäduujemjönö tö’tajäätödö adheenejai yaawä iiña aweichö. Töwö mmaja yää chu’taajä wwä u’ajä tänääjai ña dea yaawä.

¹¹ Mädääje towaanojo’ne aweichaame aweichacoono jäduujemjönö mishaadijannä’ca, ñäädä chääjäcäinchädä Quidiito cönäämaichö.

¹² Yää chö’tajäätödö sadiijannä’cadö que aweichacoomo jäcä conemjönö tödööa’jäcä äwwä, Quidiito jäcä mmaja conemjönö mödööa.

¹³ Yääje yeijäcä yää äwanshi weichacoono ema’jotoojoje yeiya’jäcä änäänä’daane eijai wa, conemjönö aca mma weichacoono waneema’jo’no.